ރަސްމާލޭގެ ހިއްކުމުގެ މަސައްކަތުގެ ދަށުން ސައިޓްއޭގެ 116 ހެކްޓަރުގެ ބިން ހިއްކާ ނިމިފައިވާ ކަމަށް އެ މަސައްކަތުގެ ކޮންޓްރެކްޓަރު ބުނެފިއެވެ.
އެމްއޭސީއެލް އިން މިއަދު ބުނީ ސައިޓްއޭ ގައި ހިމަނައިގެން 137.5 ހެކްޓަރުގެ ބިން ހިއްކުމަށް ހަމަޖެހިފައިވާ ކަމަށެވެ. އެގޮތުން މިހާތަނަށް ސައިޓްއޭ ގެ 116 ހެކްޓަރުގެ ބިން ހިއްކާ ނިމިފައިވާ ކަމަށް އެ ކުންފުނިން ހާމަކުރެއެވެ. އެމްއޭސީއެލުން ބުނީ މިއީ އެ ސައިޓުގެ ޖުމްލަ މަސައްކަތުގެ 84 އިންސައްތަ ކަމަށެވެ.
ރަސްމާލެ މަޝްރޫޢުގެ އަމަލީ މަސައްކަތް ފުރަތަމަ ފެށީ 2023 އަހަރުގެ ޑިސެމްބަރު މަހުގެ 18ވަނަ ދުވަހުއެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ރާއްޖޭގައި ހިންގޭ އެންމެ ބިޔަ މަޝްރޫއު ކަމަށްވާ ރަސްމާލެ މަޝްރޫޢުގެ ދަށުން ޖުމްލަ 25,000 ގޯތި ދޫކުރުމަށް ސަރުކާރުން ވަނީ ނިންމާފައެވެ.
ރަސްމާލޭގެ ބިން ހިއްކުމުގެ މަސައްކަތް އަވަސް ކުރުމަށް މިހާރު ކުރިއަށް ގެންދަނީ ދުނިޔޭގައި ބިން ހިއްކުމުގައި ހަރަކާތްތެރިވާ އެންމެ ބޮޑު އެއް ޑްރެޖަރު ކަމަށްވާ "ކްރިސްޓޯބަލް ކޮލޯން" ބޭނުންކުރަމުންނެވެ. މިއީ، 46،000 ކިއުބިކް މީޓަރުގެ ވެލި ބަރުކުރެވޭ އުޅަނދެކެވެ.
މި ސަރުކާރުގެ އަމާޒަކީ ރަސްމާލެ ހިއްކުމުގެ ބިޔަ މަޝްރޫޢު އަންނަ އަހަރުގެ އޭޕްރިލް މަހުގެ ނިޔަލަށް ހުރިހާ މަސައްކަތެއް އެއްކޮށް ނިންމާލުމެވެ.