އެމެރިކާ އާއި އިސްރާއީލުން ހޮނިހިރު ދުވަހު އިރާނަށް ދިން ހަމަލާތަކުގައި އިރާނުގެ ރޫހާނީ ލީޑަރ އާޔަތުﷲ އަލީ ޚާމަނާއީ މިވަނީ ޝަހީދުވެފައެވެ. އެއާއެކު އިރާނުގެ ހިންގުން މިވަނީ ތިން މެމްބަރުން ހިމެނޭ ވަގުތީ ކައުންސިލަކާ ހަވާލުކޮށްފައެވެ.
ޚާމަނާއީ އަވަހާރަކޮށްލުމުން އެކަމުގެ ބަދަލު ވޭންދެނެވި ގޮތެއްގައި ހިފާނެކަމަށް އިރާނުން ވައުދުވެފައިވާއިރު އިރާނުން އަންނަނީ އިސްރާއީލާއި މެދުއިރުމަތީގައި ހުރި އެމެރިކާގެ އަސްކަރީ ބޭސްތަކަށް އަމާޒުކޮށް ހަމަލާތައް ދެމުންނެވެ. އެމެރިކާ އާއި އިސްރާއީލު ގުޅިގެން އިރާނަށް ހަމަލާ ދިނުމުގެ މައިގަނޑު ބޭނުމަކީ އިރާނުގައި އޮތް ސަރުކާރު ބަދަލުކޮށްލުންކަމުގައިވާއިރު އިރާނުން އަންނަނީ ސްޕްރީމް ލީޑަރެއް ކަނޑައެޅުމުގެ ކަންކަން ކުރަމުންނެވެ.
ވަގުތީ ކައުންސިލަކީ ކޮބާ؟
އިރާނުގެ ގާނޫނު އަސާސީގެ 111 ވަނަ މާއްދާ ބުނާ ގޮތުން އައު ސްޕްރީމް ލީޑަރެއް އައްޔަނުކުރެވެންދެން ސްޕްރީމް ލީޑަރުގެ ޒިންމާތައް އަދާކުރާނީ ވަގުތީ ގޮތުން އެކުލަވާލާ ކައުންސިލަކުންނެވެ.
ޚާމަނާއީ އަވަހާރަވިކަން އިރާނުން އިއުލާންކުރިތާ މާ ގިނަ އިރުތަކެއް ނުވަނީސް އިރާނުން ވަނީ މިކައުންސިލުގައި ހިމެނިވަޑައިގަންނަވާ ބޭފުޅުން ހާމަކުރައްވާފައެވެ. އެބޭފުޅުންނަކީ އިރާނުގެ ރައީސް މަސްއޫދު ޕެޒެޝްކިއާ، ސްޕްރީމް ކޯޓުގެ އިސް ޖަޖު ގުލާމް ހުސައިން މުހުސެނީ އެއިޖީ އަދި ގާޑިއަން ކައުންސިލިގެ މެމްބަރ އާޔަތުﷲ އަލީރެޒާ އަރާފީއެވެ.
އާޔަތުﷲ އަލީރެޒާ އަރާފި:
އަރާފީ އަކީ 2019 ވަނަ އަހަރުން ފެށިގެން ގާޑިއަން ކައުންސިލުގެ މެމްބަރެކެވެ. ގާޑިއަން ކައުންސިލުގެ މެމްބަރުން ކަނޑައަޅުއްވަނީ ސްޕްރީމް ލީޑަރެވެ. ގާޑިއަން ކައުންސިލުގެ ޒިންމާއަކީ މައިގަނޑު ގޮތެއްގައި އިރާނުގެ ގާނޫނުތަކާއި ސިޔާސަތުތައް ބައްޓަންވެގެންދަނީ އިސްލާމީ ހަމަތަކުގެ މަތިންތޯ ކަށަވަރުކުރުމެވެ. މިކައުންސިލަކީ އިރާނުގެ އިންތިޚާބުތަކުގައި ވާދަކުރާ ކެންޑިޑޭޓުން ކަނޑައަޅާ ކައުންސިލެކެވެ. މީގެއިތުރުން އިރާނުގެ ގާނޫނު ހަދާ މަޖިލީހުން ފާސްކުރާ ގާނޫނެއް ވީޓޯ ކުރުމުގެ ބާރު މިކައުންސިލަށް ލިބިދޭއިރު އިންތިޚާބުތައް ސުޕަރވައިޒްކުރަނީވެސް މިކައުންސިލެވެ.
