އަންނަ މާރިޗު މަހު މުޅި ރާއްޖޭގައިވެސް ފިނިހޫނުމިން އެންމެ މައްޗަށް ދާނެ މިންވަރާއި، ދަށަށް ދާނެ މިންވަރުވެސް، އާންމު މިންވަރަށްވުރެ ކުޑަތަންކޮޅެއް މަތިވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ބުނެފިއެވެ.
މެޓް އޮފީހުން މިއަދު ކުރި ޕޯސްޓެއްގައި ވަނީ އަންނަ މަހު ރާއްޖެއަށް ވާރޭ ވެހޭނެވަރާއި ފިނިހޫނުމިން ހުންނާނެ ކަމަށް ލަފާކުރެވޭ މިންވަރު ދައްކުވައިދޭ ޗާޓެއް އާންމުކޮށްފައެވެ. މެޓުން އާންމުކުރި މޫސުމާ ބެހޭ ޗާޓުގައި ބުނީ މި ފެށޭ މާޗު މަހު ރާއްޖޭގެ އުތުރުގެ އަތޮޅުތަކަށް ވާރޭވެހޭނެ ކަމަށް ލަފާކުރެވެނީ އާންމުކޮށް ވާރޭވެހޭ މިންވަރަށް ނުވަތަ އެއަށްވުރެމަދުން ކަމަށެވެ.
ނަމަވެސް މެދު ރާއްޖެތެރެއާއި ދެކުނުގެ އަތޮޅުތަކަށް ވާރެވެހޭނެ ކަމަށް ބެލެވެނީ އާންމުކޮށް ވާރެވެހޭ މިންވަރަށް ވުރެއް މަދުން ކަމަށެވެ.
މީގެ އިތުރުން ފިނިހޫނުމިނަށް ބަލާއިރު، މާރިޗު މަހު މުޅި ރާއްޖޭގައިވެސް ފިނިހޫނުމިން އެންމެ މައްޗަށް ދާނެ މިންވަރާއި ދަށަށް ދާނެ މިންވަރުވެސް، އާންމު މިންވަރަށްވުރެ ކުޑަތަންކޮޅެއް މަތިވާނެ ކަމަށް ލަފާ ކުރެވޭ ކަމަށް މެޓުން ވަނީ ބުނެފައެވެ. މެޓުން އާންމު ކުރި އެ ޕޯސްޓުގައި އަންނަ މަހު މުޅި ރާއްޖެއަށް ވިއްސާރަ އާއި ހޫނުމިން ހުންނާނެ ގޮތް ވަނީ ލަފާކޮށްއެވެ.
މެޓް އިން އާންމުކުރި އެ ޕޯސްޓުގައި ވިއްސާރައިގެ މެޕްގައި ފެހި ޝޭޑްތައް ރަމްޒުކޮށްދެނީ އާދައިގެ ހާލަތަށްވުރެ މަތި ކަމަށެވެ.
އަދި އަޅި ކުލައިގެ ޝޭޑްތަކުން އާދައިގެ ހާލަތްތައް ރަމްޒުކޮށްދޭ އިރު، އޮރެންޖް ޝޭޑްތައް ރަމްޒުކޮށްދެނީ އާދައިގެ ހާލަތަށްވުރެ ދަށް ކަމަށެވެ.
ހަމައެހެންމެ ޓެމްޕަރޭޗާ މެޕްގައި ރަތް ޝޭޑްތަކުން އާދައިގެ ފިނިހޫނުމިނަށްވުރެ މަތީގައި ހުންނަ މިންވަރު ދައްކައިދެއެވެ. މީގެ އިތުރުން އަޅި ކުލައިގެ ޝޭޑްތަކުން އާދައިގެ ފިނިހޫނުމިން އަންގައިދެއެވެ.
އަދި ނޫ ޝޭޑްތަކުން އަންގައިދެނީ އާދައިގެ ފިނިހޫނުމިނަށް ވުރެ ދަށް މިންވަރެކެވެ.