އީރާނުގެ އިސްތިގުލާލު ދިފާއު ކުރުމުގައި ރަޝިޔާއިން ވާގިވެރިވާނެ ކަމަށް ރަޝިޔާގެ ރައީސް ވްލަޑިމިއާ ޕުޓިން ވިދާޅުވެއްޖެއެވެ.
ޕޫޓިން މިހެން ވިދާޅުވީ އީރާނުގެ ރައީސް މަސްއޫދު ޕެޒެޝްކިއަންއަށް ފޮނުއްވި ތަހުނިޔާގެ މެސެޖެއްގައެވެ.
ރައީސް ޕޫޓިން އެ މެސެޖު ފޮނުއްވީ އީރާނުގެ އިންޤިލާބަށް ލިބުނު ކާމިޔާބީއަށް 47 އަހަރު ފުރުމުގެ މުނާސަބަތުގައެވެ.
ޕޫޓިންގެ މެސެޖުގަައި ވިދާޅުވީ ދެ ގައުމުގެ ދެމެދުގައި އޮންނަ ގުޅުމަކީ ބަދަހި އެކުވެރި ގުޅުމެއް ކަމަށެވެ.
ރަޝިޔާއިން އީރާނުގެ އިސްތިގުލާލާއި ޝަރުއީ މަސްލަހަތު ހިމާޔަތްކުރުމުގެ އިތުރުން މިހާރު އޮތް ބައިނަލްއަގްވާމީ ހާލަތުގައި އެ ގައުމުގެ ސަލާމަތީ ކަންކަން ކަށަވަރުކުރުމަށް ކުރާ މަސައްކަތަށް ތާއީދުކުރާނެ ކަމަށް ޕޫޓިންގެ މެސެޖުގައި ވަނީ ވިދާޅުފައެވެ.
މޮސްކޯ އާއި ތެހެރާނާ ދެމެދު އޮންނަ ފުރިހަމަ ސްޓްރެޓެޖިކް އެއްބާރުލުން ހަރުދަނާ ކުރާނެ ކަމުގެ ޔަގީންކަން ޕޫޓިން ވަނީ ދެއްވާފައެވެ.
ޕޫޓިންގެ މެސެޖު ނިންމަވާލައްވާފައި ވަނީ އީރާނުގެ ރައީސަށް ހެޔޮ ސިއްހަތާއި ކާމިޔާބީއާއި އީރާނުގެ ހުރިހާ ރައްޔިތުންނަށް އުފަލާއި ފާގަތިކަމަށް އެދިވަޑައިގަންނަވަމުންނެވެ.