ފިއްލަދޫގެ މަގުތައް ޒަމާނީ ފެެންވަރަށް ތަރައްގީކުރުމުގެ އަމަލީ މަސައްކަތް ފަށައިފި

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވައުދުފުޅާ އެއްގޮތަށް ހއ.ފިއްލަދޫގެ މަގުތައް ޒަމާނީ ފެންވަރަށް ތަރައްގީކުރުމުގެ އަމަލީ މަސައްކަތް ފަށައިފިއެވެ.

ފިއްލަދޫގެ މަގުތައް ހެދުމުގެ އަމަލީ މަސައްކަތް ފައްޓަވައި ދެއްވީ އެކަަމަށް ހާއްސަކޮށްގެން ބޭއްވި ރަސްމިއްޔާތުގައި ރައްޔިތުންގެ މަޖިލީހުގެ ކެލާ ދާއިރާގެ މެމްބަރު އަބްދުﷲ ޝަރީފްއެވެ. އަރިހުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މެނޭޖިންގް ޑިރެކްޓަރު އިބްރާހީމް ނަޡީމް އާއި ފިއްލަދޫ ކައުންސިލްގެ ރައީސް ފަތުހުﷲ ހަސަން ވެސް ބައިވެެރިވެވަޑައިގެންނެވިއެވެ.

ރަސްމިއްޔާތުގައި ވާހަކަފުޅު ދައްކަވަމުން މެމްބަރު ޝަރީފް ވިދާޅުވީ މަގުތައް ހެދުމަކީ ފިއްލަދޫގެ މުސްތަގުބަލަށް ލިބޭނެ ވަރަށް ބޮޑު ކުރިއެރުމެއް ކަމަށެވެ. ވަކިން ހާއްސަކޮށް، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ އޮފީހެއް އެ ރަށުގައި ގާއިމުވެ، ރަށުގެ ޒުވާނުންނަށް ވަޒީފާގެ ފުރުސަތުތައް ހުޅުވިގެން ދިއުމަކީ ރަށުގެ އިގްތިސާދަށް ލިބުނު ބޮޑު އުފަލެއްކަން މެމްބަރު ފާހަގަކުރެއްވިއެވެ. އަދި މަގުތައް ހެދިގެން ދިއުމުން، ވާރޭވެހި ފެންބޮޑުވުމުގެ ސަބަބުން ރައްޔިތުންނަށް ދިމާވާ ދަތިތަކާއި ލިބޭ ގެއްލުންތަކަށް ދާއިމީ ހައްލެއް ލިބިގެންދާނެ ކަމަށްވެސް ޝަރީފް ވިދާޅުވިއެވެ.

މެމްބަރުގެ ވާހަކަފުޅުގައި، ރަށަށް ބޭނުންވާ ތަރައްގީގެ މަޝްރޫއުތައް ބާރުމިނުގައި ކުރިއަށް ގެންދިއުމަށްޓަކައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތުތައް ގަބޫލުކުރާ ކެންޑިޑޭޓުން ކުރިއަށް އޮތް ލޯކަލް ކައުންސިލް އިންތިޚާބުގައި ހޮވުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ.

މި ރަސްމިއްޔާތުގައި އާރްޑީސީގެ މެނޭޖިންގ ޑިރެކްޓަރު އިބްރާހިމް ނަޡީމް ވިދާޅުވީ، ފިއްލަދޫގެ މަގު ހެދުމުގެ މަސައްކަތް އެ ކުންފުނިން ވަރަށް ގާތުން މޮނިޓަރު ކުރަމުންދާނެ ކަމަށެވެ. އަދި އުންމީދަކީ ވީހާވެސް އަވަހަކަށް މަސައްކަތް ނިންމާލައި، ރައްޔިތުންނަށް އޭގެ ފައިދާ ހޯދައިދިނުން ކަމަށް އޭނާ ވިދާޅުވިއެވެ. ނަޡީމް އިތުރަށް ހާމަކުރެއްވި ގޮތުގައި، މަސައްކަތް ހަލުވިކުރުމަށްޓަކައި އާރްޑީސީގެ ވޯކް ސައިޓް ބޮޑުކުރުމުގެ މަސައްކަތް މިހާރު ވަނީ ފަށާފައެވެ.

މަޝްރޫއަށް ބޭނުންވާ ސާމާނާއި ވެހިކަލްތައް ކުރިއަށް އޮތް ދެ މަސްދުވަހުގެ ތެރޭގައި ރަށަށް ގެންދެވޭނެ ކަމުގެ ޔަގީންކަން ދެއްވަމުން އެމްޑީ ވިދާޅުވީ، މިހާރުވެސް އާރްޑީސީގެ ފަސް ޕްރޮޖެކްޓެއް އެ ރަށުގައި ކުރިއަށްދާ ކަމަށެވެ.