ބޭންކް އޮފް މޯލްޑިވްސް، ބީއެމްއެލް އިން އެސްޑީއެފްސީ ގަނެ ކުންފުނި ރީބްރޭންޑް ކުރުމަށްފަހު، ހަތަރު މަސް ދުވަހުގެ ތެރޭގައި، ކުދި އަދި މެދު ފަންތީގެ ވިޔަފާރިތަކަށް ބޭނުންވާ ހުރިހައި ދާއިރާއަކުން ޝަރީއާ ހަމަތަކަށް ފެތޭ ފައިނޭންސިން ޕްރޮޑަކްޓްތައް ތަޢާރަފުކޮށްފިއެވެ.

އެސްއެމްއީ ޑިޖިޓަލް އިން ބުނީ ވިޔަފާރީގެ ކޮންމެ މަރުހަލާއަކަށްވެސް ހައްލެއް ލިބޭނެހެން، އެސްއެމްއީ ޑިޖިޓަލްގެ ހިދުމަތްތައް ބައްޓަންކޮށްފައިވަނީ، ހުރިހާ ވިޔަފާރިއަކަށް އެއްގޮތަކަށް އަމަލުކުރުމުގެ ބަދަލުގައި، ކޮންމެ ބޭނުމަކަށް އެންމެ އެކަށީގެންވާ މާލީ އެހީ ހޯދައިދިނުމުގެ މައްޗަށް ކަމަށެވެ.

އެސްއެމްއީ ޑިޖިޓަލްއިން އަލަށް ވިޔަފާރި ފަށާ ފަރާތްތަކަށާއި ކުދި މަސައްކަތްތަކަށް، 100،000 ރުފިޔާއާއި ހަމައަށް ފައިނޭންސް ފޯރުކޮށްދޭނެ ކަމަށާއި އަންހެން ވިޔަފާރިވެރިން ބާރުވެރި ކުރުވުމަށް ހާއްސަ އިސްކަމެއް ދީގެން، ރަހުނަކާނުލާ 250،000 ރުފިޔާއާ ހަމައަށް ފައިނޭންސް ލިބޭނެ އިންތިޒާމު ވަނީ ހަމަޖައްސާފައިވާކަމަށް ބުނެއެވެ.

އެސްއެމްއީ ޑިޖިޓަލްއިން ބުނީ ވިޔަފާރި ފުޅާކުރުމަށާއި ހަރުމުދާ ހޯދުމަށް ބޭނުންވާ ފަރާތްތަކަށް 5 މިލިއަން ރުފިޔާއާ ހަމައަށް ފައިނޭންސިން ދޫކުރާއިރު، މީގެ ތެރެއިން 1 މިލިއަން ރުފިޔާއާ ހަމައަށް ރަހުނަކާނުލާ ފައިނޭންސް ލިބޭނެ ކަމަށާއި ކަނޑު އުޅަނދުފަހަރު ބަނުމަށާއި، ގަތުމަށް ހާއްސަ 'ވެސަލް ފައިނޭންސިންގ' ގެ ދަށުން 5 މިލިއަން ރުފިޔާއާ ހަމައަށް މާލީ އެހީތެރިކަން ފޯރުކޮށްދޭނެ ކަމަށެވެ.

އެ ކުންފުނިން ބުނީ ޒަމާނީ ޑިޖިޓަލް އިގްތިސާދަށް އަމާޒުކޮށް، ކޮންޓެންޓް ކްރިއޭޓަރުންނާއި ފޮޓޯގްރާފަރުންނަށް ބޭނުންވާ ސާމާނު ހޯދުމަށް 500،000 ރުފިޔާއާ ހަމައަށް ފައިނޭންސިން ލިބޭނެ ހާއްސަ ފައިނޭންސް އެއްވެސް ވަނީ ތައާރަފު ކޮށްފައިވާކަމަށެވެ. މީގެ ތެރެއިން 150،000 ރުފިޔާއާ ހަމައަށް އެއްވެސް ރަހުނަކާ ނުލައި ފައިސާ ލިބޭނެ ކަމަށް ބުނެއެވެ.

ފަތުރުވެރިކަމުގެ ދާއިރާ ކުރިއެރުވުމަށް އެސްއެމްއީ ޑިޖިޓަލްއިން ވަނީ، އެހީތެރިކަން އިތުރުކޮށްފައި ކަން ފާހަގަކޮށް އެ ކުންފުނިން ބުނީ 6 ކޮޓަރި އަށްވުރެ ގިނަ ގެސްޓްހައުސްތައް ތަރައްގީ ކުރުމަށާއި ފުޅާކުރުމަށް 10 މިލިއަން ރުފިޔާއާ ހަމައަށް ފައިނޭންސިންގ ލިބޭނެ ކަމަށެވެ. އޭގެ އިތުރުން، ގިނަވެގެން 5 ކޮޓަރީގެ ހޯމްސްޓޭ ނުވަތަ ކުދި ގެސްޓްހައުސްތައް އަލަށް ފަށާ ފަރާތްތަކަށާއި، މިހާރު ހިންގާ ކުދި ވިޔަފާރިތަކަށް 1.5 މިލިއަން ރުފިޔާއާ ހަމައަށް މާލީ އެހީތެރިކަން ފޯރުކޮށްދޭނެ ކަމަށް ބުނެއެވެ.

