ކުޑަކުއްޖަކު ގްރޫމްކޮށް، އެކްސްޕްލޮއިޓްކޮށް އެ ކުއްޖާއަށް ޖިންސީ ގޯނާކުރި ކަމުގެ ތުހުމަތުގައި ދެމީހަކު ހައްޔަރުކޮށްފިއެވެ.
ފުލުހުން ބުނީ ފެމިލީ އެންޑް ޗައިލްޑް ޕްރޮޓެކްޝަނާއި، ކްރައިމް އިންޓެލިޖެންސް އަދި އަތޮޅު ތެރޭގެ ޕޮލިސް ސްޓޭޝަނެއް ގުޅިގެން ހާއްސަ އޮޕަރޭޝަނެއް ކުރިއަށް ގެންގޮސްފައިވާ ކަމަށެވެ. އަދި މި އޮޕަރޭޝަނުގައި ކުޑަކުއްޖަކު ގްރޫމްކޮށް، އެކްސްޕްލޮއިޓްކޮށް އެ ކުއްޖާއަށް ޖިންސީ ގޯނާކުރި ކަމުގެ ތުހުމަތުގައި ހދ. ކުޅުދުއްފުށި / ސިލްވަރސްޓަރ، އުމުރުން 44 އަހަރުގެ އަލީ ޙަސަނާއި، ހދ. ކުޅުދުއްފުށި / ކަސްތޫރިގެ، އުމުރުން 21 އަހަރުގެ މުޙައްމަދު އިޙްސާން ހައްޔަރުކޮށްފައިވާ ކަމަށެވެ.
ފުލުހުން ބުނީ މި މައްސަލާގައި ހިމެނޭ އަލީ ޙަސަން ހައްޔަރުކޮށްފައިވަނީ މިދިޔަ އަހަރުގެ ޑިސެމްބަރު މަހުގެ 24 ވަނަ ދުވަހު ކަމަށެވެ. އަދި އޭނާ ބަންދުގައި ބެހެއްޓުމަށް ކޯޓުން ދީފައިވާ މުއްދަތު އަންނަ މާރިޗު މަހުގެ 1 ވަނަ ދުވަހަށް ހަމަވާނެ ކަމަށެވެ.
މީގެ އިތުރުން މައްސަލައާ ގުޅިގެން މުޙައްމަދު އިޙްސާން ހައްޔަރުކޮށްފައިވަނީ 2026 ފެބުރުވަރީ 3 ވަނަ ދުވަހު ކަމަށްވާއިރު، އޭނާގެ ބަންދުގެ މުއްދަތު ހަމަވާނީ 2026 މާރިޗު 6 ވަނަ ދުވަހަށް ކަމަށްވެސް ފުލުހުން ބުނެފައިވެއެވެ.