"މޯލްޑިވްސް ސްޕޯޓްސް އެވޯޑްސް 2025" އާދިއްތަ ދުވަހުގެ ރޭ ބާއްވަން ނިންމައިފިއެވެ.
މިކަންހާމަކުރައްވާފައި ވަނީ ސްޕޯޓްސް މިނިސްޓަރު އަބްދުﷲ ރާފިއު މިއަދު އެކްސްގައި ކުރެއްވި ޕޯސްޓެއްގައެވެ.
މިނިސްޓަރު ރާފިއު ކުރެއްވި ޕޯސްޓެއްގައި ވިދާޅުވީ މޯލްޑިވްސް ސްޕޯޓްސް އެވޯޑްސް 2025" ގެ ނަމުގައި އާދިއްތަ ދުވަހުގެ ރޭ ބާއްވާ އެވޯޑް ހަފްލާއަކީ 2024 ވަނަ އަހަރުގެ ކާމިޔާބީތައް ފާހަގަކުރުމަށް ބާއްވާ އެވޯޑް ހަފްލާއެއް ކަމަށެވެ.
މި ހަފްލާ 2025ގައި ކުރިން ބާއްވަން ހަމަޖެހިފައި އޮތް ނަމަވެސް އެކި ސަބަބުތަކާއިހުރެ މިއަހަރަށް އޮތީ ފަސްކުރެވިފައި ކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ އާދިއްތަދުވަހުގެރޭ "މޯލްޑިވްސް ސްޕޯޓްސް އެވޯޑްސް 2025" ބޭއްވި ނަމަވެސް 2025 ވަނަ އަހަރުގެ ކާމިޔާބީތައް ފާހަގަކުރާ އެވޯޑު ހަފުލާ، "މޯލްޑިވްސް ސްޕޯޓްސް އެވޯޑްސް 2026" މި އަހަރުގެ ފަހުކޮޅު އޮންނާނެ ކަމަށެވެ.
ކުޅިވަރުގެ ދާއިރާގައި 2024 ވަނަ އަހަރު އެންމެ ފާހަގަ ކުރެވޭ އެތުލީޓުންނާއި އެހެނިހެން މަގާމުތަކަށް ވާދަކުރާ ނޮމިނޭޝަންސްތައް މިނިސްޓްރީން އަންނަނީ ސޯޝަލް މީޑިއާގައި ހިއްސާކުރަމުންނެވެ.