ހުޅުމާލެ ހޮސްޕިޓަލުގެ މެޑިކަލް އަދި ޕީޑިއެޓްރިކް ވޯޑަށް ޖާގަ އިތުރުކުރުމުގެ އަމަލީ މަސައްކަތް އަންނަ ހަފްތާ ތެރޭ ފެށުމަށް ހަމަޖައްސައިފި އެވެ.
ހުޅުމާލެ ހޮސްޕިޓަލުގެ ޖާގަ އިތުރުކުރުމުގެ މަސައްކަތް ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އަށެވެ. އާރްޑީސީގެ އަމާޒަކީ މި މަސައްކަތް 90 ދުވަހުގެ ތެރޭ ނިންމާލުންކަމަށް މައުލޫމާތު ދީފައިވެ އެވެ.
ހުޅުމާލެ ހޮސްޕިޓަލުގެ މެޑިކަލް އަދި ޕީޑިއެޓްރިކް ވޯޑަށް ޖާގަ އިތުރުކުރުމުގެ މަސައްކަތް ހަވާލުކުރުމަށް ހުޅުމާލޭ ހޮސްޕިޓަލްގައި ބޭއްވި ރަސްމިއްޔާތެއްގައި މިކަމުގެ އެއްބަސްވުމުގައި ސޮއިކުރެއްވީ މާލެ ގްރޫޕް އޮފް ހޮސްޕިޓަލްސްގެ ސީއީއޯ ޢަބްދުއްރައްޒާގު ހަލީމެވެ. އާރްޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އިބްރާހީމް ނަޒީމެވެ.
ހުޅުމާލެ ހޮސްޕިޓަލަށް ޖާގަ އިތުރުކުރުމުން އެ ހޮސްޕިޓަލަށް 28 އެނދު އިތުރުކުރެވޭނެއެވެ. މީގެ ތެރެއިން 4 އެނދު މެޑިކަލް ހައި ޑިޕެންޑެންސީ ޔުނިޓު (އެޗްޑީޔޫ)އަށް އިތުރުކުރުމަށް ވަނީ ހަމަޖެހިފަ އެވެ. އަދި ޖެނެރަލް ވޯޑަށް 15 އެނދާއި ކުޑަކުދިންގެ ވޯޑަށް 9 އެނދު އިތުރުކުރުމަށް ވަނީ ހަމަޖައްސާފަ އެވެ.
އެހެންކަމުން މިމަސައްކަތް ނިމޭއިރު ކުޑަކުދިންގެ ވޯޑުގައި ޖުމްލަ 15 އެނދު އަދި ޖެނެރަލް ވޯޑުގައި 27 އެނދު ހުންނާނެ ކަމަށް އެ ހޮސްޕިޓަލުން މައުލޫމާތު ދެ އެވެ.