ރޯދަމަހަށް ތައްޔާރުވުމަށް ތަކެތި ގަތުމުގައި އަވަދިނެތި އުޅޭއިރު، ސްކޭމަރުން މިފަދަ ދަނޑިވަޅުތަކުގެ ފައިދާ ނަގައި މަކަރާއި ހީލަތުން ފައިސާ ހޯދުމަށް މަސައްކަތް ކުރަމުން ދާކަމަށް މޯލްޑިވްސް ޕޮލިސް ސާވިސް އިން ބުނެފިއެވެ.
ފުލުހުން އެކްސްގައި ކޮށްފައިވަ ޕޯސްޓެއްގައި ބުނީ މިކަމުން ރައްކާތެރިވުމަށްޓަކައި އެންޓި ސްކޭމް ސެންޓަރުގެ ސީނިއާ ސާޖަންޓް އަބްދުﷲ ޝަހުނީޒު ދެއްވާ އިރުޝާދުތަކަށް ފުރިހަމައަށް ސަމާލުކަން ދިނުމަކީ ވަރަށް މުހިންމު ކަމެއް ކަމަށެވެ.
އޮންލައިން މަންސަ ތަކުގައި ކުރާ ސްކޭމްތަށް އިތުރުވެފައިވާކަން ފާހަގަކޮށް ޝަހުނީޒު ވިދާޅުވީ އަސްލު ވިޔަފާރިއެއްތޯ ކަށަވަރުނުކޮށް، މުދާ ލިބުމުގެ ކުރިން ފައިސާ ނުފޮނުވާން ސަމާލުވާން ޖެހޭކަމަށެވެ.
ޝަހުނީޒު ވަނީ ހުރިހާ ރައްޔިތުންވެސް ފައިސާ ދެއްކުމުގެ ކުރިން ވިޔަފާރި އަކީ ސައްހަ ވިޔަފާރިއެއްކަން ކަށަވަރު ކުރުމަށް އިލްތިމާސް ކުރައްވާފައެވެ. އަދި އޭނާ ވިދާޅުވީ ބިޒްނަސް ޕޯޓަލްގެ ތެރެއިން ރަޖިސްޓްރީކޮށްފައިވާ ވިޔަފާރިއެއްކަން ކަށަވަރު ކުރެވޭނެ ކަމަށެވެ.
މީގެ އިތުރުން އޭނާ ވަނީ ފަރުދުންގެ އެކައުންޓް ތަކަށް ފައިސާ ނުފޮނުވުމަށް އިލްތިމާސްކޮށްފައެވެ. އެގޮތުން ވިޔަފާރި އެކައުންޓް އެއްކަން ޔަގީން ކޮށް، މުދާ ލިބުމަށް ފަހު ފައިސާ ފޮނުވުމަށް އޭނާ އިލްތިމާސް ކުރެއްވިއެވެ.