ޓްރީ ޓޮޕް ހޮސްޕިޓަލުގެ ޑާމައެސްތެޓިކް ހިދުމަތްތައް އިތުރަށް ފުޅާކުރުމުގެ ގޮތުން، އާ ފަރުވާއެއް ކަމަށްވާ ޕްލޭޓްލެޓް-ރިޗް ޕްލާޒްމާ (ޕީއާރުޕީ) ތެރަޕީ ރަސްމީކޮށް ތައާރަފުކޮށްފިއެވެ.
ޓްރީ ޓޮޕް ހޮސްޕިޓަލުން ބުނީ، މި ފަރުވާގައި، ބަލިމީހާގެ ގައިން ލޭ ނެގުމަށްފަހު، އޭގައި ހުންނަ ޕްލޭޓްލެޓްތައް ވަކިކޮށް، ކޮންސެންޓްރޭޓް ކުރެވޭނެ ކަމަށާއި، މިގޮތަށް ވަކިކުރެވޭ ޕްލޭޓްލެޓްތަކަކީ ގްރޯތް ފެކްޓާތަކުން މުއްސަނދިވެފައިވާ އެއްޗަކަށް ވުމުން، ހަށިގަނޑުގެ ހަލާކުވެފައިވާ ސެލްތައް މަރާމާތުކުރުމަށާއި، ކޮލަޖެން އުފެއްދުމުގެ އިތުރުން ޓިޝޫތައް އަލުން އާލާކުރުމަށް ބޮޑު އެހީތެރިކަމެއް ލިބިގެންދާ ފަރުވާ އެއް ކަމަށެވެ.
އެގޮތުން ޓްރީ ޓޮޕް ހޮސްޕިޓަލުން އަލަށް ތައާރަފްކުރި މި ހިދުމަތުގެ ދަށުން މައިގަނޑު ދެ ދާއިރާއަކުން ފަރުވާ ލިބޭނެ ކަމަށް އެ ހޮސްޕިޓަލުން ބުނެއެވެ. އެއީ އިސްތަށި ފެޅުމަށް ދޭ ޕީއާރުޕީ އާއި، ލަކުނު ފިލުވުމަށް ދޭ ޕީއާރުޕީ އެވެ.
އިސްތަށި ފެޅުމަށް ދޭ ޕީއާރުޕީ ގެ ސަބަބުން އިސްތަށި ފަޅާ ވަޅުތަކަށް ބާރުދީ، އިސްތަށި ފެޅުމަށް އެހީތެރިވެދީ، އިސްތަށިގަނޑު ބޯކޮށްދެއެވެ. އަދި ލަކުނު ފިލުވުމަށް ދޭ ޕީއާރުޕީގައި، މޫނުގައި ބިހި ނެގުމުގެ ސަބަބުން އުފެދޭ ލަކުނުތައް (އެކްނީ ސްކާރިން) ކުޑަކޮށްދީ، ހަމުގެ ޓެކްސްޗާ ރަނގަޅުކޮށް، ހަންގަނޑު އޮމާންކޮށްދެއެވެ.
ހަމުގެ ބަލިތަކުގެ އިތުރުން، ޓްރީ ޓޮޕް ހޮސްޕިޓަލުން ދަނީ ހުޅުގެ ބަލިތަކަށްވެސް ޕީއާރުޕީ އިންޖެކްޝަންގެ ފަރުވާ ދެމުންނެވެ. މި ފަރުވާއަކީ އޮސްޓިއޯއާތުރައިޓިސް އާއި ޓެންޑޮނައިޓިސް ފަދަ ބަލިތަކުގެ ސަބަބުން ހުޅުތަކުގައި އުފެދޭ ދުޅަވުން ކުޑަކޮށް، ގުދުރަތީ ގޮތުން ފަސޭހަވުން އަވަސްކޮށްދޭ ފަރުވާއެކެވެ.
ޓްރީ ޓޮޕް ހޮސްޕިޓަލުން ހާމަކުރި ގޮތުގައި، މި ޚިދުމަތް ތައާރަފް ކުރުމުގެ މައިގަނޑު މަގުސަދަކީ ބަލިމީހުންނަށް އިސްކަންދީގެން، އެންމެ ޒަމާނީ އަދި ރައްކާތެރި ފަރުވާތައް ރާއްޖެއިން ލިބޭނެ އިންތިޒާމު ހަމަޖެއްސުމެވެ.