ކުރުނބާ ރިސޯޓް ބޭރުގައި އޮތް ކަންނެލި ދޯންޏެއްގައި މިއަދު ހިނގި އަލިފާނުގެ ހާދިސާގައި ފިހުނު ފަސް މީހަކަށް މާލެ ގެނެސް ފަރުވާދޭން ފަށައިފިއެވެ.
ފުލުހުން މިއަދު ބުނީ ކުރުނބާ މޯލްޑިވްސް ކައިރި އަޅާފައި އޮތް މަސްދޯންޏެގައި އަލިފާނުގެ ހާދިސާއެއް ހިނގަގެއިން އުޅޭ ކަމުގެ މައުލޫމާތު މިއަދު މެންދުރު 14:54 އެހާކަންހާ އިރު ފުލުހުންނަށް ލިބިފައިވާ ކަމަށެވެ.
އަދި އެ ހާދިސާ ހިނގި އިރު ދޯނީގައި 15 މީހުން ތިބި ކަމަށާއި އެ ހާދިސާ ގައި އަނިޔާވި މީހުން މާލެ ގެނައުމައްޓަކައި ކުރުނބާ މޯލްޑިވިސް ރިސޯޓުގެ އުޅަނދެއްގައި ދަތުރު ކުރަމުން ދާކަމަށެވެ.
އެގޮތުން މިކަމާއި ގުޅިގެން ފުލުހުން ބުނީ މި ހާދިސާގައި ފަސް މީހަކު ފިހިގެން މާލެ ގެނެސް ފަރުވާ ދެމުންދާ ކަމަށެވެ.
އަދި އެ މީހުންގެ ތެރޭގައި ހިމެނެނީ ދެ ދިވެހިންނާއި 3 ބިދޭސީން ކަމަށް ފުލުުހުން ވަނީ ބުނެފައެވެ.
ސޯޝަލް މީޑިއާގައި އާންމުވެފައިވާ ވީޑިއޯ އަދި ފޮޓޯތަކުން ފެންނަ ގޮތުގައި އެ ދޯނީގައި ވަނީ ވަރަށް ބޮޑަށް އަލިފާން ރޯވެފައެވެ. އެ ގޮތުން، އެ ދޯނީގެ ފަހަތުކޮޅުގައި އެއްކޮށްހެން ވަނީ ހުޅު ހިފާފައެވެ.