ދ. ކުޑަހުވަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީން ތަރައްގީކުރި ޖިމް، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ހުޅުވައިދެއްވައިފި އެވެ.
ރައީސް އޮފިހުން ބުނީ ކުޑަހުވަދޫ އެކުވެރި އަންހެނުންކޮމިޓީގެ އިމާރާތުގައި ތަރައްގީކޮށްފައިވާ ޖިމް ހުޅުވުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ވަނީ ދުޅަހެޔޮ ސިއްހަތެއްގައި ހުރުމާއި ގައިންގަޔަށް ނާރާ ބަލިތަކުން ރައްކާތެރިވުމަށް، ހަރަކާތްތެރިކޮށް އުޅުމުގެ މުހިންމުކަމުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައިވާ ކަމަށެވެ.
ރަށުގައި މިފަދަ ޖިމެއް ހުޅުވުމަކީ މިކަމަށް ލިބިގެންދިޔަ ބާރެއްކަމަށް ސާޖިދާ ވިދާޅުވިއެވެ.
ސާޖިދާ ވިދާޅުވީ ސަރުކާރުން ދިވެހި ރައްޔިތުންގެ ދުޅަހެޔޮކަމާއި އާންމު ސިއްހަތު ރައްކާތެރިކުރުމަށް ނުހަނު އިސްކަމެއްދެއްވައިގެން މަސައްކަތްކުރައްވާކަމަށެވެ. އެގޮތުން އާންމު ސިއްހަތު ކުރިއެރުވުމަށާއި، ބަލިތަކުން ރައްކާތެރި ވެއްޓެއް ގާއިމުކުރެއްވުމަށް، ރައީސް ކަނޑައަޅުއްވާފައިވާ ސިޔާސަތުތަކާއި، ކުރައްވާފައިވާ މަސައްކަތްޕުޅުތައް ފާހަގަކޮށް ޓައިމް މަޖައްލާއިން ހޮވި، 2026 ވަނަ އަހަރު ސިއްހީ ދާއިރާއިން އެންމެ ނުފޫޒުގަދަ 100 ޝަހްސިއްޔަތުގެ ތެރޭގައި ރައީސް ހިމެނިވަޑައިގެންފައިވާކަމަށް ސާޖިދާ ވިދާޅުވިއެވެ.
ސާޖިދާ ވަނީ ރައީސްގެ އިސްނެންގެވުމުގެ ދަށުން، ދުންފަތުގެ އިސްތިއުމާލުކުރުން ހުއްޓުވުމަށް އަޅުއްވާފައިވާ ފިޔަވަޅުތައް ފާހަގަކުރައްވާފައެވެ. އަދި ރަށުގައި މިފަދަ ޖިމެއް ހުޅުވުމަކީ ރައްޔިތުންގެ ދުޅަހެޔޮކަމާއި އާންމު ސިއްހަތު ރައްކާތެރިކުރުމަށް ލިބިގެންދިޔަ ބާރެއްކަމުގައި ސާޖިދާ ފާހަގަކުރެއްވިއެވެ.
ސާޖިދާ އިތުރަށް ވިދާޅުވީ މިއަދު ކުޑަހުވަދޫގައި ހުޅުވި ޖިމަކީ އާންމު ސިއްހަތު ކުރިއެރުވުމަށާއި، ބަލިތަކުން ރައްކާތެރި ވެއްޓެއް ގާއިމުކުރުމަށް އެޅުނު މުހިންމު ފިޔަވަޅެއްކަމަށާއި، އެ ޖިމްގެ ބޭނުން ހުރިހާ ފަރާތްތަކުން އެންމެ ފުރިހަމަގޮތުގައި ހިފާނެކަމަށް އުއްމީދުކުރައްވާކަމަށެވެ.
ކުޑަހުވަދޫ އަންހެނުންގެ ތަރައްްގީއަށް މަސައްކަތް ކުރާ ކޮމެޓީގެ އިސްނެގުމާއިއެކު މިފަދަ ޖިމެއް ހުޅުވިގެން ދިއުމަކީ މުހިންމު މަސައްކަތެއްކަން ފާހަގަކުރައްވައި ސާޖިދާ ވަނީ، އަންހެނުންގެ ތަރައްގީއަށް މަސައްކަތްކުރާ އެހެން ކޮމެޓީތަކުން މިކަން ނަމޫނާއަކަށް ބަލައި މިފަދަ ކޮމެޓީތަކުގެ މުހިންމުކަމާއި އެބޭފުޅުން ކުރައްވާ ހިތްވަރުގަދަ މަސައްކަތް ފާހަގަކުރައްވާފައެވެ.
މި ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު، ރައްޔިތުންގެ މަޖިލީހުގެ ކުޑަހުވަދޫ ދާއިރާ ގެ މެމްބަރު ހުސައިން ހަމީދު އަދި ކުޑަހުވަދޫ ކައުންސިލް މެމްބަރުންނާއި އަންހެނުންގެ ތަރައްްގީއަށް މަސައްކަތްކުރާ ކޮމެޓީގެ މެމްބަރުންގެ އިތުރުން ރަށުގެ ގިނައަދަދެއްގެ ރައްޔިތުން ބައިވެރިވެފައިވާކަމަށް މައުލުމާތުދެއެވެ.