އިސްރާއީލާ އެމެރިކާ އިން ގުޅިގެން އިރާނަށް ދެމުންދާ ހަމަލާތައް ހަތަރު ހަފްތާގެ މުއްދަތަށް ކުރިޔަށްދާނެކަމަށް ބެލެވޭކަމަށް އެމެރިކާގެ ރައީސް ޑޮނަލް ޓްރަމްޕް ބުނެފިއެވެ.
އިނގިރޭސިވިލާތުގެ ޑެއިލީ މެއިލް އަށް ދިން އިންޓަރވިއުއެއްގައި ޓްރަމްޕް ބުނީ ހަނގުރާމަ ހަތަރު ހަފްތާގެ މުއްދަތަށް ކުރިޔަށްދާނެކަމަށް ބެލެވޭކަމަށެވެ. އިރާނުގެ ބާރާއި އިރާނުގެ ބޮޑު މިން ހުރި މިންވަރަށް ބަލާއިރު ހަތަރު ހަފްތާ ނުވަތަ އެއަށްވުރެ ކުޑަ މުއްދަތެއް ނަގާނެކަމަށް ޓްރަމްޕް ބުންޏެވެ.
ޓްރަމްޕް ވަނީ އިރާނާއެކު ވާހަކަދައްކަން ތައްޔާރަށް ހުރި ކަމަށް ބުނާބުނުން ތަކުރާރުކޮށްފައެވެ. ނަމަވެސް ވާހަކަތައް ކުރިޔަށްދާނެ ދުވަހެއް ނުބުނެއެވެ. ޓްރަމަޕް ބުނީ ވާހަކަ ކުރިޔަށްދާނެ ދުވަހެއް ނޭންގޭކަމަށާއި އިރާނު އޮތީ ވާހަކަތަކަށް ތައްޔާރަށްކަމަށް ބުނެފައިވާކަމަށެވެ. ނަމަވެސް މިދިޔަ ހަފްތާގައި އިރާނުން ވާހަކަދައްކަންޖެހޭކަމަށް ޓްރަމްޕް ބުންޏެވެ.
ނަމަވެސް ބައެއް ރިޕޯޓްތައް ބުނާ ގޮތުގައި އިރާނުން އިސްވެ އެމެރިކާ އާއި ވާހަކަދައްކާކަށް ހުށައެއް ނާޅައެވެ. އިރާނުގެ އައު ލީޑަރޝިޕާއެކު ވާހަކަދައްކަން ތައްޔާރުކަމަށް ޓްރަމްޕް ބުނެފައިވަނީ މިރެއެވެ.
އެންބީސީ އަށް ދިން އިންޓަރވިއުއެއްގައި ޓްރަމްޕް ބުނެފައިވަނީ ހުރިހާ މަގްސަދެއް ހާސިލުވަންދެން އިރާނަށް ހަމަލާދޭނެއެވެ. އެމަގްސަދުތަކަކީ ކޮބައިކަން ހާމަނުކޮށް ޓްރަމްޕް ބުނީ އެމެރިކާ އަސްކަރިއްޔާއިން ހަރަކާތްތެރިވަނީ ހުރިހާ ބާރަކާއެކުކަމަށެވެ. އަދި މަގްސަދު ހާސިލުވަންދެން އަސްކަރިއްޔާއިން ހަމަލާތައް ދެމުންދާނެކަމަށް ވަނީ ބުނެފައެވެ.
އިސްރާއީލާ އެމެރިކާއިން އިރާނަށް ދެމުންދާ ހަމަލާތަކުގެ ބަދަލުގައި އިރާނުން އަންނަނީ އިސްރާއީލާ މެދުއިރުމަތީގައި ހުންނަ އެމެރިކާ ގެ އަސްކަރީ ބޭސްތަކަށް ހަމަލާތައް ދެމުންނެވެ. އަނެއްކޮޅުން މިހަމަލާތަކުގެ ތެރޭގައި އެމެރިކާ އަސްކަރިއްޔާގެ ތިން މީހެއް މަރުވެ ފަސް މީހުން ޒަޚަމްވެފައިވާކަމަށް އެމެރިކާގެ އަސްކަރިއްޔާއިން ވަނީ ބުނެފައެވެ. ނަމަވެސް އެއީ ކޮންބައެއްކަމެއް އަދި އެމީހުން މަރުވީ ކޮން ގައުމެއްގައި ނުވަތަ ކޮންތަނެއްގައި ކަމަށް އެމެރިކާއިން ހާމައެއްނުކުރެއެވެ.
އެމެރިކާގެ ބްރޯޑްކާސްޓަރ އެންބީސީން ރިޕޯޓްކޮށްފައިވާ ގޮތުގައި އެމެރިކާ ސިފައިންގެ ތިން މީހުން މަރުވެފައިވަނީ ކުވައިތަށް އިރާނުން ދިން ހަމަލާތަކުގައެވެ.