ޖަރުމަންވިލާތުގައި ކުރިއަށްދާ މިއުނިކް ސެކިއުރިޓީ ކޮންފަރެންސްގައި ޚާރިޖީ ވަޒީރު ޑރ. އަބްދުﷲ ޚަލީލް ބައިވެރިވެވަޑައިގަންނަވާނެ ކަމަށް ޚާރިޖީ ވުޒާރާއިން ބުނެފިއެވެ.
މިމަހުގެ 13އިން 15އަށް ޖަރުމަންވިލާތުގެ މިއުނިކްގައި ކުރިއަށްގެންދާ މި ކޮންފަރެންސަކީ ބައިނަލްއަޤްވާމީ ރައްކާތެރިކަމުގެ ސިޔާސަތާއި ގުޅޭ މުހިންމު މަޝްވަރާތަކެއް ކުރިއަށްގެންދިއުމަށް ބާއްވާ ކޮންފަރެންސެކެވެ.
މި ކޮންފަރެންސްގައި ބައިވެރިވެވަޑައިގަތުމަށް ޚާރިޖީ ވަޒީރު ވަނީ މިއުނިކަށް ވަޑައިގެންފައެވެ. ބައިނަލްއަޤްވާމީ ސަލާމަތާއި ރައްކާތެރިކަމުގެ ދައިރާގެ މި ބޮޑު ކޮންފަރެންސްގައި ރާއްޖޭ ތަމްސީލް ކުރައްވަން ޚާރިޖީ ވަޒީރު ހަމަޖެހިފައިވާއިރު، އެއް ވިސްނުމެއްގައި މަސައްކަތް ކުރާ ޤައުމުތަކާއެކު ގުޅުން ބަދަހިކުރުމަށް މަޝްވަރާ ކުރެވޭނެ ކަމަށް ޚާރިޖީ ވުޒާރާއިން ބުނެފައިވެއެވެ. އަދި ދޭދޭ ޤައުމުތަކާއި މެދު އޮންނަ ގުޅުން އިތުރަށް ބަދަހިކުރަން މަސައްކަތް ކުރެވޭނެ ކަމަށް ޚާރިޖީ ވަޒީރު ފާހަގަކުރެއްވިއެވެ.
ޚަރިޖީ ވަޒީރު މިއުނިކް ކޮންފަރެންސްގައި ބައިވެރިވަޑައިގަންނަވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޖަރުމަންވިލާތަށް ކުރެއްވި ދަތުރުފުޅުގައި އަރިހުގައި ބައިވެވެވަޑައިގަތުމަށް ފަހުއެވެ. ރައީސުލްޖުމްހޫރިއްޔާގެ ދަތުރުފުޅު މިހާރު ވަނީ ނިންމަވާލާ ރާއްޖެ ވަޑައިގެންފައެވެ.