މިހާރު ކުރިމަތިވެފައިވާ ހާލަތުން އަރައިގަތުމަށް ސަރުކާރާއި ފަތުރުވެރިކަމުގެ ސިނާއަތުގެ ހިއްސާދާރުންނާއެކުގައި ގުޅިގެން މަސައްކަތް ކުރުމަށް ތައްޔާރަށް އޮތް ކަމަށް މަޓާޓޯއިން ބުނެފިއެވެ.
މެދުއިރުމަތީގެ ހަމަނުޖެހުމުގެ ސަބަބުން އެ ސަރަހައްދުގެ ގައުމުތަކުގެ ވައިގެ ސަރަހައްދު ބަންދުވުމާއި ގުޅިގެން، އެ ސަރަހައްދުގެ ތެރެއިން ދުނިޔޭގެ އެކި ކަންކޮޅުތަކާއި ގުޅި ލާމެހިފައިވާ ބައިނަލްއަގްވާމީ ދަތުރުފަތުރުގެ ނިޒާމަށް ވަނީ ބުރުއަރާފައެވެ.
މިކަމާ ގުޅިގެން ނެރުނު ނޫސް ބަޔާނެއްގައި މަޓާޓޯއިން ވަނީ މިކަމުގެ ސަބަބުން ރާއްޖޭގެ އިގްތިސާދަށް އަސަރުކުރާނެކަން ބަލައިގަންނަ ކަމަށް ބުނެފައެވެ.
މަޓާޓޯއިން ބުނީ، މި ނާޒުކު ދަނޑިވަޅުގައި މަޓާޓޯ އޮތީ، ސަރުކާރާއި ފަތުރުވެރިކަމުގެ ސިނާއަތުގައި ހުރިހާ ހިއްސާދާރުންނާއި އެކުގައި ކަމަށެވެ. އަދި އިސްވެ އެކުގައި ގުޅިގެން ކުރެވޭ މަސައްކަތުން، ބައިނަލްއަގްވާމީ މައިދާނުގައި ރާއްޖޭގެ ފަތުރުވެރިކަމުގެ ސިނާއަތް ހޯދާފައިވާ އިތުބާރު ދެމެހެއްޓޭނެ ކަމަށް މަޓާޓޯއިން ވަނީ ބުނެފައެވެ.
މެދުކެނޑުމެއްނެތި ދަތުރު ކުރުމަކީ ރާއްޖޭގެ ފަތުރުވެރިކަމުގެ ސިނާއަތް އެކަމަކަށް ވަރަށް ބޮޑަށް ބަރޯސާވާ ކަމެއްކަން ފާހަގަކޮށް، މަޓާޓޯއިން ބުނީ މިހާރު ކުރިމަތިވެފައިވާ ހާލަތުގެ ސަބަބުން ރާއްޖޭގެ އިގްތިސާދަށް އޭގެ އަސަރުކުރާނެކަން ބަލައިގަންނަ ކަމަށެވެ. އަދި މިއީ ކަންބޮޑުވާންޖެހޭ ހާލަތެއް ކަމަށް ވެސް މަޓާޓޮއިން ބުނެއެވެ.
މީގެ ކުރިންވެސް ރާއްޖޭގެ ފަތުރުވެރިކަމުގެ ސިނާޢަތް ވަނީ ދުނިޔެއަށް ކުރިމަތިވި މިފަދަ ހާލަތްތަކުން ކާމިޔާބު ކަމާއެކު އަރައިގަނެފައިކަން މަޓާޓޯއިން ވަނީ ފާހަގަކޮށްފައެވެ. އެހެން ކަމުން އެކުގައި ގުޅިގެން ކުރެވޭ މަސައްކަތްތަކުން މިހާރު ކުރިމަތިވެފައިވާ ހާލަތުން އަރައިގަނެ ރާއްޖޭގެ ފަތުރުވެރިކަމުގެ ސިނާއަތް ދެމެހެއްޓޭނެ ކަމަށް ވެސް މަޓާޓޯއިން ބުނެފައިވެއެވެ.