އެމްޑަބްލިޔުއެސްސީން ހުޅުމާލޭގައި ޤާއިމްކުރި 5000 ޓަނުގެ ފެން އުފެއްދޭ އާރްއޯ ޕްލާންޓްގެ މަސައްކަތް ނިންމައި ބޭނުން ކުރަން ފަށައިފިއެވެ.
އެމްޑަބްލިޔުއެސްސީން މިކަން ހާމަކޮށް އާންމުކުރި މައުލޫމާތުގައި އެ ކުންފުނިން ބުނީ ހުޅުމާލޭގައި އެ ކުންފުނިން ތަރައްގީ ކުރި 5000 ޓަނުގެ ފެން ޕްލާންޓް އިންސްޓޯލްކޮށް ކޮމިޝަން ކުރުމުގެ މަސައްކަތް ކާމިޔާބުކަމާއެކު ނިމިފައިވާ ކަމަށެވެ.
އެ ފެން ޕްލާންޓް ބޭނުންކުރަން ފެށުމުން މާލެ އާއި ހުޅުމާލޭގެ ފެން ފޯރުކޮށްދިނުމުގެ ގާބިލުކަން ހަރުދަނާވެގެން ދާނެކަމަށް އެމްޑަބްލިއުއެސްސީން ބުނެފައިވެ އެވެ.
ހާއްސަކޮށް ރަމަޟާން މަހަކީ ފެނުގެ ޑިމާންޑް ބޮޑު މަހަކަށްވުމުން މި ޕްލާންޓާއެކު ޑިމާންޑާ އެއްވަރަށް ފެންފޯރުކޮށްދިނުމަށް އެހީތެރިވެދޭނެކަމަށްވެސް އެ ކުންފުނިން ބުނެފައިވެ އެވެ.
މާލެ އަދި ހުޅުމާލޭގައި ދުވާލަކު 10،000 ޓަނުގެ ފެން އުފެއްދުމަށް ބޭނުންވާ އިމާރާތުގެ އަމަލީ މަސައްކަތް އެ ކުންފުނިން ފެށީ މިދިޔަ އަހަރުގެ އޮގަސްޓު މަސް ތެރޭގަ އެވެ. އެ މަސައްކަތުގެ ދަށުން އެމްޑަބްލިޔުއެސްސީން މިދިޔަ އަހަރު 5000 ޓަނުގެ ފެން އުފައްދާ އެއް ޕްލާންޓްގެ މަސައްކަތް ނިންމާ ބޭނުން ކުރަން ފަށާފައިވާއިރު މިހާރު މިވަނީ 5000 ޓަނުގެ ފެން އުފައްދާ އަނެއް ޕްލާންޓްވެސް ބޭނުން ކުރަން ފަށާފަ އެވެ.