އެމްޑަބްލިޔުއެސްސީއާ މިހާތަނަށް ހަވާލުކޮށްފައިވާ ނަރުދަމާގެ 27 މަޝްރޫޢެއްގެ މަސައްކަތް މިއަހަރު ނިންމާލުމަށް މަސައްކަތްކުރަމުންދާކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ ޢަބްދުލްމަތީން މުޙައްމަދު ވިދާޅުވެއްޖެއެވެ.
ދައުލަތުގެ މީޑިއާގައި ވާހަކަ ދައްކަވަމުން މަތީން ވިދާޅުވީ، ފެނާއި ނަރުދަމާގެ 27 މަޝްރޫއެއްގެ މަސައްކަތް އެމްޑަބްލިޔުއެސްސީއާ ހަވާލުކޮށްފައިވާކަމަށާއި، އޭގެތެރެއިން ގިނަ މަޝްރޫއުތަކަކީ ކުރިން ފަށާފަ ހުއްޓިފަ ހުރި މަޝްރޫޢުތަކެއް ކަމަށެވެ.
އެގިތުން މަތީން ވިދާޅުވީ، އެ ކުންފުނިން އެންމެ ބޮޑު އިސްކަމެއް ދެއްވަނީ މަޝްރޫއުތަކުގެ މަސައްކަތް ހުއްޓުމެއްނެތި ކުރިއަށްގެންދިއުމަށްކަމަށާއި، އެ ކުންފުނީގެ އަމާޒަކީ، އެމްޑަބްލިޔުއެސްސީއާ ހަވާލުކޮށްގެން ކުރިއަށްގެންދާ ހުރިހާ މަޝްރޫޢެއްގެ މަސައްކަތް މިއަހަރުތެރޭ އެއްކޮށް ނިންމާލުންކަމަށެވެ.
އަތޮޅުތެރޭގެ ރަށްރަށުގައި މަޝްރޫޢުތައް ކުރިއަށްގެންދާއިރު ގިނަ ގޮންޖެހުންތަކާ ކުރިމަތި ލާންޖެހޭކަން މަތީން ފާހަގަކުރެއްވިއެވެ. އެގޮތުން މަސައްކަތްކުރާނެ މީހުން ހޯދުމުގައި ދަތިތަކާ ކުރިމަތިލާންޖެހޭކަމަށް މަތީން ވިދާޅުވިއެވެ. އެހެން ނަމަވެސް މަޝްރޫއުގެ މަސަކަތްތަށް ހުއްޓުމެއް ނެތި ކުރިއަށްގެންދާން ގޮސް ނިންމާނެ ކަމަށް މަތީން ވިދާޅުވިއެވެ.