އަރަގްޗީ ވިދާޅުވެފައިވަނީ ޚާމަނާއީ ދުނިޔޭގައި އެބަ ހުންނެވިކަމަށް
އިސްރާއީލުން މިއަދު އިރާނަށް އަމާޒުކޮށް ދިން ހަމަލާގައި އިރާނުގެ ސްޕްރީމް ލީޑަރ އާޔަތުﷲ އަލީ ޚާމަނާއީ ދިރިއުޅުއްވާ ކޮމްޕައުންޑް އެއްކޮށް ހަލާކުކޮށްލާފައިވާކަމަށް އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ބުނެފިއެވެ.
އިސްރާއީލުގެ ޓީވީ މެދުވެރިކޮށް އިސްރާއީލު ރައްޔިތުންނާ މުޚާތަބުކޮށް ވާހަކަދައްކަމުން ނަތަންޔާހޫ ބުނީ މެދު އިރުމަތީގެ މޫނު މަތި އިސްރާއީލުން މުޅިން ބަދަލުކޮށްލާނެކަމަށާއި މިހާރު އިރާނާ ދެކޮޅަށް ކުރިޔަށްގެންދާ ހަމަލާތަކަކީ އޭގެ ތެރެއިން ދޭ ހަމަލާތަކެއްކަމަށެވެ. އެކަންކުރާނެކަމަށް ނަތަންޔާހޫ ވަނީ ވައުދުވެފައެވެ.
އަދި ޚާމަނާއީ ދިރިއުޅުއްވާ ސަރަހައްދު ހަލާކުކޮށްލެވިފައިވާކަމަށް ނަތަންޔާހޫ ތުހުމަތުކުރާއިރު ރިވޮލިޔުޝަނަރީ ގާޑްސްގެ ކޮމާންޑަރުންނާއި ނިޔުކުލިއަރ ސީނިއާ އޮފިޝަލުންވެސް އަވަހާރަކޮށްލާފައިވާކަމަށް ނަތަންޔާހޫ ބުންޏެވެ.
ނަތަންޔާހޫ ވަނީ އަނެއްކާވެސް އިރާނުގެ ރައްޔިތުން އިރާނު ސަރުކާރު ބަދަލުކޮށްލަން ލިބޭ މިފުރުސަތު ނަގާނުލުމަށް އެދިފައެވެ.
އިސްރާއީލުން މިިރޭގެ އިރާކޮޅު ބުނެފައިވަނީ އެމީހުން ހެދި އެސެސްމަންޓްތަކުން ދައްކާގޮތުގައި އެހަމަލާތަކުގައި ޚާމަނާއީ ވަނީ އަވަހާރަކޮށްލާފައެވެ. ނަމަވެސް އިރާނުން މިކަަމާ ގުޅޭގޮތުން މިހާތަނަށް އައިއިރު އެއްޗެއް ބުނެފައިވަނީ އިރާނުގެ ފޮރިން މިނިސްޓަރ އަރަގްޗީ އެކަންޏެވެ. އަރަގްޗީ ވިދާޅުވެފައިވަނީ ލިބިވަޑައިގަންނަވާފައިވާ މައުލޫމާތަށް ބަލާއިރު ޚާމަނާއީ ދުނިޔޭގައި އެބަ ހުންނެވިއެވެ. އަދި ޚާމަނާއީ އިރާނުގެ ރައްޔިތުންނާ މުޚާބަތަކުކޮށް މިރޭ އިރާކޮޅު ވާހަކަދައްކަވާނެކަމަށް އަލްޖަޒީރާއިން ވަނީ މިރޭ އިރާކޮޅު ރިޕޯޓްކޮށްފައެވެ. ނަމަވެސް މިހާހިސާބަށް އައުމާ ހަމައަށް ޚާމަނާއީ އަދި ޓީވީ މެދުވެރިކުރައްވާ އިރާނުގެ ރައްޔިތުންނާ ވާހަކަދައްކަވާފައެއްނުވެއެވެ. ޚާމަނާއީގެ ހާލަތާއި ގުޅޭގޮތުން އިރާނުން އަދި ރަސްމީކޮށް އެއްޗެއް ބުނެފައެއްވެސް ނުވެއެވެ.
އެމެރިކާ އާއި އިސްރާއީލުން އިރާނަށް ދެމުންދާ ހަމަލާތަކުގެ މައިގަނޑު އަމާޒަކީ އިރާނުގެ ސަރުކާރު ބަދަލުކޮށްލާ އެމީހުން ބޭނުންވާ ބަޔަކު ވެރިކަމަށް ގެނައުން ނަމަވެސް މިއަދު ދިން ހަމަލާތަކުގައި އިރާނުން މަރުވި މީހުންގެ އަދަދު 201ށް އަރާކަމަށް އިރާނުގެ ރެޑް ކްރެސެންޓުން ވަނީ ބުނެފައެވެ. އޭގެ ތެރޭގައި ގިނައީ އާންމުންނެވެ. އިސްރާއީލުން އިރާނުގެ ސްކޫލަކަށް އަމާޒުކޮށް ދިން ހަމަލާގައި މަރުވި ކުދިންގެ އަދަދު މިހާރު ވަނީ 80ށް އަރާފައެވެ.
އަނެއްކޮޅުން އެމެރިކާގެ ރައީސް ވަނީ އިރާނުގެ އަސްކަރިއްޔާ އަމާންދިނުމަށް ގޮވާލާފައެވެ. ނަމަވެސް އިރާނުން ބުނަމުން އަންނަނީ ދިފާއުވުމުގެ ހަމަލާތައް ދޭނެކަމަށާއި އެކަމާ ފަސްނުޖެހޭނެކަމަށެވެ. އިރާނުން އަންނަނީ އިސްރާއީލަށް ހަމަލާދިނުމުގެ އިތުރުން މެދުއިރުމަތީގައި ހުރި އެމެރިކާގެ އަސްކަރީ ބޭސްތަކަށް އަމާޒުކޮށްވެސް ހަމަލާދެމުންނެވެ. އިސްރާއީލަށް އިރާނުން ދިން ހަމަލާތަކުގައި އިމާރާތްތަކަށް ގެއްލުންވެފައިވާ މަންޒަރު ވަނީ އާންމުވެފައެވެ.