ގައުމު ސަލާމަތް ކުރެވޭޭނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިޔާސަތުތަކަށް އެއްބާރުލުން ދީގެން ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ޖުމްހޫރީ ޕާޓީގެ ލޯކަލް ކައުންސިލް އިންތިހާބު އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު އިފްތިތާހު ކުރުމުގެ ހަފްލާގައި ވާހަކަފުޅު ދައްކަވަމުން ގާސިމް ވިދާޅުވީ ޕީއެންސީގެ ކެންޑިޑޭޓުންނަށް ތާއީދު ކުރަން ނިންމީ ރައްޔިތުންގެ ކުރިއެރުމާއި، ތަރައްގީއާއި ހަމަޖެހުން ނަގާލަން ފުރުސަތު ނުދިނުމަށްޓަކައި ކަމަށެވެ. އަދި ރަށަށާއި ގައުމަށް ކުރިއެރުން އަންނާނީ ސަރުކާރުގެ ކެންޑިޑޭޓުންނަށް ވޯޓު ދީގެންކަން އޭނާ ފާހަގަކުރެއްވިއެވެ.
ރާއްޖޭގެ މިހާރުގެ ސިޔާސީ އަދި އިގްތިސާދީ ހާލަތް ފާހަގަކުރައްވާ ގާސިމް ވިދާޅުވީ ގައުމު މިއަދު ހިފަހައްޓަނީ ރައީސްގެ ކުޅަދަނާކަމާއި ގާބިލްކަމުން ކަމަށެވެ.
ގާސިމް ވިދާޅުވީ ހާއްސަކޮށް، މެންބަރުންގެ ގޮނޑި ގެއްލޭ ގޮތަށް ގާނޫނަށް ގެނައި އިސްލާހަށް ފުރިހަމައަށް ތާއީދު ކުރައްވާ ކަމަށާއި، ބޭނުންހާ ވާހަކައެއް ދައްކައި ގާނޫނާ ހިލާފު ކަންކަން ކުރަން ރައީސް ޖާގަ ދެއްވައިގެން ނުވާނެ ކަމަށެވެ.
ކުރީގެ ސަރުކާރުތަކަށް ފާޑުވިދާޅުވަމުން ގާސިމް ވިދާޅުވީ، ރާއްޖޭގެ ޑިމޮކްރަސީ ފުޑާލީ ރައީސް ނަޝީދުގެ ވެރިކަމުގައި އެމްޑީޕީން ކަމަށެވެ. އަދި ނަޝީދުގެ ވެރިކަމުގައި ދީނަށް ފުރައްސާރަ ކުރުމާއި ގާނޫނާ ހިލާފު އެތައް ކަމެއް ހިނގާފައިވާ ކަމަށް އޭނާ ތުހުމަތު ކުރެއްވިއެވެ. މީގެ އިތުރުން ރައީސް ސާލިހުގެ ސަރުކާރުން 126 ބިލިޔަން ރުފިޔާއިން ގައުމު ދަރުވާލާފައިވާ ކަމަށާއި، ފެނަކަ އެކަނިވެސް 3 ބިލިޔަން ރުފިޔާގެ ބިލް ނުދައްކާ ހުރިކަން ގާސިމް ފާހަގަކުރެއްވިއެވެ.
ގާނޫނީ އޮނިގަނޑަށް ގެންނަންޖެހޭ ބަދަލުތަކާ ގުޅޭގޮތުން ވާހަކަ ދައްކަވަމުން ގާސިމް ވިދާޅުވީ، މިނިވަންކަން އޮންނަންވާނީ އިސްލާމްދީނުގެ ހުދޫދުގެ ތެރޭގައި ކަމަށާއި، އަބުރަށް އަރައިގަނެ ބޭނުންހާ އެއްޗެއް ކިޔަން ޖާގަ ނުލިބޭނެ ގޮތަށް ގާނޫނު އަސާސީއަށް ބޮޑެތި އިސްލާހުތަކެއް ގެންނަން ޖެހޭ ކަމަށެވެ.އަދި ލާމަރުކަޒީ ގާނޫނަށް ގެނައި ބަދަލުތަކުގެ ތެރެއިން ސުޕްރީމް ކޯޓުގައި ތާށިވެފައިވާ މާއްދާތައް އިސްލާހު ކުރުމަށްވެސް ގާސިމް ވަނީ ރައީސްގެ ކިބައިން އެދިވަޑައިގެންފައެވެ.
ގައުމު އޮތް ދަރަނީގެ ހާލަތުން އަރައިގަނެވޭނީ ރައްޔިތުން ސަރުކާރަށް ފުރިހަމައަށް އެއްބާރުލުން ދީގެން ކަމަށް ގާސިމް ވިދާޅުވިއެވެ. އަދި ގައުމުގެ މުސްތަގުބަލަށްޓަކައި ހުރިހާ ރައްޔިތުންވެސް ޕީއެންސީގެ ކެންޑިޑޭޓުންނަށް ވޯޓު ދެއްވުމަށް އޭނާ ވަނީ ތަކުރާރުކޮށް އިލްތިމާސް ކުރައްވާފައެވެ.
މިހަފްލާގައި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި އެޕާޓީގެ ފަރާތުން ވާދަކުރައްވާ ކެންޑިޑޭޓުން ތައާރަފް ކުރުމާއި ކެންޑިޑެސީ ލިޔުން ހަވާލުކުރެއްވުން އޮތެވެ. އަދި ރަށަށާއި ޤައުމަށް ކުރިއެރުން އަންނާނީ ސަރުކާރުގެ ކެންޑިޑޭޓުންނަށް ވޯޓު ދީގެންކަން އޭނާ ފާހަގަކުރެއްވިއެވެ.