އުންމީދަކީ ތެދު މަޢުލޫމާތު ހަރުދަނާކަމާއެކު ފޯރުކޮށްދިނުމުގައި ރޭޑިއޯގެ ދައުރު ފުޅާވެގެން ދިއުންކަމަށް މޯލްޑިވްސް މީޑިއާ އެންޑް ބްރޯޑް ކާސްޓިންގ ކޮމިޝަން(އެމްއެމްބީސީ) އިން ބުނެފިއެވެ.
މިއަދު ފާހަގަކުރަމުން އަންނަ ރޭޑިއޯ ދުވަހުގެ މުނާސަބަތުގައި އެމްއެމްބީސީ އިން ނެރުނު ހިޠާބެއްގައި އެ ކޮމިޝަނުގެ ނައިބު ރައީސް ޒަމްއަތު އަހުމަދު ވަހީދު ވިދާޅުވީ ދުނިޔޭގެ މުވާސަލާތީ ނިޒާމަށް 19ވަނަ ގަރުނުގައި އައި އެންމެ ބޮޑު އިންގިލާބުކަމުގައިވާ ރޭޑިއޯގެ ޚިދުމަތް ރާއްޖޭގައި ދެމުން ގެންދާތާ މިހާރު 64 އަހަރަށްވުރެ ގިނަ ދުވަސް މި ވަނީ ވެފައި ކަމަށެވެ.
އަަޅުގަނޑުމެންގެ ދުވަސް ފެށިގެން އަންނަނީ ފަތިހުގެ ހިތްގައިމު އަޑުން ކަމަށާއި ހާލާއި، ކޮވެލީގެ ރީތި ގުދުރަތީ އަޑުތަކުން، ފުންނިދީގައިވާ މީހުން ހޭލައްވައި، ގަޑީން ވީއިރު ބުނެދީ، ކީރިތި ޤުރްއާނުގެ ބަރަކާތުން ދުވަސްފެށިގެން އަންނަ ހިތްފަސޭހަ އަޑުތައް ރާއްޖޭގެ ކޮންމެ ރަށެއްގެ ކޮންމެ ގެއެއްގެ ތެރެއިން އިވިގެންދަނީ ރޭޑިއޯގެ ޒަރިއްޔާއިން ކަމަށް އެ ހިޠާބުގައި ވިދާޅުވެފައި ވެއެވެ. އެއީ 1962ގައި ދިވެހި ރާއްޖެއަށް ރޭޑިއޯ ތަޢާރަފްވެ، ރޭޑިއޯއިން ދެމުންދާ ޚިދުމަތްތައް ފުޅާވަމުންދިޔައިރު، އަޅުގަނޑުމެންގެ ކުޑައިރުގެ ހަނދާންތައް ކަމަށް އެ ހިޠާބުގައި ވަނީ ފާހަގަކޮށްފައެވެ.
ބައިނަލްއަޤްވާމީ ގޮތުން ރޭޑިއޯ ދުވަސް ފާހަގަކުރަނީ ކޮންމެ އަހަރެއްގެވެސް ފެބްރުވަރީ މަހުގެ 13ވަނަ ދުވަހު އެވެ. ޒަމްއަތު ވިދާޅުވީ މިއަދު އަޅުގަނޑުމެން މި ދުވަސް ފާހަގަކުރަމުންދާއިރު، ރާއްޖޭގައި ލައިސަންސް ދީގެން 2 ރޭޑިއޯ ޗެނަލް އޮޕަރޭޓް ކުރަމުންދާ ކަމަށާއި ދިވެހިންގެ ދިރިއުޅުމުގެ ވަރަށް މުހިންމު ބައެއް ހިއްސާކުރާ ރޭޑިއޯއިން ރަށްތައް ގުޅުވައިދީ، ތަފާތު ކަންކަމަށް ރައްޔިތުން ލޯހުޅުވައިދޭ ކަމަށެވެ.
ރޭޑިއޯއަކީ ކާރިސާތަކާއި ހާދިސާތަކުގެ ވަގުތުތަކުގައި ރައްޔިތުންނަށް އެންމެ އަވަހަށް އެ މަޢުލޫމާތު ފޯރުކޮށްދީ، އިރުޝާދުދީ، ޚަބަރާއި މަޢުލޫމާތާއި މުނިފޫހިފިލުވުމުގައިވެސް މުހިންމު ދައުރެއް އަދާކުރާ ވަސީލަތެއް ކަމަށް ޒަމްއަތު ވިދާޅުވިއެވެ.
