ސިއްހީ ނިޒާމް ހަރުދަނާ ކުރުމަށް އައިޖީއެމްއެޗާއި ދަރުމަވަންތަ ހޮސްޕިޓަލުގައި ގިނަ ހިދުމަތްތަކެއް ގާއިމުކުރުމަށް ނިންމާފައިވާ ކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާޙިމް ޢަބްދުއްރައްޒާޤު ޙަލީމް ވިދާޅުވެއްޖެއެވެ.
ޙަލީމް މިފަދައިން ވިދާޅުވީ، "ނޭޝަނަލް ސެންޓަރ ފޮރ ނިއުރޯސައިންސް އެންޑް ސްޓްރޯކް"ގެ ހިދުމަތްތައް އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ހަލީމް ވިދާޅުވީ، މިއަހަރުގެ ތެރޭގައި ސިއްހީ ހިދުމަތްތައް އިތުރަށް ފުޅާކޮށް ހަރުދަނާ ކުރުމަށްޓަކައި ދަރުމަވަންތަ ހޮސްޕިޓަލާއި އައިޖީއެމްއެޗުގައި ގިނަ މަސައްކަތްތަކެއް ކުރުމަށް ނިންމާފައިވާ ކަމަށެވެ. އެގޮތުން މާލޭގެ ދެވަނަ އާރބަން ހެލްތު ކެއަރ ސެންޓަރު ޤާއިމްކުރުމާއި، ލެބޯޓްރީގެ ފްލެބޮޓޮމޯ ޚިދުމަތްތައް ގްރައުންޑް ފްލޯއަށް ބަދަލުކުރުގެ މަސައްކަތް ހިމެނޭ ކަމަށެވެ.
ހަލީމް ވިދާޅުވީ، ދަރުމަވަންތަ ހޮސްޕިޓަލުގައި ކެތު ލެބް ގާއިމްކުރުމާއި، އިންޓެންސިވް ކެއަރ ޔުނިޓުގެ ހިދުމަތް ހަރުދަނާކުރުމުގެ މަސައްކަތް ކުރިއަށް ގެންދިޔުމަށް ހަމަޖެހިފައިވާ ކަމަށާއި، އަދި ނެޝަނަލް ކާޑިއެކް ސެންޓަރު ތަރައްގީ ކުރުމާއި، ކާޑިއޯ ތޮރޭސިކް އެންޑް ވަސްކިއުލާ ސާޖަރީ އަދި އިންޓަވެންޝަނަލް ރޭޑިއޮލޮޖީއާއި، ގެސްޓްރޯ އީއާރްސީޕީގެ ހިދުމަތުގެ އިތުރުން ޖެނެރަލް ރޮބޮޓިކް ސާޖަރީ ފަދަ ޒަމާނީ ހިދުމަތްތައްވެސް ތައާރަފްކުރުމަށް ހަމަޖެހިފައިވާ ކަމަށެވެ.
މީގެ އިތުރުން ލޮލުގެ ފަރުވާގެ ހިދުމަތްތައް ފުޅާކުރުމާއި، ސާޖިކަލް ނެވިގޭޝަން ސިސްޓަމް ގާއިމްކުރުމުގެ މަސައްކަތް ހިމެނޭ ކަމަށްވެސް ޙަލީމް ވިދާޅުވިއެވެ.
ރާއްޖޭގެ ސިއްހީ ނިޒާމު ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، ހޮސްޕިޓަލުތަކުގައި ދަނީ ގިނަ ހިދުމަތްތަކެއް ތައާރަފްކުރަމުންނެވެ. އަދި އައު ހިދުމަތްތައް ފަށައި މިހާރު ދެމުންދާ ގިނަ ހިދުމަތްތައް ފުޅާކުރުމުގެ މަސައްކަތްވެސް ދަނީ ކުރަމުންނެވެ. މާލެ ސަރަހައްދުގައި ދޭ އައު ހިދުމަތްތައް އަތޮޅު ތެރެއަށްވެސް ފުޅާކުރަމުންދާއިރު، މިއީ ސިއްހީ ނިޒާމު ކުރިއަރައިގެންދާ ކަމުގެ ހެއްކެއް ކަމަށް ސަރުކާރުން ބުނެއެވެ.