އެސްއެމްއީ ޑިޖިޓަލްގެ މައިގަނޑު މަގްސަދަކީ ކޮންމެ ފަންތިއެއްގެ ކުދި ވިޔަފާރިއަކަށްވެސް އެ ވިޔަފާރިއަކާ ގުޅޭ މާލީ އެހީތެރިކަން ފަސޭހައިން ލިބޭނެ އިންތިޒާމު ހަމަޖެއްސުން ކަމަށް އެ ކުންފުނީގެ ސީއީއޯ ބަދުރުއްދީން ހަސަން ވިދާޅުވިއެވެ. އަދި ގޭގައި ކުރާ މަސައްކަތްތަކުން ފެށިގެން ބޮޑެތި އިންވެސްޓްމަންޓްތަކާ ހަމައަށް އެކަށީގެންވާ ހައްލުތަކެއް ހޯދައިދިނުމަކީ އަމާޒެއް ކަން އޭނާ ފާހަގަކުރެއްވިއެވެ.

ދިވެހިރާއްޖޭގެ އިގްތިސާދުގެ މައިބަދައަކީ، ކުދި އަދި މެދު ފަންތީގެ ވިޔަފާރިތަކަށް ވީއިރު، ގޭތެރޭގައި ކުރާ ކުދި މަސައްކަތްތަކުން ފެށިގެން ފުޅާވަމުން އަންނަ ގެސްޓްހައުސްތަކާއި، އަންހެން ވިޔަފާރިވެރިންގެ ހީވާގި މަސައްކަތްތަކަކީ ގައުމުގެ ކުރިއެރުމާ ގުޅިފައިވާ މުހިންމު ދާއިރާތަކެކެވެ.

ނަމަވެސް، މިފަދަ ވިޔަފާރިތަކަށް ކުރިމަތިވާ އެންމެ ބޮޑު ގޮންޖެހުމަކީ ވިޔަފާރި ފުޅާކުރުމަށް އަދި ދެމެހެއްޓެނިވި ގޮތެއްގައި ކުރިއަށް ގެންދިއުމަށް ބޭނުންވާ މާލީ އެހީތެރިކަން އެކަށީގެންވާ ވަގުތެއްގައި އަދި ލުއި ގޮތެއްގައި ނުލިބުމެވެ.

މި ހުސްކަން ފޫބެއްދުމަށްޓަކައި، އެސްއެމްއީ ޑިޖިޓަލްއިން ވަނީ، ޝަރީއާ ހަމަތަކަށް ފެތޭ ފުރިހަމަ ފައިނޭންސިން ނިޒާމެއް ބިނާކޮށްފައެވެ. މިއީ، ވިޔަފާރި ފަށާ މަރުހަލާއިން ފެށިގެން ފުޅާކުރުމާ ހަމައަށް، ކޮންމެ މަރުހަލާއެއްގައިވާ ވިޔަފާރިތަކަށް އެހީތެރިވެދީ، އުންމީދީ އެއްވެސް ވިޔަފާރި ހިޔާލެއް ބާކީނުވާނެކަން ކަށަވަރުކޮށްދޭ ނިޒާމެކެވެ.

މިއަދު އެސްއެމްއީ ޑިޖިޓަލްއަކީ، ރާއްޖޭގައި ކުދި އަދި މެދު ފަންތީގެ ވިޔަފާރިތަކަށް އެންމެ ފުޅާދާއިރާއެއްގައި ފައިނޭންސިން ފޯރުކޮށްދޭ އެއް ތަނެވެ. މީގެ ތެރޭގައި ފަތުރުވެރިކަން، ވިޔަފާރި، ހިދުމަތް، އުފެއްދުންތެރި ސިނާއަތްތައް އަދި ގޭގައި ކުރާ މަސައްކަތްތައް ހިމެނޭހެން، އެކި ދާއިރާތަކުގެ ވިޔަފާރިވެރިންގެ ބޭނުންތަކަށް ފަރުމާކޮށްފައިވާ ހާއްސަ ހައްލުތައް ހިމެނެއެވެ.

އެސްއެސްއީ ޑިޖިޓަލްއިން ބުނީ މިހާތަނަށް އެތައްހާސް ކުދި އަދި މެދު ފަންތީގެ ވިޔަފާރިތަކަކަށް އެ މުއައްސަސާގެ ފަރާތުން އެހީތެރިކަން ދީފައިވާނެ ކަމަށެވެ.