ރާއްޖޭގެ އެކި ސަރަހައްދުތަކުގައި ތަރައްގީކުރަމުން އަންނަ 6 ހޮސްޕިޓަލެއްގެ މަސައްކަތް ނިންމާ މިއަހަރުގެ ތެރޭގައި ހުޅުވުމަށް މަސައްކަތްކުރަމުންދާކަމަށް ސިއްހީ ވުޒާރާއި ބުނެފިއެވެ.
ދައުލަތުގެ މީޑިއާގައި ވާހަކަދައްކަވަމުން ސިއްހީ ވުޒާރާގެ ސްޓޭޓް މިނިސްޓަރު އިސްމާއިލް ޝަރީފް ވިދާޅުވީ މި 5 އަހަރު ނިމިގެންދާއިރު ރާއްޖޭގެ ސިއްހީ ނިޒާމުގައި އުމްރާނީގޮތުން އިންގިލާބީ ބޮޑު ބަދަލެއް ފެނިގެންދާނެކަމަށެވެ.
ޝަރީފް ވިދާޅުވީ މިހާރުވެސް ގިނަ ހޮސްޕިޓަލްތަކެއްގެ މަސައްކަތް އެކި މަރުހަލާގައި ކުރެވެމުންދާއިރު މިއަހަރުގެ ތެރޭގައިވެސް ބައެއް ހޮސްޕިޓަލްތައް ހުޅުވިގެންދާނެކަމަށެވެ. އެގޮތުން މިއަހަރުގެ ތެރޭގައި ހއ.ހޯރަފުށި، ނ.ކެނދިކުޅުދޫ، ރ.ދުވާފަރު، ބ.ތުޅާދޫ، ޅ.ހިންނަވަރު، އަދި ކ.ގުރައިދޫގެ ހޮސްޕިޓަލް ތަރައްގީކުރުމުގެ މަސައްކަތް ނިމިގެންދާނެކަމަށް އޭނާ ވިދާޅުވިއެވެ.
ރާއްޖޭގެ ސިއްހީ ނިޒާމަށް ބަލާއިރު އުމްރާނީގޮތުން ވޭތުވެދިޔަ ދިގު މުއްދަތުގައި ތަރައްގީކޮށްފައިވަނީ ދުރުރާސްތާ ޕްލޭނެއް ނެތި، އެދުވަސްވަރެއްގައި ބޭނުންވާ މިންވަރަށް ތަންތަންކޮޅު އިތުރުކުރުމުގެ ވިސްނުމެއްގައި ކަން ފާހަގަކޮށް ޝަރީފް ވިދާޅުވީ އެއީ ދެމެހެއްޓެނިވި ގޮތެއް ނޫންކަމުން މިހާރު ރާއްޖޭގެ ގިނަ ރަށްރަށުގެ ސިއްހީ ހިދުމަތް ފުޅާކޮށް، ތަރައްގީކުރުމަށް އެންމެ ބޮޑަށް ބޭނުންވެފައިވަނީ ޖާގަ ކަމަށެވެ.
އެހެންކަމުން ރަށްރަށުގައާއި މާލެ ސަރަހައްދުގައިވެސް އިތުރު ހޮސްޕިޓަލްތަކާއި ޖީޕީ ކްލިނިކްތައް ތަރައްގީކުރުމުގެ މަސައްކަތްދަނީ ކުރަމުން ކަމަށާއި ދައުލަތުން މިއަހަރަށް ލަފާކޮށްފައިވާ ބަޖެޓުގައިވެސް ސިއްހީ ދާއިރާއަށް ބޮޑު ބަޖެޓެއް ކަނޑައަޅާފައިވާއިރު މިއަހަރުގެ ތެރޭގައި ގިނަ މަޝްރޫއުތަކެއް ފަށާނެކަމަށް ސަރުކާރުން ބުނެއެވެ.
އަތޮޅުތަކުގެ ރަށްރަށުގެ ސިއްހީ ހިދުމަތްތަކުގެ ފެންވަރު މަތިކުރުމަށް ސަރުކާރުން އަންނަނީ އެކި މަޝްރޫއުތައް ހިންގަވަމުންނެވެ.
ސިއްހީ ހިދުމަތް ހޯދުމަށް މާލެ ސަރަހައްދަށް ބަރޯސާވާންޖެހި، ގިނަ ހިދުމަތްތައް ހޯދުމަށް މާލެއަށް އަންނަންޖެހުމަކީ މާލީގޮތުންނާއި އެހެނިހެން ގޮތްގޮތުންވެސް ތަކުލީފު ބޮޑު ކަމެކެވެ. މިކަމަށް ހައްލެއް ގެނައުމަށް އަތޮޅުތަކުގެ ރަށްރަށުގައި މިވަގުތު ހުރި ހޮސްޕިޓަލްތަކާއި އަދި ސިއްހީ މަރުކަޒުތައް އަޕްގްރޭޑްކުރުމުގެ މަސައްކަތާއި، ބޭނުންވާ ވަސީލަތް ފޯރުކޮށްދިނުމުގެ މަސައްކަތް ސަރުކާރުންދަނީ ކުރަމުން ކަމަށް ބުނެއެވެ.
މީގެއިތުރުން ރާއްޖޭގެ 7 ސަރަހައްދެއް އާބަން ސެންޓަރުތަކުގެ ގޮތުގައި ތަރައްގީކުރުމުގެ މަސައްކަތް ކުރަމުންދާއިރު އެސަރަހައްދުތަކުގައި ހުރި ސަރަހައްދީ ހޮސްޕިޓަލުތައް ޓާޝަރީ ފެންވަރަށް ތަރައްގީކުރުމުގެ މަސައްކަތްވެސް އަންނަނީ ކުރަމުން ކަމަށް މައުލުމާތުދެއެވެ.