އިސްރާއީލުން އީރާނުގެ އަންހެން ކުދިންގެ ޕްރައިމަރީ ސްކޫލަކަށް ދިން ހަމަލާއެއްގައި 40 ކުދިން މަރުވެއްޖެއެވެ.
އިސްރާއީލާއި އެމެރިކާ އެކުވެގެން އީރާނަށް ބޮމުގެ ހަމާލަތައް ދޭން ފަށާފައިވަނީ މިއަދު ހެނދުނުއެވެ.
މިކަން ހާމަކޮށް އިސްރާއީލްގެ ޑިފެންސް މިނިސްޓަރު ބުނީ އެއީ އެ ގައުމުގެ ސަލާމަތަށްޓަކައި ދޭން ފެށި ހަމަލާތަކެއް ކަމަށެވެ.
އީރާނުގެ ދައުލަތުގެ މީޑިއާ އިރްނާއިން ބުނީ އީރާނުގެ ދެކުނުގެ ސިޓީއެއް ކަމަށްވާ މިނާބްގައި ހުންނަ އަންހެން ކުދިންގެ ޕްރައިމަރީ ސްކޫލަކަށް އިސްރާއީލުން ދިން ހަމަލާގައި މަރުވި ކުދިންގެ އަދަދު 40 އަރާފައިވާ ކަމަށެވެ.
އިސްރާއީލާ އެމެރިކާ އެކުވެގެން އީރާނަށް ދޭން ފެށި ހަމަލާތަކާއި ގުޅިގެން އީރާނުން ވެސް ވަނީ އިސްރާއީލާއި އެމެރިކާއަށް ރައްދު ހަމަލާތައް ދީފައެވެ.
އެގޮތުން ސީދާ އިސްރާއީލަށާއި މެދުއިރުމަތީގެ ބައެއް ގައުމުތަކުގައި ހުންނަ އެމެރިކާގެ އަސްކަރީ މަރުކަޒުތަކަށް އީރާނުން ވަނީ ހަމަލާތައް ދީފައެވެ.
މިދިޔަ އަހަރުގެ ޖޫން މަހު ވެސް އިޒްރޭލުން އީރާނަށް ހަމަލާ ދިނުމާ އެކު ހަނގުރާމަ ފެށުނެވެ. އެފަހަރު 12 ދުވަސް ވަންދެން އިސްރާއީލާއި އީރާނުން މިސައިލާއި ޑްރޯނުން ހަމަލާ ބަދަލުކޮށްފައި ވާއިރު އެމެރިކާއިންވެސް އީރާނަށް ހަމަލާދީފައި ވެއެވެ.