ޒޯން 4 ގައި ރާއްޖެ ޓްރާންޕޯޓް ލިންކް، އާރްޓީއެލް ފެރީގެ ހިދުމަތް ރަސްމީކޮށް ފަށަން ހަމަޖެހިފައިވާކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އިން ބުނެފިއެވެ.
ޓްރާންސްޕޯޓް މިނިސްޓްރީ އިން އާންމުކޮށްފައިވާ ބަޔާނެއްގައި ބުނީ އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް (އައިއެންޕީއެފްއެން) ގެ ދަށުން، ޒޯން 4 ގައި ހިމެނޭ ފ. އަތޮޅާއި ދ. އަތޮޅުގައި އާރްޓީއެލް ފެރީގެ ހިދުމަތް، 17 ފެބްރުއަރީ ގައި ފެށުމަށް ހަމަޖެހިފައިވާކަމަށެވެ.
އެގޮތުން އެ ހިދުމަތް ފ. އަތޮޅާއި ދ. އަތޮޅުގައި ފެށުމުގެ ގޮތުން ފުރަތަމަ ހަފްތާގައި ކުރިއަށް ގެންދާނީ އެހިދުމަތައް އެ ދެއަތޮޅުގެ ރައްޔިތުން އަހުލުވެރިވުމުގެ ފުރުސަތު ދިނުމުގެ ގޮތުން ކުރާ ހިލޭ ދަތުރުތައް ކަމަށް ޓްރާންސްޕޯޓް މިނިސްޓްރީ އިން މައުލޫމާތުދެއެވެ.
ޓްރާންސްޕޯޓް މިނިސްޓްރީ އިން ބުނީ އަހުލުވެރި ކުރުވުމުގެ ދަތުރުތަކަށް ފަހު، ފެބްރުއަރީ 25 ވާ ބުދަ ދުވަހުން ފެށިގެން، އާރްޓީއެލްގެ ވެބްސައިޓާއި، މޯބައިލް އެޕްލިކޭޝަން މެދުވެރިކޮށް ފަސޭހަކަމާއެކު ޓިކެޓް ލިބޭނެ ގޮތުގެ އިންތިޒާމު ޖަމަޖައްސާފައިވާކަމަށެވެ.
އެ ޕްރޮޖެކްޓުގެ ދަށުން ޒޯން 4 ގައި ހިމެނޭ ތ. އަތޮޅުގައި މިހާރުވެސް މި ހިދުމަތް ފޯރުކޮށްދެމުން ދާކަން ފާހަގަކޮށް ޓްރާންސްޕޯޓް މިނިސްޓްރީ އިން ބުނީ ފ. އަތޮޅާއި ދ. އަތޮޅުގައި މި ހިދުމަތް ފެށުމާއެކު، ރާއްޖޭގެ 14 އަތޮޅަކަށް އާރްޓީއެލް ފެރީގެ ހިދުމަތް ފުޅާވެގެންދާނެ ކަމަށެވެ.
އާރްޓީއެލް ގެ ހިދުމަތް ފޯރުކޮށްދިނުމަށް ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއެވެ. އެ މަޝްރޫއު އަކީ މުޅި ރާއްޖެ ތިން ފޭސް އަކަށް ބަހާލައިގެން 6 ޒޯން އަކަށް ރާއްޖޭގެ އަތޮޅުތައް ބަހާލައިގެން ކުރިއަށް ގެންދާ ގައުމީ ދަތުރުފަތުރުގެ މަޝްރޫއެކެވެ.
ޓްރާންސްޕޯޓް މިނިސްޓްރީ އިން ބުނީ އެ މަޝްރޫއުގެ މައިގަނޑު މަގްސަދަކީ ރައްޔިތުންނަށް ލުއިފަސޭހަ ކަމާއެކު ކުޑަ އަގެއްގައި ކަނޑުމަގުން ދަތުރުފަތުރު ކުރެވޭނެގޮތް މަގުފަހި ކުރުމާއި އިގްތިސާދީ އަދި އިޖްތިމާއީ ގޮތުންވެސް ފައިދާހުރި ނިޒާމެއް ގާއިމްކުރުން ކަމަށެވެ.