އީޖާދީ މަސައްކަތްތަކުގައި އަންހެން ކުދިންނަށް ކުރިއަށް ދިއުމުގައި ހުރި ހުރަސްތައް ނައްތާލާ، ޤައުމުގެ ތަރައްޤީއަށް ބޭނުންވާ މިފަދަ މަސައްކަތްތަކުގައި ކުރިއަރާ ދިއުމުގެ އެންމެހާ މަގުތައް ކޮށައިދީ، އެކަމަށް ބެނުންވާ ފުރިހަމަ އެއްބާރުލުން ދެއްވާނެކަމުގެ ޔަގީންކަން ރައީސް ޑރ. މުޙައްމަދު މުޢިއްޒު ދެއްވައިފިއެވެ.
ރައީސް މިފަދައިން ވިދާޅުވީ "އިންޓަރނޭޝަނަލް ޑޭ އޮފް ވުމަން އެންޑް ގަރލްސް އިން ސައިންސް" ނުވަތަ ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދިންގެ ދުވަހާ ގުޅިގެން އެކްސްގައި ކުރެއްްވި ޕޯސްޓެއްގައެވެ.
ރައީސް ވިދާޅުވީ މިފަދަ ދުވަހެއްގައި ފާހަގަކުރަންޖެހެނީ، ޢިލްމު ފެތުރުމާއި އަދި ސިއްޙީ ދާއިރާއާއި މޫސުމީ ބަދަލުތަކުން ވިލުންތެރިކަން އިތުރުކުރުމަށް ކުރާ މަސައްކަތަކުގައާއި ޓެކްނޮލޮޖީއާއި އީޖާދީ މަސައްކަތްތަކުގައި އަންހެނުން އަދާކުރަމުންދާ ބޮޑު ދަޢުރުކަމަށެވެ.
އަދި ރާއްޖޭގައި މިފަދަ ދާއިރާތަކުން ތަޢުލީމާއި ތަމްރީނާއި އައު ފުރުޞަތުތައް ހޯދައިދިނުމަށް އެއްވެސް ތަފާތުކުރުމެއް ނެތި، އިތުރު މަގުތައް ތަނަވަސްކޮށްދެއްވާނެކަމަށް ރައީސް ވިދާޅުވިއެވެ.
މިފަދަ ދާއިރާކުން ކުރިއެރުމުގައި މިހާތަނަށް ކުރިމަތިވަމުން އައި ހުރަސްތައް ގިރާކޮށް، އަންހެނުންނާއި އަންހެން ކުދިންނަށް ސްޓެމްގެ ދާއިރާތަކުން ފުރުޞަތު ހޯދައިދިނުމަށް މަސައްކަތް ކޮށްދެއްވަމުން އަންނަ ފަރާތްތަކުގެ މަސައްކަތްވެސް ރައީސްގެ މެސެޖުގައި ފާހަގަކުރެއްވިއެވެ. އަދި އިތުރު ފުރުޞަތުތައް ހޯދައިދީ، އިޖާދީ އުފެއްދުންތެރި ދާއިރާތަކުން ކުރިއަށް ދާން ބޭނުންވާ ކުދިންނަށް އެ ފުރުޞަތު ފަހިކޮށްދިނުމަށް ސަރުކާރުން ފުރިހަމައަށް އެއްބާރުލުން ދޭނެކަމަށް ވިދާޅުވިއެވެ.