ގަވާއިދާ ހިލާފަށް ހުޅުމާލެ ދެވަނަ ފިޔަވަހީގައި ތަރައްގީ ކޮށްފައިވާ 4000 ހައުސިން ޔުނިޓު ފްލެޓުތަކަށް ކުނި އެޅި ބަޔަކު ފަހި ދިރިއުޅުން ކޯޕަރޭޝަން (އެފްޑީސީން ) ޖޫރިމަނާ ކޮށްފިއެވެ.
އެފްޑީސީން ނެރުނު ނޫސް ބަޔާނެއްގައި ބުނީ، 4000 ހައުސިން ޔުނިޓްތަކުގެ އާންމު ސަރަހައްދުތަކާއި، އިމާރާތްތަކުގެ ގްރައުންޑް ފްލޯ ހިމެނޭހެން، ކަނޑައެޅިފައިވާ އުސޫލުތަކަާއި ހިލާފަށް ބައެއް ފަރާތްތަކުން ކުނި އަޅަމުންދާކަމާށް އެ ކޯޕަރޭޝަންގެ ސަމާލުކަމަށް އައިސްފައިވާ ކަމަށެވެ.
އެގޮތުން، ގަވާއިދާ ހިލާފަށް ޓަވަރުތަކަށް ކުނި އެޅުމުގެ ސަބަބުން އާންމު ސަލާމަތަށް ނުރައްކާވާ ފަދަ ހާލަތްތަށް މެދުވެރިވަމުންދާ ކަމުގެ ޝަކުވާ ލިބެމުންދާ ކަމަށް ވެސް ކޯޕަރޭޝަނުން ވަނީ ބުނެފައެވެ.
އެހެން ކަމުން ގަވާއިދާ ހިލާފަށް ކުނި އަޅާ ފަރާތްތަކާ މެދު ފިޔަވަޅު އަޅައި އެފްޑީސީން ކަނޑައަޅާ އުސޫލެއްގެ ދަށުން ޖޫރިމަނާ ތަންފީޒުކުރަން ފަށާފައިވާ ކަމަށާއި، އެގޮތުން އުސޫލާ ހިލާފުވި ބައެއް ފަރާތްތަކާ މެދު ފިޔަވަޅުއަޅައި މިހާރު ވަނީ ޖޫރިމަނާ ކޮށްފައި ކަމަށް އެފްޑީސީން ވަނީ ބުނެފައެވެ.
އެފްޑީސީން ބުނީ، އިމާރާތްތަކުގެ ކޮރިޑޯތަކާއި، ހިނގާ މަގުތަކުގެ އިތުރުން ޓަވަރުތަކުގެ ބޭރު ސަރަހައްދުތަކަށް ކުނި އެޅުމާއި ކުނި ޖަމާކުރުމަކީ މަނާކަމެއް ކަމަށެވެ. އަދި ގޭބީސީތަކުން އުފެދޭ ކުނި އުކާލަންވާނީ ހަމައެކަނި ގްރައުންޑް ފްލޯގައި ހުންނަ 'ގާބޭޖް ރޫމް' ތަކުގައި އެކަމަށް ހާއްސަކޮށްފައިވާ ކުނިވަށިތަކަށް ކަމަށާއި، ޔުނިޓުތަކަށް އަލަށް ބަދަލުވާއިރު އުފެދޭ ފޮށިގަނޑާއި، ފުޅިމަދު އަދި އެ ނޫންވެސް ތަކެތި އުސޫލުތަކާ އެއްގޮތަށް އުކާލުމަކީ އެ ޔުނިޓެއްގެ ވެރިފަރާތުގެ ޒިންމާއެއް ކަމަށް ވެސް އެފްޑީސީން ވަނީ ބުނެފައެވެ.
އަމާން ޓަވަރުތަކުގައި ދިރިއުޅޭ ފަރާތްތަކުގެ ރައްކާތެރިކަން ކަށަވަރުކޮށް، ސާފުތާހިރު މާހައުލެއް ދެމެހެއްޓުމަށްޓަކައި، އެ ސަރަހައްދުގައި ޖަމާވެފައިވާ ކުނިތައް ނެގުމުގެ މަސައްކަތް އެފްޑީސީ އާއި ވޭސްޓް މެނޭޖްމަންޓް ކޯޕަރޭޝަން ލިމިޓަޑް (ވެމްކޯ) ގުޅިގެން ހުއްޓުމެއްނެތި ދަނީ ކުރަމުންނެވެ. މި މަސައްކަތުގެ ދަށުން އާމާން އުދަރެސް އަދި ދޯދިގެ ޖުމްލަ 32 ޓަވަރު ސާފުކުރުމަށް ވަނީ ހަމަޖެހިފައެވެ.