ސަރުކާރުން މަސައްކަތްކުރަނީ އަމިއްލަ ވިޔަފާރިތައް ފުނޑުފުނޑު ކޮށްލުމަށް ކަމަށް މި ވަގުތު ރާއްޖޭގައި އޮތް އެންމެ ބޮޑު އިދިކޮޅު ސިޔާސީ ޕާޓީ، އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެމްޑީޕީ ހަރުގޭގައި މިރޭ ކުރިޔަށް ގެންދިޔަ "ހޭވައްލާ ތައްޔާރު" ކޭމްޕޭނުގެ މެނިފެސްޓޯގެ ދެވަނަ ތަނބު ލޯންޗު ކުރުމުގެ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ ސަރުކާރުން ބިޑި އަނބުރާ ކިއްލި ތަޅާނީ، ކޮންދުވަހަކުން ތޯ ރައްޔިތުން މިހާރު ސުވާލު އުފައްދާ ކަމަށެވެ.
ޝާހިދު ވިދާޅުވީ، 2008 ވަނަ އަހަރު އަމިއްލަ ވިޔަފާރި ކުރުމަށް ވަކާލާތު ކުރަމުން ދިޔަ ދިއުމަށް ގައުމު މިހާރު ސޮއްސާލާފައިވާ ކަމަށެވެ. އެގޮތުން މިއަދުގެ ސަރުކާރުން ކަންކުރަމުން ގެންދަނީ އަމިއްލަ ވިޔަފާރިތައް ފުނޑުފުނޑު ކޮށްލުމަށް ކަމުގައި ޝާހިދު ވަނީ ތުހުމަތު ކުރައްވާފައެވެ.
މިސަރުކާރުން މިހާރު ކުރާ ކަމަކީ ރައްރަށުގައި އަމިއްލަ އެއްވެސް ވިޔަފާރިއެއް ކުރުމުގެ ފުރުސަތު ނުދިނުން ކަމަށާއި، އެގޮތުން ރަށްރަށުގައި ހިންގާނެ އަމިއްލަ ވިޔަފާރިއެއް މިހާރު ނެތް ކަމުގައި ޝާހިދު ވިދާޅުވިއެވެ. އެހެން ކަމުން މިހާރުގެ ޒުވާނުން ވަޒީފާ އަށް ވުރެން ބޮޑަށް ބޭނުން ވަނީ ބަސްބުނުމުގެ މިނިވަންކަން ކަމުގައި ޝާހިދު ވިދާޅުވި އެވެ.
މީގެ އިތުރުން ޝާހިދު ވަނީ ކޮންމެ ކަމަކު ވެސް ވަގަށް އެއްލާރިން ދެލާރި ޖީބަށް ލެވޭ ކަމުގަ ވާނަމަ ސަރުކާރު ހެޕީ ކަމަށާއި، އެއީ މިއަދުގެ ސަރުކާރުގެ އުސޫލު ކަމަށް ތުހުމަތު ކުރައްވަފައެވެ. އެހެންކަމުން މިއަދު އެމްޑީޕީން ނިކުމެ ތިބީ ރަށްރަށާއި ސިޓިތަކުގެ ކައުންސިލްތައް ބާރުވެރި ކުރުވާ، ރަށުގެ ވިޔަފާރިތަކަށް ފަހި މާދަމައެއް ހޯދައިދިނުމަށް ކަމަށް ވެސް ޝާހިދު ވިދާޅުވިއެވެ.