މާލޭގެ ކަނޑުތޮށި މަރާމާތުކުރުމުގެ މަސައްކަތް ފަށަން ތައްޔާރުވުމަށް ޖަޕާނުގެ ކުންފުންޏަކާއެކު ދިވެހި ސަރުކާރުން އެއްބަސްވުމެއްގައި ސޮއިކޮށްފި އެވެ.
މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗާރ އިން މިއަދު ނެރުނު ބަޔާނެއްގައި ބުނީ ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމުގެ ދަށުން ކުރިއަށް ގެންދިއުމަށް ހަމަޖެހިފައިވާ "ޕްރޮޖެކްޓް ފޮރ ޑިޒާސްޓަރ ރެޒިލިއެންސް އެންހޭންސްމަންޓް އިން މާލެ އައިލެންޑް "ގެ އަމަލީ މަސައްކަތުގެ ފުރަތަމަ ފިޔަވަހި ފެށުމަށް ޖަޕާނުގެ ޓޯޔޯ ކޮންސްޓްރަކްޝަން ކޮމްޕެނީ ލިމިޓެޑާ އެކު އެއްބަސްވުމުގައި ސޮއިކޮށްފައިވާ ކަމަށެވެ.
މި އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް އިބްރާހީމް ޠަޢާމު މުޙައްމަދެވެ. އަދި ޓޯޔޯ ކޮންސްޓްރަކްޝަން ކޮމްޕެނީ ލިމިޓެޑްގެ ފަރާތުން ސޮއިކުރެއްވީ ޑެޕިއުޓީ ޖެނެރަލް މެނޭޖަރ، މިސްޓަރ އިޒާވާ ކަން، އެވެ.
މި އެއްބަސްވުމުގެ އަގަކީ 700 މިލިއަން ޖަޕަނީޒް ޔެން (70.8 މިލިއަން ރުފިޔާ) އެވެ.
މިނިސްޓްރީން ބުނީ މި އެއްބަސްވުމުގެ މުއްދަތަކީ އެއް އަހަރާއި ހަތަރު މަސްދުވަސް ކަމަށެވެ.
މި އެއްބަސްވުމުގެ ދަށުން ކުރެވޭނެ މައިގަނޑު މަސައްކަތްތަކަކީ މާލޭގެ އިރުމައްޗާއި އުތުރު ފަރާތުގެ ތޮށި މަރާމާތުކޮށް އަލުން ހެދުމެވެ.
މިދިޔަ އަހަރުގެ ޖުލައި މަހު ޖަޕާނު ސަރުކާރުން ވަނީ"ޑިޒާސްޓާ ރެޒިލިއަންސް އެންހޭންސްމަންޓް އިން މާލެ އައިލެންޑް"ގެ ނަމުގައި ކުރިއަށް ގެންދާ މަޝްރޫއުގެ އިމާރާތް ކުރުމުގެ މަރުހަލާއަށް 10.5 މިލިއަން ޑޮލަރު (161.9 މިލިއަން ރުފިޔާ)ގެ އެހީއެއް ދީފައެވެ.