އެމެރިކާ އާއި އިސްރާއީލު ގުޅިގެން އިރާނަށް ދިން ހަމަލާގެ ބަދަލެއްގެ ގޮތުން މެދުއިރުމަތީގައި ހުރި އެމެރިކާގެ ގިނަ ބޭސްތަކަކަށް އިރާނުން ހަމަލާދިނުމާއި ގުޅިގެން އެސަރަހައްދުން ރާއްޖެ އަންނަ ހުރިހާ ފްލައިޓެއް ކެންސަލްވެއްޖެއެވެ.

އިރާނުން މެދު އިރުމަތީގެ ގައުމުތަކަށް ހަމަލާދިނުމާއި އިސްރާއީލާއި އެމެރިކާއިން އިރާނަށް ހަމަލާދިނުމާއި ގުޅިގެން މެދުއިރުމަތީގެ ވައިގެ ސަރަހައްދު ވަނީ ބަންދުކޮށްފައެވެ. އެއާއެކު އެސަރަހައްދުން ދަތުރުކުރާ ފްލައިޓްތައް ވަނީ ކެންސަލްކޮށްފައެވެ.

ހަމަލާތަކާއި ގުޅިގެން ދުބާއީ އާއި ޝަރްޖާ އާއި ބަހްރެއިން، އަބޫދާބީ އާއި ދޯހާއަށް ކުރާ ހުރިހާ ދަތުރެއް ވަނީ ހުއްޓިފަ އެވެ.ރާއްޖެ އަށް ޔޫރަޕުންނާއި އެހެން ސަރަހައްދުތަކުން އަންނަ ޓޫރިސްޓުން އެންމެ ގިނައިން ޓްރާންސިޓްވާ މަންޒިލަކީ ދުބާއީ އާއި ދޯހާ އެވެ. އެހެންކަމުން ވައިގެ ސަރަހައްދު ބަންދުވުމާ ގުޅިގެން ރާއްޖެ އަށް ޓޫރިސްޓުން ވެސް އެ ސަރަހައްދުތަކުން އެއްކޮށް ހުއްޓޭނެއެވެ.

ޤަތަރު އެއާވޭސްއިން އެކްސްގައި ކުރި ޕޯސްޓެއްގައި ވަނީ ވަގުތީ ގޮތުން ދަތުރުތައް މެދުކަނޑާލައިފައިވާ ކަމަށް ބުނެފައެވެ. އަދި އެމިރޭޓްސްއިން ވަނީ، ދުބާއީއާ ދެމެދު ކުރާ ދަތުރުތައް ކެންސަލްކޮށްފައިވާ ކަމަށް ބުނެފައެވެ.

ފްލައިޓްތައް ކެންސަލްވުމާއި ގުޅިގެން ވެލާނާ އިންޓަރނޭޝަނަލް އެއަރޕޯޓްވެސް ވަނީ ވަރަށް ބޮޑަށް ތޮށްޖެހިފައެވެ.

ވީއައިއޭގެ މަންޒަރުތަކުން ފެންނަ ގޮތުގައި، އަލަށް ހުޅުވި އިންޓަނޭޝަނަލް ޓާމިނަލް ވަނީ ފަތުރުވެރިންނާއި ދަތުރުވެރިންނާއެކު ފުރި ބާރުވެފައެވެ. މިކަމާ ގުޅޭގޮތުން އިނާ މޯލްޑިވްސްގެ ވެރިޔާ މުޙައްމަދު ފިރާގު ފޭސްބުކްގައި ހިއްސާކުރެއްވި ވީޑިއޯއަކާއެކު ވިދާޅުވީ 2000 އަށްވުރެ ގިނަ ފަތުރުވެރިން މިވަގުތު އެއާޕޯޓުގައި ތިބި ކަމަށް ބެލެވޭ ކަމަށެވެ. އަދި އެ މީހުންނަށް ބޭނުންވާ އިތުރު އެހީތެރިކަމާއި އިންތިޒާމުތައް ވަގުތުން ހަމަޖައްސައިދޭން ޖެހޭނެ ކަމަށް ވެސް އޭނާ ފާހަގަކުރެއްވިއެވެ.

އަނެއްކޮޅުން މެދުއިރުމަތީގެ ސަރަހައްދުތަކުގެ ވައިގެ ބަނދަރުތައް ބަންދުކޮށްފައިވާތީ ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލުން ހާއްސަ އެޑްވައިޒަރީއެއް މިއަދު ނެރެފައެވެ.

އެމްއޭސީއެލުން ނެރުނު ޓްރެވެލް އެޑްވައިޒަރީގައި ވަނީ މެދުއިރުމަތީގެ ގައުމުތަކަށް ދަތުރުކުރާ މީހުން ސަމާލުވާން އަންގާފައެވެ.

އަދި ރާއްޖޭގެ ފޮރިން މިނިސްޓްރީންވެސް ވަނީ މެދުއިރުމަތީގައި ދިރިއުޅޭ އަދި އެސަރަހައްދަށް ދަތުރުކުރާ ދިވެހިން ސަމާލުވާން އިލްތިމާސްކޮށްފައެވެ.