ރައްޔިތުންގެ މަޖިލީހުގައި ތިއްބަވާ އިދިކޮޅު އެންމެ ބޮޑު ޕާޓީ އެމްޑީޕީގެ މެންބަރުންގެ ބޮލުގައި "ލާދީނީ" ޓެގު އެޅުވުން ގާނޫނަކުން ނޫނީ އެކަން މަޖިލީހުގައި ނުހުއްޓުވޭނެ ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުالله ވިދާޅުވެއްޖެއެވެ.
މިއަދުގެ ޖަލްސާގައި މިސްކިތްތަކަށް ގެއްލުންދިނުމަކީ ޓެރަރިޒަމްގެ އަމަލެއްގެ ގޮތުގައި ކަނޑައެޅުމަށް މިދިޔަ ނޮވެންބަރު މަހު ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވިޓެރަރިޒަމް މަނާކުރުމުގެ ޤާނޫނަށް އިޞްލާޙު ގެނައުމުގެ ބިލުގެ ބަހުސް ވަނީ ކުރިޔަށް ގެންގޮސްފަ އެވެ.
މި ބިލަށް ބަހުސް ކުރައްވަމުން އެމްޑީޕީ އަށް ނިސްބަތްވާ މީހުންނާ ދިމާއަށް ލާދީނީ ކިޔުން ހުއްޓުވުމަށް މުހައްމަދު އިބްރާހިމް އެދިވަޑައިގެންނެވިއެވެ.
މިފަދައިން އެ މެމްބަރު ވިދާޅުވީ، އެ ބިލަށް ބަހުސްކުރައްވަމުން ބިލަށް ތާއީދުކުރައްވާކަން ހާމަކުރެއްވުމަށް ފަހު، ވެރިކަންކުރާ ޕީއެންސީގެ ޕާލަމެންޓަރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާޙް އެމްޑީޕީގެ މިދިޔަ ސަރުކާރުގައި މިސްކިތްތަކުގައި މަސްތުވާތަކެތި ބޭނުންކޮށް ރާ ބޮއެ މީހުން ނިދާ ދަރަޖައަށް ދިޔަ ކަމަށާއި، ނަމަވެސް ކޯޓުން ވެސް އެ ކުށްތަކުގެ ތުހުމަތުވާ ފަރާތްތައް ދޫކޮށްލީ ކަމަށް ވިދާޅުވެ، އެމްޑީޕީއަކީ އަބަދު ވެސް ލާދީނީ ފިކުރުގެ ބައެއްގެ ގޮތުގައި ފަލާހު ވިދާޅުވުމުންނެވެ.
އެހެން ކަމުން އެ ކަމާ މެދު ކަންބޮޑުވުން ފާޅުކުރައްވައި މެމްބަރު ވަނީ އެކަން ހުއްޓުވައިދިނުމަށް ރިޔާސަތުގައި އެދިވަޑައިގެންފައެވެ.
މެމްބަރުގެ ވާހަކަ އާއި ގުޅިގެން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުالله ވަނީ އެކަން ކުރަން ބޭނުންވާނަމަ، ލާދީނީ ކިޔުން މަނާ ކުރާ ބިލެއް މަޖިލީހަށް ހުށަހެޅުއްވަން އެދިވަޑައިގެންފައެވެ. އަދި އެފަދަ ބިލެއް ހުށަހެޅި އެކަން މަނާ ނުވާހާ ހިނދަކު ލާދީނީ ކިޔުން ނުހުއްޓުވޭނެ ކަމަށްވެސް އަބްދުއްރަހީމް ވިދާޅުވުއެވެ.
މި ބިލަށް ބަހުސް ކުރައްވައި އެމްޑީޕީގެ ޕާލަމެންޓަރީ ގްރޫޕުގެ ޑެޕިއުޓީ ލީޑަރު، ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވީ، އެއް މުސްލިމަކު އަނެއް މުސްލިމަކާ ދިމާލަށް ލާދީނީ ގޮވުމުގެ ހައްގެއް ނޯންނާނެ ކަމަށާއި، ހަމަ އެހެންމެ ރައްޔިތުންގެ މަޖިލީހުގެ ގަވާއިދުގައި އޮތްގޮތުން އިސްލާމްދީނާ ހިލާފު އެއްވެސް ވާހަކައެއް ނުދެއްކޭނެކަމަށެވެ. އަދި ދައުލަތުގެ ތިން ބާރުގެ ތެރެއިން އެއް ބާރުގެ ވެރިއަކީ އަބްދުއްރަޙީމް ކަމަށާއި، އެހެން ކަމުން ގައުމުގައި ހިނގާ ކަންކަމުގެ ޒިންމާ އަބްދުއްރަޙީމް ވެސް ނަންގަވަން ޖެހޭނެ ކަމަށް ވެސް ޒިޔާދު ވިދާޅުވިއެވެ.