"އަޅުގަނޑުމެންގެ ޤައުމުފަދަ، ކުޑަ ޖަޒީރާ ޤައުމަކަށް މިއީ ކިހާ މުހިންމު ވަސީލަތެއްކަން އެނގިގެން ދިޔައީ މި ފަހުގެ ތާރީޚަކަށް ބަލާއިރު 2004ވަނަ އަހަރު ކުރިމަތިވި، ސުނާމީ ކާރިސާއިން. މުވާސަލާތީ ވަސީލަތްތަކުގެ ޚިދުމަތްތައް މެދުކެނޑިގެން ދިޔަ ވަގުތު، މި ކާރިސާގެ ތަފްސީލުތައް ވަގުތުން ވަގުތަށް، ރާއްޖޭގެ އެކި ކަންކޮޅުތަކަށް ގެނެސްދެއްވައި، ރާއްޖޭގެ އެކި ކަންކޮޅުތަކުގައިވާ ރައްޔިތުންގެ އަޑުތައް ގުޅުވައި ދިނީ ރޭޑިއޯ މެދުވެރިކޮށް، ދިވެހިރާއްޖޭގެ އަޑުން. ދިވެހިރާއްޖޭގެ އަޑުގެ މުވައްޒަފުން އެދުވަހުވެސް ދެއްވި ޤައުމީ ޚިދުމަތަކީ ދިވެހިލޭ ހިނގާ ކޮންމެ ދަރިއެއްގެ ހިތުގައި އަބަދުވެސް ޝުކުރުވެރިކަމާއެކު އެކަން ފާހަގަކުރާނެކަމެއްކަން ޔަޤީން." ޒަމްއަތު ވިދާޅުވިއެވެ.
ސުނާމީ ކާރިސާފަދަ ކާރިސާތަކާއި، މި ނޫންވެސް ތަފާތު ހާލަތްތަކުގައި ރޭޑިއޯގެ ދައުރު ފުޅާވެފައި މުހިންމުކަން ހާމަކޮށްދޭ ކަމަށާއި 1962ވަނަ އަހަރުން ފެށިގެން ދިވެހިންގެ ދިރިއުޅުމުގެ ކޮންމެ ވަގުތަކީ ރޭޑިއޯގެ އަޑާ ގުޅިފައި އޮތް ވަގުތެއް ކަމަށް ޒަމްއަތުގެ ހިޠާބުގަައި ވިދާޅުވިއެވެ.
މުޅި މުޖުތަމަޢު ބިނާކުރުމަށް ރޭޑިއޯ ކޮށްދިން ޚިދުމަތްތަކަކީ ތާރީޚުން ފުހެވޭނެ ކަންކަމެއް ނޫންކަން އެންމެހައި ރައްޔިތުން ގަބޫލުކުރާނެ ކަމަށާއި ބްރޯޑްކާސްޓަރުން ޓެކްނޮލޮޖީ ބާރު ދުވެއްޔެއްގައި ކުރިއަރަމުންދާ މިފަދަ ޒަމާނެއްގައި، ރޭޑިއޯވެސް މި ވަނީ ވަރަށް ބޮޑަށް ކުރިއަރާފައި ކަމަށް އެ ހިޠާބުގަައި ވިދާޅުވިއެވެ.
"ކުރިން ހަމައެކަނި އެންޓަނާ މެދުވެރިކޮށް އަޑުއެހި ރޭޑިއޯ، މިއަދު އިންޓަނެޓާއި މޮބައިލް އެޕްލިކޭޝަންތައް މެދުވެރިކޮށް ދުނިޔޭގެ ކޮންމެ ތަނެއްގައި ހުރެގެންވެސް އަޑުއަހާލެވޭ. ޕޮޑްކާސްޓްތަކާއި ޑިޖިޓަލް ބްރޯޑްކާސްޓިންގގެ ސަބަބުން ރޭޑިއޯގެ އަޑު މިއަދު މިވަނީ ކުރިއަށްވުރެ ސާފުވެ، ފަސޭހައިން ލިބޭނެ މަގު ފަހިވެފައި." އެ ހިޠާބުގަައި ވިދާޅުވިއެވެ.
