ރޯދަމަހަށް 400ރ. އަށް ވުރެ ބޮޑުނުވާ ގޮތަށް ބިލް ހަދަން ރީޑިން ނެގުމުގެ މަސައްކަތް މި ހަފްތާގައި ފަށާނެކަމަށް ސްޓެލްކޯ އިން މިއަދު ބުނެފިއެވެ.
ސްޓެލްކޯ އިން މިކަން ހާމަކޮށްފަައި ވަނީ އެކްސްގައި ކުރި ޕޯސްޓެއްގައެވެ.
ސްޓެލްކޯ އިން ކުރި ޕޯސްޓުގައި ބުނީ ރަމަޟާން މަހުގެ ކަރަންޓު ބިލު 400 ރުފިޔާއަށްވުރެ ބޮޑު ނުވާނެހެން ޑިސްކައުންޓް ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާތީ، ރަމަޟާން މަހަށް ވަކި ބިލެއް ތައްޔާރުކުރުމަށް ރީޑިންގ ނެގުމުގެ މަސައްކަތް މި މަހުގެ 16 އަދި 17 ވަނަ ދުވަހު ކުރިއަށްދާނެ ކަމަށެވެ.
އެގޮތުން މިކަމުގައި ހުރިހާ ކަސްޓަމަރުން ވެސް އެއްބާރުލުން ދިނުމަށް ސްޓެލްކޯ އިން ވަނީ އެދިފައެވެ.
މާލޭގެ އާޓިފިޝަލް ބީޗު ސަރަހައްދުގައި މިދިޔަ އަހަރުގެ ނޮވެންބަރު މަހުގެ 14 ވަނަ ދުވަހުގެރޭ ޕީއެންސީން ބޭއްވި ބޮޑު ޖަލްސާގައި ރައީސް ޑރ. މުހައްމަދު މުޢިއްޒު ވަނީ ރޯދަމަހު ކޮންމެ ޑޮމެސްޓިކް ބިލަކަށް ނަގާނީ ގިނަވެގެން 400ރ. ކަމަށް ވިދާޅުވެފައެވެ.