އިރާނަށް މިއަދު ދިން ހަމަލާތަކުގައި އިރާނުގެ ސްޕްރީމް ލީޑަރ އާޔަތުﷲ އަލީ ޚާމަނާއީ އަވަހާރަކޮށްލެވިފައިވާކަމަށް އިސްރާއީލުގެ އޮފިޝަލުންނާ ހަވާލާދީ މީޑިޔާތަކުން ރިޕޯޓްކޮށްފައިވާއިރު އިރާނުގެ މީޑިޔާތަކުން އެވާހަކަތައް ދޮގުކޮށްފިއެވެ.
އިރާނުގެ ދެ މީޑިޔާ ކަމުގައިވާ ތަސްނިމް އާއި މެހްރު ނިއުސް އެޖެންސީން ރިޕޯޓްކޮށްފައިވާ ގޮތުގައި އަލީ ޚާމަނާއީ ހުންނެވީ ގަދަކޮށްނެވެ. އަދި މިހާރު ކުރިޔަށްދާ ހަމަލާތައް ދިނުމުގައި ކޮމާންޑުތައް ދެއްވަމުން ގެންދަވާކަމަށް ވަނީ ރިޕޯޓްކޮށްފައެވެ.
ރޮއިޓަރސް ނިއުސް އެޖެންސީ އާއި އިސްރާއީލު މީޑިޔާއިން ރިޕޯޓްކޮށްފައިވަނީ ނަން ނުޖަހާ އިސްރާއީލުގެ އޮފިޝަލަކާ ހަވާލާދީ ބުނެފައިވަނީ ޚާމަނާއީ ވަނީ އަވަހާރަކޮށްލާފައިކަމަށެވެ. މިއަދު ދިން ހަމަލާތައް އަމާޒުކޮށްފައިވަނީ ޚާމަނާއީ އުޅުއްވާ ކޮމްޕައުންޑަށެވެ. މިރޭ އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ޓީވީ މެދުވެރިކޮށް ދިން އެޑްރެސްގައި ބުނެފައިވަނީ ޚާމަނާއީ އުޅުއްވާ ތަން ހަލާކުކޮށްލާފައިވާކަމަށެވެ. އިސްރާއީލުން މިިރޭގެ އިރާކޮޅު ބުނެފައިވަނީ އެމީހުން ހެދި އެސެސްމަންޓްތަކުން ދައްކާގޮތުގައި އެހަމަލާތަކުގައި ޚާމަނާއީ ވަނީ އަވަހާރަކޮށްލާފައެވެ.
އޭގެފަހުން އިސްރާއީލުގެ އޮފިޝަލުންނާ ހަވާލާދީ މިޚަބަރު މީޑިޔާތަކުން ރިޕޯޓްކުރަމުންދާއިރު އެ ކޮމްޕައުންޑުން ވެއްޓިފައިވާ ބައިތަކުގެ ތެރެއިން ޚާމަނާއީގެ ހަށިކޮޅު ފެނިފައިވާކަމަށް ވަނީ ރިޕޯޓްކޮށްފައެވެ. ނަމަވެސް މިހާތަނަށް އައިއިރު އެކަމުގެ ފޮޓޯ އެއް އާންމުކޮށްފައެއްނުވެއެވެ.
ޚާމަނާއީ އަވަހާރަކޮށްލާފައިވާކަމަށް އިސްރާއީލުން ބުނަމުންދާއިރު އެމެރިކާގެ ރައީސް ޑޮނަލްޑް ޓްރަމްޕްވެސް ބުނެފައިވަނީ މި ޚަބަރަކީ ތެދު ޚަބަރެއްކަމަށް ގަބޫލުކުރެވޭކަމަށެވެ. އަދި ޚާމަނާއީގެ އިތުރުން އިރާން ސަރުކާރުގެ އިސް އޮފިޝަލުންތަކެއްވެސް އަވަހާރަކޮށްލާފައިވާކަމަށް ވަނީ ބުނެފައެވެ.
ނަމަވެސް މިހާތަނަށް އައިއިރު މިކަން ކަށަވަރުކުރެވޭ ވަރުގެ ހެއްކެއް އެއްވެސް ފަރާތަކުން ދައްކާފައެއްނުވެއެވެ. ޚާމަނާއީ ދުނިޔޭގައި ހުންނެވިކަމަށާއި ޓީވީ މެދުވެރިކުރައްވާ ވާހަކަދައްކަވާނެކަމަށް އިރާނުގެ މީޑިޔާއިން ބުނިނަމަވެސް މިހާތަނަށް އައިއިރު އެކަންވެސް ކޮށްފައެއްނުވެއެވެ.