ހުކުމް ތަންފީޒުކުރަމުން ދަނިކޮށް، މި މަހު ނިޔާވި ދެ ގައިދީންގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ފޮނުވާފައިވާކަމަށް ފުލުހުން މިއަދު ބުނެފިއެވެ.
އެ ދެ މީހުންވެސް ނިޔާވެފައި ވަނީ މި މަހުގެ ދެ ވަނަ ދުވަހު އެވެ.
ހުކުމް ތަންފީޒުކުރަމުން ދަނިކޮށް ނިޔާވި ދެ ގައިދީންނަކީ އައިޖީއެމްއެޗްގައި އެޑްމިޓްކޮށްގެން ފަރުވާ ދެމުން ދިޔަ ދަފްތަރު ނރ. 439، އުުމުރުން 53 އަހަރުގެ އިބްރާހިމް ސުޙެއިލް އާއި، ހުޅުމާލޭ ހޮސްޕިޓަލްގައި ފަރުވާ ދެމުން ދިޔަ ސ. ހިތަދޫ، ދިއްގާގަސްދޮށުގެ، އުމުރުން 45 އަހަރުގެ ޙަސަން ނިޔާޒްއެވެ. ޑޮކްޓަރުންނާ ހަވާލާދީ ކަރެކްޝަނުން އޭރު ބުނީ އިބްރާހިމް ސުޙެއިލް ނިޔާވެފައި ވަނީ ސިއްޙީ ހާލު ދެރަވުމުން އައިޖީއެމްއެޗްގައި އެޑްމިޓްކޮށްގެން ފަރުވާ ދެމުން ގެންދާތާ ހަފްތާއެއް ފަހުން ނިއުމޯނިއާ ޖެހިގެން ކަމަށެވެ.
މީގެ އިތުރުން ޙަސަން ނިޔާޒް ނިޔާވީ އޭނާއަށް ކުއްލި މެޑިކަލް އިމަރޖެންސީއެއް ދިމާވެ، ހުޅުމާލޭ ހޮސްޕިޓަލުގައި އަވަސް ފަރުވާދެމުން ދަނިކޮށް ކަމަށް ޑޮކްޓަރުންނާ ހަވާލާދީ ކަރެކްޝަނުން ބުނެފައި ވެއެވެ.
މިދިޔަ އާދީއްތަ ދުވަހު ފުލުހުން ބުނީ މި ދެ މައްސަލަވެސް ތަހުގީގު ކުރަމުން އަންނަ ކަމަށާއި ނިޔާވި ދެ މީހުންގެ ހަށިގަނޑުގެ އޮޓޮޕްސީ ހެދުމަށް ނިންމާފައިވާ ކަމަށެވެ.
އެކަމާއި ގުޅިގެން ފުލުހުން މިއަދު ބުނީ އެ ދެ މީހުންގެ ހަށިގަނޑުގެ އޮޓޮޕްސީ ހެދުމަށް 2026 ފެބްރުއަރީ 11 ވަނަ ދުވަހު ވަނީ އިންޑިއާއަށް ގެންގޮސްފައި ކަމަށެވެ.