އަރާފީ އަކީ ސްޕްރީމް ލީޑަރ ކަނޑައެޅުމުގެ ކަންކަން ކުރާ ކޮމިޓީގެ މަސައްކަތްތައް ބަލާ އެކްސްޕާޓް އެސެމްބްލީގެ ޑެޕިޔުޓީ ޗެއާރމަނެވެ. އިރާނުގައި ހުންނަ ދީނީ ގޮތުން އެންމެ މުހިންމު ސެންޓަރުގައި ހުކުރު ނަމާދު ކުރައްވައެވެ. މުޅި އިރާނުގައި ދީނީ ލީޑަރުންނަށް ދެވޭ ތައުލީމުގެ ކަންކަން ބަލަހައްޓާ ނިޒާމުގެ އިސް ބޭފުޅަކީވެސް އަރާފީއެވެ.
މަސްއޫދު ޕެޒެޝްކިއާ:
ޕެޒެޝްކިއާ އަކީ ރިފޯމިސްޓް ޕޮލިޓީޝަނެކެވެ. ހިތުގެ އޮޕަރޭޝަން ކުރާ ޑޮކްޓަރެކެވެ. އިރާނު - އިރާގު ހަނގުރާމައިގައި ބައިވެރިވެވަޑައިގެންނެވިއެވެ. ޕެޒެޝްކިއާ އިރާނުގެ ވެރިކަމަށް އިންތިޚާބުވެވަޑައިގެންނެވީ 2024 ވަނަ އަހަރުއެވެ.
އިރާނުގެ ކުރީގެ ރައީސް މުހައްމަދު ޚާތަމީގެ ދައުރުގައި ހެލްތު މިނިސްޓަރުކަން ކުރެއްވިއެވެ. އަދި ގާނޫނު ހަދާ މަޖިލީހުގައި އިރާނުގެ އިރުއުތުރު ސިޓީއެއްކަމުގައިވާ ތަބްރީޒް ތަމްސީލުކުރެއްވިއެވެ.
ޕެޒެޝްކިއާ ވެރިކަމާ ހަވާލުވެވަޑައިގެންނެވިއިރު އިރާނު އޮތީ އިގްތިޞާދީ ގޮތުން ވަރަށް ބޮޑަށް އަޑިއަޅާލާފައެވެ. އެހެންކަމުން އިގްތިޞާދު ރަނގަޅުކުރެއްވުމާއި އިރާނުގެ އެތެރޭގައި ހުރި އިޖުތިމާއީ ކަންކަމާއި އިރާނާ ބައިނަލްއަގްވާމީ ދުނިޔެއާ އޮތް ގުޅުން ރަނގަޅުކުރައްވާނެކަމަށް ކެމްޕެއިން ކުރެއްވިއެވެ. ޕެޒެޝްކިއާ އަކީ އިރާނުގައި އޮތް އިސްލާމިކް ރިޕަބްލިކްގެ ގާނޫނީ ހަމަތަކަށް ނުވަތަ ގެންގުޅޭ ސިޔާސަތުތަކަށް ވަފާތެރި އެކަމަށް ތާއީދުކުރައްވާ ބޭފުޅެކެވެ.
ގުލާމް ހުސައިން މުހުސެނީ އެއިޖީ:
މުހުސެނީ އަކީ އިރާނުގެ ސީނިއާ ދީނީ ލީޑަރެކެވެ. އަދި 2021 ވަނަ އަހަރުން ފެށިގެން އިރާނުގެ ޖުޑީޝަރީގެ އެންމެ އިސް ފަރާތަކީވެސް މުހުސެނީއެވެ.
މީގެކުރިން މުހުސެނީ ވަނީ 2005ން 2008 ށް އިރާނުގެ އިންޓެލިޖެންސް މިނިސްޓަރުކަން ކުރައްވާފައެވެ. އަދި ފަހުން ޕްރޮސެކިޔުޓަރ ޖެނެރަލް ކަމާއި އިރާނުގެ ފުރަތަމަ ޑެޕިޔުޓީ ޗީފް ޖަސްޓިސް އަކީވެސް މުހުސެނީއެވެ. މުހުސެނީ އަކީ އިރާނު ސަރުކާރުގެ ކޮންޒަވޭޓިވް ވިންގ ގެ މުހިންމު ބޭފުޅެއްގެ ގޮތުގައި ފާހަގަކުރެވޭ ބޭފުޅެކެވެ.
ޖެނުއަރީ މަހު އިރާނުގައި ކުރިޔަށްދިޔަ މުޒާހަރާތަކުގައި މުހުސެނީ ވަނީ ހަމަނުޖެހުން އުފައްދާ މީހުންނަށް އެއްވެސް ދުލެއް ނުދޭނެކަމަށް ވިދާޅުވެފައެވެ. އަދި އިރާނުގައި ކުރިޔަށްދިޔަ ހަމަނުޖެހުންތަކުގައި މީހުން ހައްޔަރުކުރުމަށް މަގުފަހިކޮށްފައިވަނީ އެމެރިކާ އާއި އިސްރާއީލުންކަމަށް ވިދާޅުވިއެވެ.