މެދުއިރުމަތީގައި ހުރި އެމެރިކާ އާއި އިސްރާއީލުގެ ކޮންމެ ތަނަކީ އިރާނަށް ދިފާއުގައި ހަމަލާދެވޭނެ ތަންތަންކަމަށް އިރާނުގެ ފޮރިން މިނިސްޓަރ އައްބާސް އަރަގްޗީ ވިދާޅުވެއްޖެއެވެ.
އިރާނުގެ ފޮރިން މިނިސްޓަރ އދ ގެ ސެކެޓްރީ ޖެނެރަލް އަދި އދ ގެ ސެކިޔުރިޓީ ކައުންސިލުގެ ރައީސް އަށް އެޑްރެސްކޮށްފައިވާ ސިޓީގައި ވިދާޅުވެފައިވާކަމަށް އައިއާރުއައިބީ ނިއުސް އެޖެންސީން ރިޕޯޓްކޮށްފައިވަނީ އެމެރިކާ އާއި އިސްރާއީލުން އިރާނަށް ދިން ހަމަލާގެ ބަދަލުގައި ހަމަލާދިނުމުގެ ހައްގު އިރާނަށް ލިބިގެންވާކަމަށެވެ. އެމެރިކާ އާއި އިސްރާއީލުން ދެމުންދާ ހަމަލާތައް އެއްވެސް ޝަރުތެއް ނެތި އެއްކޮށް ހުއްޓާލަންދެން އިރާނަށް އެހައްގުގެ ބޭނުންކުރެވޭނެކަމަށް އަރަގްޗީ ވިދާޅުވެފައިވެއެވެ.
އިސްރާއީލާއި އެމެރިކާއިން މިއަދު އިރާނަށް ވައިގެ މަގުން ދިން ހަމަލާތަކަކީ އދ ގެ ޗާޓަރ ގެ އަރޓިކަލް 2 ގެ ޕެރެގްރާފް 4 ގައި ބަޔާންކޮށްފައިވާ ކަންކަމާ ޚިލާފަށް ބައިނަލްއަގްވާމީ ގާނޫނުތަކާ ޚިލާފަށް ދީފައިވާ ހަމަލާތަކެއްކަމަށް އަރަގްޗީ ވިދާޅުވިއެވެ. މިހަމަލާތަކުގެ ބަދަލުގައި އިރާނުން ދެމުންދާ ހަމަލާތަކަކީ އދ ގެ ޗާޓަރުގެ އަރޓިކަލް 51 ން އިރާނަށް ލިބިދޭ ގާނޫނީ ހައްގެއްކަމަށާއި އިރާނަށް އަމިއްލަ ދިފާއުގައި ހަމަލާދިނުމުގެ ހައްގު ލިބޭކަމަށް ވިދާޅުވިއެވެ.
އިރާނުގެ އަސްކަރިއްޔާއަށް ލިބިފައިވާ ހުރިހާ ބާރެއްގެ ބޭނުން އެމެރިކާ އާއި އިސްރާއީލާ ދެކޮޅަށް ކުރާނެކަމަށްވެސް އަރަގްޗީ ވިދާޅުވިއެވެ. އަދި އިރާނަށް ލިބިދީފައިވާ ހައްގުގެ ތެރޭގައި ސަރަހައްދުގައި ހުރި އެމެރިކާ އާއި އިސްރާއީލުގެ ކޮންމެ ތަނަކީ އަދި އަސްކަރީ ކޮންމެ މީހަކީ ޓާގެޓެއްކަމަށް ވިދާޅުވިއެވެ. އެމެރިކާ އާއި އިސްރާއީލުން އިރާނަށް ދެމުންދާ ހަމަލާތައް އެއްވެސް ޝަރުތެއް ނެތި ހުއްޓާލަންދެން އެތަންތަނަށް އިރާނުން ހަމަލާދެމުންދާނެކަމަށްވެސް އަރަގްޗީ ވިދާޅުވިއެވެ.
އިރާނުން އަންނަނީ މެދުއިރުމަތީގައި ހުރި އެމެރިކާގެ އަސްކަރީ ބޭސްތަކަށް ހަމަލާދެމުންނެވެ. އެގޮތުން ކުވައިތު، ގަތަރު، ޔޫއޭއީ، ބަހްރެއިން ، ސައުދީ އަރަބިއްޔާ ގައި ހުރި އަސްކަރީ ބޭސްތަކަށް އިރާނުން އަންނަނީ ހަމަލާދެމުންނެވެ. މީގެއިތުރުން ސީދާ އިސްރާއީލަށް އަމާޒުކޮށްވެސް އިރާނުން އަންނަނީ ހަމަލާދެމުންނެވެ.
މެދުއިރުމަތީގައި އެމެރިކާގެ އަސްކަރީ 19 ބޭހެއް ހުންނައިރު އެމެރިކާ ސިފައިންގެ އަދަދު 40،000ށް ވުރެ މައްޗެވެ.