ފިއްލަދޫ ސިއްހީ މަރުކަޒު އަޕްގްރޭޑް ކުރުމުގެ މަޝްރޫއުގެ ބިންގާ އަޅައިފި

ހއ. ފިއްލަދޫ ޞިއްޙީ މަރުކަޒު އަޕްގްރޭޑް ކުރުމުގެ މަޝްރޫޢުގެ ބިންގާ ރަސްމީކޮށް އަޅައިފިއެވެ.

ފިއްލަދޫގައި އިއްޔެ ބޭއްވި ޚާޢްޞަ ރަސްމިއްޔާތެއްގައި މި މަޝްރޫޢުގެ ބިންގާ އަޅުއްވައިދެއްވީ، ރައްޔިތުންގެ މަޖިލީހުގެ ކެލާ ދާއިރާގެ މެމްބަރު ޢަބްދުﷲ ޝަރީފެވެ. މި ރަސްމިއްޔާތުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިންގ ޑިރެކްޓަރ އިބްރާހީމް ނަޡީމާއި، ހެލްތު ސަރވިސްގެ ސީނިއަރ އެޑްމިނިސްޓްރޭޓަރ މުޙައްމަދު ޖަމީލް ބައިވެރިވެ ވަޑައިގެންނެވިއެވެ. މީގެ އިތުރުން ފިއްލަދޫ ކައުންސިލްގެ ރައީސް ފަތުޙުﷲ ޙަސަންއާއި ކައުންސިލް މެމްބަރު މުޙައްމަދު މޫސާވެސް މި ރަސްމިއްޔާތުގައި ބައިވެރިވެ ވަޑައިގެންނެވިއެވެ.

މި ރަސްމިއްޔާތުގައި ވާހަކަ ދައްކަވަމުން މެމްބަރު ޝަރީފް ވިދާޅުވީ ފިއްލަދޫގެ ރައްޔިތުންނަށްް ބޭޭނުންވާ ހިދުމަތްތައް ފޯރުކޮށްދިނުމުގައި ލަސް ނުކުރާނެކަމަށެވެ. ރައީސް ޑރ.މުހައްމަދު މުއިއްޒުގެ ވައުދުފުޅާ އެއްގޮތަށް ފިއްލަދޫގެ ސިއްހީ މަރުކަޒު އަޕްގްރޭޑް ކުރުމުގެ މަޝްރޫއު ފެށިގެން ދިޔުމަކީ ރަށުގެ ރައްޔިތުން ވަރަށް ގިނަ ދުވަސްތަކެއް ވަންދެން ކުރަމުން އައި އުންމީދެއް ހަގީގަތަކަށް ވުމުގެ ފެށުން ކަމަށް ވެސް މެމްބަރު ޝަރީފް ވިދާޅުވިއެވެ.

މި ރަސްމިއްޔާތުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިންގ ޑިރެކްޓަރ އިބްރާހީމް ނަޡީމް ވިދާޅުވީ ރަށެއްގެ އަސާސީ ހިދުމަތްތަކާ ގުޅުންހުރި މިފަދަ މުހިންމު ބިނާއެއްގެ މަސައްކަތް އެ ކުންފުންޏާ ހަވާލުކުރުމަކީ ލިބުނު ވަރަށް ބޮޑު އުފަލެއް ކަމަށެވެ.

ނަޡީމް ވިދާޅުވީ، މި މަޝްރޫއަކީ ފިއްލަދޫގެ ރައްޔިތުންނަށް ނުހަނު ބޭނުންތެރި މަސައްކަތަކަށް ވުމާއެކު، އެންމެ ފުރިހަމަ ގޮތުގައި މަސައްކަތް ކުރިއަށް ގެންދިއުމަށް ކުންފުނީގެ ފަރާތުން ކުރެވެން ހުރި ހުރިހާ މަސައްކަތެއް ކޮށްދެއްވާނެ ކަމަށެވެ. އަދި މަސައްކަތުގެ ސްޕީޑް އަވަސްކޮށް، އެންމެ ލަސްވެގެންވެސް ކުރިއަށް އޮތް 6 މަސް ދުވަހުގެ ތެރޭގައި އިމާރާތުގެ ހުރިހާ މަސައްކަތްތަކެއް ނިންމައި ހަވާލުކުރާނެ ކަމުގެ ޔަގީންކަންވެސް ވަނީ ދެއްވާފައެވެ.

މި ރަސްމިއްޔާތުގައި ވާހަކަދައްކަވަމުން، އެ މަރުކަޒުގެ ސީނިއަރ އެޑްމިނިސްޓްރޭޓަރ މުޙައްމަދު ޖަމީލް ވަނީ މި މަޝްރޫޢުގެ ސަބަބުން ރަށުގެ ސިއްހީ ނިޒާމަށް އިންގިލާބީ ބަދަލެއް އަންނާނެކަމަށް ފާހަގަކުރައްވާ މިއީ މުޅި ރަށަށް ލިބުނު ވަރަށް ބޮޑު އުފަލެއްގެ ގޮތުގައި ސިފަކުރައްވާފައެވެ.

މުހައްމަދު ޖަމީލް ވިދާޅުވީ، މި މަޝްރޫޢުގެ ދަށުން އަލަށް އިތުރުކުރެވޭ އެކްސްޓެންޝަން ބްލޮކާއެކު، ސިއްހީ މަރުކަޒުގެ ޖާގައިގެ ދަތިކަމަށް ދާއިމީ ހައްލެއް ލިބިގެންދާނެ ކަމަށެވެ. އަދި ޒަމާނީ ފެންވަރުގެ ލެބޯޓްރީއަކާއި ވަސީލަތްތައް ގާއިމުކޮށް، ބަލިތަކުން ރައްކާތެރިވުމަށް މަސައްކަތްކުރާ ޕަބްލިކް ހެލްތު ޔުނިޓެއްގެ ޚިދުމަތް ފެށުމަކީ މި މަޝްރޫޢުގެ އެންމެ މުހިންމު އެއް އަމާޒު ކަމަށް އޭނާ ވިދާޅުވިއެވެ. މި ބަދަލުތަކާއެކު ބަލިމީހުންނަށް ދެވޭ ޚިދުމަތުގެ ފެންވަރު ރަނގަޅުވެ، މުވައްޒަފުންނަށް މަސައްކަތް ކުރުމުގައި މިހާރަށްވުރެ ހިތްފަސޭހަ މާހައުލެއް ތަނަވަސްވާނެ ކަމަށް މުހައްމަދު ޖަމީލް ފާހަގަކުރެއްވިއެވެ.

މި މަޝްރޫޢުގެ ދަށުން ފިއްލަދޫ ޞިއްޙީ މަރުކަޒަށް ބޭނުންވާ އިމާރާތުގެ ޖާގަ އިތުރުކޮށް، ވަސީލަތްތައް ޤާއިމުކުރުމަށް ވަނީ ހަމަޖެހިފައެވެ. މިއީ، އެ ރަށުގެ ރައްޔިތުންނަށް ރަށުން ލިބޭ ޞިއްޙީ ޚިދުމަތްތައް އިތުރަށް ހަރުދަނާ ވެގެންދާނެ ކަމެކެވެ.