"ވޯލްޑް ކޭކް އާޓިސްޓްރީ އެވަރޑްސް 2026"ގެ ނަމުގައި ކޭކު ޑިޒައިންކުރާ ފަންނުވެރިންގެ ބައިނައިލްއަޤްވާމީ އެވޯޑު ފުރަތަމަ ފަހަރަށް ރާއްޖޭގައި ބާއްވައިފިއެވެ.
މި އެވޯޑުގައި 40 އެއްހާ ޤައުމަކުން، ކޭކު އެޅުމުގެ ދާއިރާގައި މަސައްކަތްކުރާ ފަރާތްތަކުން ބައިވެރިވެފައި ވާއިރު ރާއްޖެއިންވެސް ކޭކު އެޅުމުގެ ދާއިރާގައި މަސައްކަތްކުރާ 14 ފަރާތަކުން ވަނީ އެ އެވޯޑަށް ވާދަކޮށްފައެވެ.
އެ އެވޯޑަކީ ވިސިޓް މޯލްޑިވްސްއިން އެންޑޯޒް ކޮށްފައިވާ އެވޯޑެކެވެ. ދިވެހިރާއްޖެ ހިމެނޭހެން އެ މުބާރާތުގައި ބައިވެރިވި ބައެއް ގައުމުތަކުގެ ތެރޭގައި އޮސްޓްރޭލިއާ، ބަންގްލަދޭޝް، ބްރެޒިލް، ކެނެޑާ، ޗިލީ، މިސްރު, ހަންގޭރި، އިންޑިއާ، އިރާން، އިރާޤް، އަޔަރލޭންޑް، ޖަޕާން، އުރުދުން، ފަރަންސޭސިވިލާތް، އިންޑިއާ, މެލޭޝިޔާ، ނެދަލެންޑްސް، ސަޢުދީ ޢަރަބިއްޔާ، ދެކުނު ކޮރެއާ، ތައިލެންޑް، އިނގިރޭސިވިލާތް، އެމެރިކާ ހިމެނެއެވެ.
މި މަހުގެ 12 ވަނަ ދުވަހު ކުރުނބާ މޯލްޑިވްސްގައި ބޭއްވި ރަސްމިއްޔާތެއްގައި "ވޯލްޑް ކޭކް އާޓިސްޓްރީ އެވަރޑްސް 2026" ޝަރަފްވެރިކޮށްދެއްވާފައި ވަނީ އިކޮނޮމިކް މިނިސްޓްރީގެ ސްޓޭޓް މިނިސްޓަރު ހާރިސް މުޙައްމަދު އެވެ.
އެ ރަސްމިއްޔާތުގައި ސްޓޭޓް މިނިސްޓަރު ވަނީ މިފަދަ ހަރަކާތްތަކުގެ ސަބަބުން ދިވެހި ކުދި ވިޔަފާރިތައް ބައިނަލްއަޤްވާމީ ވިއުގަތަކާއި ގުޅުވައިދޭނެކަމަށް ވިދާޅުވެފައެވެ.
ހަމައެހެންމެ ކާބޯތަކެތި ތައްޔާރުކުރުމުގެ ފަންނަކީ އިޤްތިސާދީ ކުރިއެރުމާއި، އަމިއްލަ މަސައްކަތްތެރިކަން ކުރިއެރުވުމުގައި މުހިންމު ދައުރެއް އަދާކުރާ މަސައްކަތެއްގެ ގޮތުގައި މުޅި ދުނިޔޭގައިވެސް ބަލައިގަންނަމުންދާ ކަމަށް މިނިސްޓަރު ވަނީ ވިދާޅުވެފައެވެ.
މީގެ އިތުރުން އެ ދާއިރާއަކީ ރާއްޖޭގައި ކުދި އަދި މެދުފަންތީގެ ވިޔަފާރިތަކަށް ބޮޑު ފުރުސަތުތަކެއް އޮތް ދާއިރާއެއްކަން ސްޓޭޓް މިނިސްޓަރު ހާރިސް މުހައްމަދު ވިދާޅުވެފައެވެ.