އެފޯޑަބަލް ހައުސިން މަޝްރޫޢުގެ އެންމެ ބޮޑު ބޭނުމަކީ އަލަށް ގެއެއް ގަންނަން ބޭނުންވާ ފަރާތްތަކަށް ހެޔޮ އަގެއްގައި ގެއެއް ގަނެވޭނެ މަގު ފަހިކޮށްދީ އާއިލީ ބޯހިޔާވަހިކަމަށް އިސްކަން ދިނުން ކަމަށް ހައުސިންގް އެންޑް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްޠަލިބު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
މުއްޠަލިބު ވިދާޅުވީ، ގިނަ އަހަރުތަކެއް ވަންދެން ސަރުކާރުގެ ބޯހިޔާވަހިކަމުގެ މަސައްކަތްތައް މައިގަނޑު ގޮތެއްގައި ބިނާވެފައި އޮތީ ދެ މޮޑެލްއެއްގެ މައްޗަށް ކަމަށެވެ. އެއީ ލޯނު ނަގައިގެން ސޯޝަލް ހައުސިންގ އިމާރާތްކުރުމާއި، އެޗްޑީސީ މެދުވެރިކޮށް ރިއަލް އެސްޓޭޓް އުސޫލުން ހިންގާ މަޝްރޫޢުތަކެވެ. މީގެ ތެރެއިން ރިއަލް އެސްޓޭޓް މަޝްރޫޢުތަކުގައި ވަކި އަދަދެއްގެ ޔުނިޓްތައް ވިއްކާފައިވަނީ ކޮންޓްރޯލް ކުރެވިފައިވާ އަގުތަކެއްގައެވެ.
މުއްޠަލިބު ވިދާޅުވީ، "ބޯހިޔާވަހިކަން އެންމެނަށް" ސިޔާސަތުގެ ދަށުން، އަލަށް ގެދޮރު ގަންނަ ފަރާތްތަކަށް އެ ފުރުސަތު ފަހިކޮށްދިނުމަށް ހާއްސަ އިސްކަމެއް ދެއްވަނީ މިފަދަ ސަބަބުތަކާހުރެ ކަމަށެވެ. އަދި މި އިސްނެގުމުގެ ދަށުން، ގެދޮރުވެރިކަމާއި ބެހޭ ވުޒާރާއިން ދާދިފަހުން ހުޅުމާލެ ފޭސް 3 ގައި ޕަބްލިކް-ޕްރައިވެޓް ޕާޓްނަރޝިޕް މޮޑެލްގެ ދަށުން 1,000 "އެފޯޑަބަލް ހޯމް އޯނަރޝިޕް" ޔުނިޓް އަޅައިދޭނެ ބަޔަކު ހޯދުމަށް އިޢުލާނުކޮށްފައިވާނެ ކަމަށް މިނިސްޓަރު ވިދާޅުވިއެވެ.
މިނިސްޓަރުގެ ޕޯސްޓުގައި އަލަށް ގެދޮރު ގަންނަ ފަރާތްތަކަށް އަމާޒުކޮށްގެން ފަރުމާކުރެވިފައިވާ މި ޕްރޮގްރާމްގެ މައިގަނޑު މަޤްޞަދަށްވެސް ވަނީ އަލިއަޅުއްވާލައްވާފައެވެ.