ސޮވެރިން ޑިވެލޮޕްމަންޓް ފަންޑް (އެސްޑީއެފް) އަށް 275 މިލިއަން އެމެރިކާ ޑޮލަރު ޖަމާކޮށްފި އެވެ.
ރައްޔިތުންގެ މަޖިލިސް މި އަހަރަށް ހުޅުވުމަށް ދެއްވި ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ މިދިޔަ އަހަރު ބޭރު ފައިސާއިން 1.2 ބިލިއަން ޑޮލަރުގެ އާމްދަނީއެއް ލިބިފައިވާތީ އެސްޑީއެފްއަށް ޖަމާކުރާ ޑޮލަރުގެ މިންވަރު އިތުރުވެފައިވާ ކަމަށެވެ.
ރައީސް މުއިއްޒު ވިދާޅުވީ ނޮވެމްބަރު 17، 2023 ގައި ވެރިކަމާ ހަވާލުވެ ވަޑައިގެންނެވިއިރު އެސްޑީއެފް ގައި ބޭރުގެ ދަރަނި ދެއްކުމަށް ހުރީ އެންމެ 2 މިލިއަން އެމެރިކާ ޑޮލަރު ކަމަށެވެ. ނަމަވެސް ޑޮލަރު ހިފެހެއްޓުމަށާއި ފަންޑަށް ޖަމާކުރާ މިންވަރު އިތުރުކުރުމަށް އެޅި ފިޔަވަޅުތަކުގެ ސަބަބުން ބޭރު ފައިސާގެ ދަތިކަން ހައްލުވެ، ކްރެޑިޓް ރޭޓިން އެޖެންސީތަކުގެ އިތުބާރު ލިބިފައިވާ ކަމަށާއި މިމަހުގެ ތިން ވަނަ ދުވަހުގެ ނިޔަލަށް އެސްޑީއެފް ގެ ކޭޝް ބެލެންސް 275 މިލިއަން އެމެރިކާ ޑޮލަރަށްވުރެ އިތުރުވެފައިވާ ކަމަށް ރައީސް ވިދާޅުވި އެވެ.
ރައީސް ވިދާޅުވީ މި އަހަރުގެ އޭޕްރީލްގައި މުއްދަތު ހަމަވާ ސުކޫކަށް ބޭނުންވާ 150 މިލިއަން އެމެރިކާ ޑޮލަރު ހަމަޖައްސާނީ އެސްޑީއެފް ގައި ރައްކާކުރެވިފައިވާ ބޭރު ފައިސާއިން ކަމަށެވެ. އަދި ކުރިއަށް އޮތް ތަނުގައިވެސް ބޭރުގެ ދަރަނިތައް އަދާކުރުމަށް އެސްޑީއެފް ބޭނުންކުރާނޭ ގޮތަށް މެދު ރާސްތާގެ ބަޖެޓުގައި ހިމަނާފައިވާ ކަމަށާއި، މީގެ މަގުސަދަކީ ދަރަނި އަދާކުރުމަށް އިތުރު ލޯނު ނެގުން މަދުކޮށް، ޖުމްލަ ދަރަނި ދަށްކުރުން ކަމަށް ރައީސް ވިދާޅުވި އެވެ.