ދިވެހިރާއްޖޭގެ މީޑިއާތަކުގެ ބެލެނިވެރިފަރާތުގެ ހައިސިއްޔަތުން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން، އެމްއެމްބީސީގެ އަމާޒަކީ މި ވަސީލަތް މެދުވެރިކޮށް އާއްމު މަސްލަހަތު ހިމާޔަތްކޮށް، އިސްލާމްދީނުގެ އަސާސްތައް ދަމަހައްޓައި، ދުސްތޫރީ ހަމަތައް ހިފަހައްޓައި، ދިވެހި ބަހާއި ސަގާފަތް ކުރިއެރުވުމުގެ ވަސީލަތެއްކަން ކަށަވަރުކޮށް، މި ދާއިރާގެ ޚިދުމަތްތެރީންނަށް އިތުރަށް ބޭނުންވާ ތަޢުލީމާއި ތަމްރީނުގެ ފުރުސަތުތައް ފަހިކޮށްދީ، މިނޫންވެސް އެކި ގޮތްގޮތުން އެހީތެރިވެވޭނޭ ގޮތްތައް ބަލައި އެހީތެރިކަން ފޯރުކޮށްދިނުން ކަމަށް އެމްއެމްބީސީގެ ހިޠާބުގައި ވިދާޅުވެފައި ވެއެވެ.
އެ ހިޠާބުގައި ވިދާޅުވީ ހަބަރާއި މަޢުލޫމާތު ގެނެސްދޭ މިފަދަ ވަސީލަތްތަކަކީ، ޚިޔާލު ފާޅުކުރުމުގެ މިނިވަންކަމުގެ ތެރެއިން ޚަބަރާއި، ޚިޔާލާއި މަޢުލޫމާތުތައް އިންސާފުވެރި އަދި އިޚްތިރާމް ލިބިގެންވާ ގޮތެއްގައި ފޯރުކޮށްދޭ ވަސީލަތްތަކަށްވާންވާނެ ކަމަށެވެ.
ރޭޑިއޯ ދުވަހަކީ އަޅުގަނޑުމެން އެކަކު އަނެކެއްގެ ކަރާމަތާއި، ޒިންމާތަކުގެ ހަނދާންތައް އައު ކޮށްދޭ ދުވަހެއްގެ ގޮތުގައި ބަލައި، އެއްބައިވަންތަ މުޖުތަމައެއް ބިނާކޮށް، ތެދު ޚަބަރާއި މަޢުލޫމާތު ގެނެސްދިނުން ކަށަވަރުކޮށް، އަހަރުގެ ކޮންމެ ދުވަހަކީވެސް މިފަދައިން ކުރިއަށްދާ ދުވަހަކަށް ހަދަންޖެހޭ ކަމަށްވެސް އެ ހިޠާބުގައި ވިދާޅުވެފައި ވެއެވެ.
ރޭޑިއޯ ދުވަސް މިއަދު ފާހަގަކުރަމުންދާއިރު، ޤައުމު ބިނާކުރުމުގައި ހިތްވަރާއެކު ރޭޑިއޯގެ ޚިދުމަތް ފޯރުކޮށްދެއްވާ އެންމެހައި ފަރާތްތަކަށް ޚާއްސަ ޝުކުރެއް ދަންނަވާ ކަމަށާއި ހަމައެއާއިއެކު ރޭޑިއޯގެ ޒަރިއްޔާއިން ގެނެސްދޭ ޚަބަރާއި، މައުލޫމާތާއި، ތަފާތު ޕްރޮގްރާމްތަކަށް، ލޮބުވެތި އެހުންތެރިން ދެއްވާ ޝައުގުވެރިކަމަކީ މި ދާއިރާ ދެމިއޮތުމުގެ އަސްލު ކަމަށްވެސް އެ ހިޠާބުގައި ވަނީ ވިދާޅުވެފައެވެ.
އަޅުގަނޑުމެންގެ އުންމީދަކީ ރައްޔިތުން ބިނާކުރުމާއި ތެދު މަޢުލޫމާތު ހަރުދަނާކަމާއެކު ފޯރުކޮށްދިނުމުގައި ރޭޑިއޯގެ ދައުރު އިތުރަށް ފުޅާވެގެން ދިއުން ކަމަށްވެސް އެ ހިޠާބުގައި ވިދާޅުވެފައި ވެއެވެ.
މީގެ އިތުރުން އެ ހިޠާބު ނިންމާލާފައި ވަނީ ރާއްޖޭގެ ރޭޑިއޯ ބްރޯޑްކާސްޓިންގ ދާއިރާއަށް އިތުރު ކުރިއެރުމާއި ކާމިޔާބީ މިންވަރުކުރެއްވުން އެދެމުންނެވެ.