ތ. ވިލުފުށި އެއާޕޯޓަށް ބޭނުންވާ ބިން ހިއްކުމުގެ %98 މަސައްކަތް ނިމިފައިވާ ކަމަށް އެ މަސައްކަތުގެ ކޮންޓްރެކްޓަރު މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
އެމްއޭސީއެލުން ބުނީ ވިލުފުށި ބިންހިއްކުމުގެ މަސައްކަތް މިހާރު ނިމުމަކާ ހަމަޔަށް އައިސްފައިވާ ކަމަށެވެ.
މިގޮތުން އަންނަ ހަފްތާގެ ތެރޭގައި ބިން ހިއްކުމުގެ މަސައްކަތް މުޅިން ނިންމާލެވޭނޭކަމަށް އެމްއޭސީއެލް އިން ވަނީ ބުނެފައެވެ.
އެމްއޭސީއެލް އިން ބުނީ އެ މަޝްރޫޢުގެ ދަށުން މިހާރު 79 ހެކްޓަރުގެ ބިން މިހާރު ވަނީ ހިއްކާ ނިމިފައި ކަމަށެވެ. އަދި އެ މަސައްކަތުގެ %98 ފުރިހަމަ ކުރެވިފައިވާކަމަށްވެސް އެމްއޭސީއެލް އިން ހާމަކުރެއެވެ.
މި މަޝްރޫޢުގެ ދަށުން ޖުމުލަ 81 ހެކްޓަރުގެ ބިން ހިއްކާނެއެވެ.
ވިލުފުށީ އެއަރޕޯޓަށް ބޭނުންވާ ބިން ހިއްކުމުގެ މަސައްކަތް ކުރަނީ ކެޕޭސީޓީގައި 11،300 ކިއުބިކް މީޓަރ ހުރި ފިލިއްޕޯ ބްރޫނެލްޝީ ނަމަކަށް ކިޔާ ޑްރެޖަރެއް ބޭނުންކޮށްގެންނެވެ.
ވިލުފުށީ އެއަރޕޯޓަކީ 1800 މީޓަރުގެ ރަންވޭއަކާއެކު ތަރައްޤީކުރާ އެއަރޕޯޓެކެވެ. މި މަޝްރޫޢުގެ މަސައްކަތް 2 އަހަރާއި 6 މަސް ދުވަހުގެ ތެރޭގައި ނިންމާއިރު މަޝްރޫޢުގެ ދަށުން ރަންވޭއާއި ޓަމިނަލް ބިލްޑިން ފަޔަރ ބިލްޑިން އަދި އެނޫންވެސް އެއަރޕޯޓަކަށް ބޭނުންވާ ހުރިހާ ވަސީލަތެއް ފުރިހަމަކުރާނެއެވެ.
ތ. ވިލުފުށީ ބިން ހިއްކުމުގެ މަޝްރޫޢު އިފްތިތާޙުކޮށްފަވަނީ މިދިޔަ އަހަރު ސެޕްޓެމްބަރު މަހު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށް ކުރެއްވި ދަތުރުފުޅުގެ ތެރެއިންނެވެ. އަދި ޑްރެޖަރު ގެންގޮސް، ބިން ހިއްކުމުގެ މަސައްކަތް ފެށީ ނޮވެންބަރު 14 ވަނަ ދުވަހުއެވެ.