64،000 ފްލެޓު އަޅަން އައި ސަރުކާރުން އަދި އެންމެ ގާގަނޑެއްވެސް ބިންމަތީގަ ނުބާއްވާ ކަމަށް އެމްޑީޕީގެ ޗެއާޕާސަން އަބްދުލް ގަފޫރް ވިދާޅުވެއްޖެއެވެ.
ރޭ އިދިކޮޅު އެމްޑީޕީގެ ކެމްޕެއިން 'ހޭވައްލާ ތައްޔާރު' ލޯންޗުކުރުމަށް އާޓިފިޝަލް ބީޗުގައި ބޭއްވި ޖަލްސާގައި ވާހަކަދައްކަވަމުން ގަފޫރު ވިދާޅުވީ، ނިމިދިޔަ އެމްޑީޕީގެ ސަރުކާރުން 9000 ފްލެޓު އެޅިކަމަށާއި 9000 ގޯތި މާލެ އިން ދީފައިވާނޭ ކަމަށެވެ. އަދި 40،563 ގޯތި މާލެ، ހުޅުމާލެ، ގުޅީފަޅު އަދި އުތުރު ތިލަފަޅުން ދީފައިވާނޭ ކަމަށް ވެސް ގަފޫރު ވިދާޅުވިއެވެ.
ރައީސް ޑރ. މުއިއްޒު ވަނީ މި ސަރުކާރުގައި އެ ގޯތިތަށް ހަވާލު ކޮށްދޭނެ ކަމަށް ވިދާޅުވެފަކަމަށާއި، އެހެން ނަމަވެސް އެގޯތި ދީފައިނުވާކަން ފާހަގަ ކޮށް ގަފޫރުވަނީ ދިން އެ ގޮތިތަށް ކޮބައިތޯ މި ސަރުކާރާ ސުވާލު އުފައްދާފައެވެ. އަދި އެ ގޯތިތަށް ނުދޭހާ ހިނދަކު ރާއްޖޭގެ އެއްވެސް ކަންކޮޅަކުން މި ސަރުކާރަށް ވޯޓުދޭން ނުޖެހޭނެ ކަމަށް ގަފުރު ވިދާޅުވިއެވެ.
އެހެން ކަމުން ގަފޫރު ވަނީ، އެއީ ރައީސް ޑރ. މުއިއްޒުގެ ރިޔާސީ ވައުދަކަށް ވީ އިރު މިހިސާބަށް އައި އިރު އެވައުދު ނުފުއްދުނީ ކީއްވެތޯ ވެސް ސުވާލު އުފައްދާފައެވެ.
ގަފޫރު ވިދާޅުވީ، މިދިޔަ ސަރުކާރުން ހުޅުމާލޭގައި 1300 ގޯތި ކަނޑާފައި ދިން ކަމަށެވެ. އަދި އޭގެ އިތުރުން ވެސް ހުޅުމާލޭގައި ގޯތި ކަނޑާނެ ބިން އޮންނާނެ ކަމަން ފާހަގަ ކުރައްވައި ގަފޫރު ވަނީ، މި ސަރުކާރުން ގޯތި ކަނޑާފަ ދޭން ނުކެރިގެން އުޅެނީ ކީއްވެގެން ތޯ ވެސް ސުވާލު ކޮށްފައެވެ.
ގަފޫރު އިތުރަށް ވިދާޅުވީ، އަޑު އިވެމުންދަނީ މި ސަރުކާރު އައީ އިސްލާމްދީން ހިމާޔަތް ކުރުމަށް ކަމަށް ބުނާ އަދު ކަމަށާއި، އެހެން ނަމަވެސް ރާއްޖޭގައި މަރުގެ ހުކުމް ތަންފީޒު ކުރަން މިހާރު ފާސްކޮށްފައި އޮތް ނަމަވެސް އެކަމަށް އަމަލު ކުރާނެ ހިއްވަރެއް މި ސަރުކާރުގެ ނެތް ކަމަށެވެ.
ގަފޫރު ވިދާޅުވީ، ރައްޔިތުންނަށް ދޮގާ މަކަރާ ހެދުން ނޫން ކަމެއް މި ސަރުކާރުން ނުކުރާކަމަށާއި، އެހެން ކަމުން އުޅެންވާގޮތާ ކުރަންވި ކަންކަމާ މިހާރު ރައްޔިތުންނަށް ވަރަށް ބޮޑަށް އޮޅިފައިވާކަމަށެވެ.