ދ. މީދޫގައި އަލަށް ގާއިމުކުރި ވޮލީކޯޓް، ރައީސް ޑރ.މުހައްމަދު މުއިއްޒުގެ އަނބިކަނބަލުން، ސާޖިދާ މުހައްމަދު ރަސްމީކޮށް ހުޅުއްވައިދެއްވައިފިއެވެ.
ރައީސް އޮފީހުން ބުނީ ވޮލީކޯޓް ރަސްމީކޮށް ހުޅުވުމަށް ބޭއްވި ރަސްމިއްޔާތަށް އެކަމަނާ ވަޑައިގަތުމުން މަރުހަބާ ދެންނެވީ ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއުއާއި އެވުޒާރާގެ އިސްވެރިން އަދި ރަށުގެ މުއައްސާތަކުގެ އިސްވެރިން ކަމަށެވެ.
ކޯޓު ހުޅުވުމުގެ ގޮތުން މީދޫގެ ޒުވާން އަންހެން ކުދިންގެ މެދުގައި ކުޅުނު އެކުވެރިކަމުގެ މެޗު އެކަމަނާ ވަނީ ބައްލަވާލައްވާފައި ކަމަށް ބުނެއެވެ.
ސަރުކާރުން ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އާ ހަވާލުކޮށްގެން ކުރިއަށްގެންދިޔަ މި މަޝްރޫއުގެ އަމަލީ މަސައްކަތް ފަށާފައިވަނީ ފާއިތުވި އަހަރުގެ ޑިސެމްބަރު މަހުގެ ދެވަނަ ދުވަހުއެވެ. ގާތްގަނޑަކަށް ދެމަސް ދުވަހުގެ ތެރޭގައި މި މަސައްކަތް ނިންމާލާފައިވަނީ ޒަމާނީ ފެންވަރަށެވެ.
އަދި މިކަމާ ގުޅިގެން އާރްޑީސީ އިން އެކްސް ގައި އާންމުކޮށްފައިވާ ޕޯސްޓެއްގައި ބުނީ މި މަޝްރޫއުގެ މައިގަނޑު މަސައްކަތްތައް އެ ކޯޕަރޭޝަނުން ނިންމާލާފައަިވަނީ 11 ދުވަހުގެ ތެރޭގައި ކަމަށެވެ.
މި ވޮލީކޯޓަކީ މީދޫގައި ގާއިމުކުރި މިފަދަ ފުރަތަމަ ކޯޓެވެ. އަދި މި މަޝްރޫއަކީ ރާއްޖޭގެ ހުރިހާ ރަށެއްގައި ކުޅިވަރުގެ ވަސީލަތްތައް ގާއިމުކުރުމަށް ސަރުކާރުން ފައްޓާފައިވާ ބިޔަ މަޝްރޫއުގެ ބައެކެވެ. މި މަޝްރޫއުގެ ދަށުން ރާއްޖޭގެ އެކި ކަންކޮޅުތަކުގައި ކުޅިވަރު ދަނޑުތަކާއި، ކޯޓުތަކުގެ އިތުރުން ޓްރެކްތައް އެޅުމުގެ މަސައްކަތް ސަރުކާރުގެ ކުންފުނިތަކާ ހަވާލުކޮށްގެން ދަނީ ކުރަމުންނެވެ.
ރާއްޖޭގެ އާބާދީއަކީ ހަށިހެޔޮ ދުޅަހެޔޮ، އަދި ކަސްރަތަށް ލޯބިކުރާ ބަޔަކަށް ހެދުމަކީ ސަރުކާރުގެ އަމާޒެވެ. މިގޮތުން އެކުލަވާލާފައިވާ ދިގު ރާސްތާ ޕްލޭންގެ ދަށުން، ދިރިއުޅުމުގެ ވައްޓަފާޅިއާ ގުޅިފައިވާ ގައިންގަޔަށް ނާރާ ބަލިތަކުން ރައްޔިތުން ސަލާމަތްކުރުމަށް ސަރުކާރުން އިސްކަންދޭކަން ފާހަގަކުރެވެއެވެ.