ދިވެހީންގެ ނަމުގައި 10 ރިސޯޓް ތަރައްގީކޮށް، ކޮންމެ ރައްޔިތެއްގެ ބޭންކު އެކައުންޓަށް އަހަރަކު މަދުވެގެން 400 ޑޮލަރު ޖަމާކޮށްދިނުމަށް ސަރުކާރުން ނިންމަވައިފިއެވެ.
މިކަން އިއުލާނުކުރެއްވީ މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.
އެ މަނިކުފާނު ވިދާޅުވީ، ދިވެހި ފަތުރުވެރިކަމަށް 50 އަހަރަށް ވުރެެ ގިނަ އަހަރު ވެގެން ދިޔަނަމަވެސް ހުރިހާ ދިވެހީންނަށް އެ ސިނާޔަތުން ފައިދާ ލިބޭނެ ގޮތެއް ފަހިވެފައި ނެތް ކަމަށާއި، އަދި ފަތުރުވެރިކަމަކީ ރާއްޖޭގެ ގުދުރަތީ ވަސީލަތްތައް އެންމެ ބޮޑަށް ބޭނުންކުރާ ސިނާއަތް ކަމަށްވާއިރު، އެ ވަސީލަތްތަކުގެ ހަގީގީ މިލްކުވެރިންނަކީ ރައްޔިތުން ކަމަށެވެ.
އެގޮތުން ރައީސް ވިދާޅުވީ، މި ރާއްޖޭގެ ފަޅުތަކާއި ރަށްތަކާއި ގިރިތަކާއި އެ ނޫން ކޮންމެ ތަނަކީ ހުރިހާ ދިވެހީންގެ މިލްކުވެރިކަން އޮތް ތަންތަން ކަމަށެވެ. އެހެން ކަމުން ފަތުރުވެރިކަމުން ދިވެހި ހުރިހާ ރައްޔިތުންނަށް ހަމަހަމަ ކަމާއެކު މަންފާ ލިބެން ޖެހޭ ކަމުގައި އެ މަނިކުފާނު ވިދާޅުވިއެވެ.
އެ މަނިކުފާން ވިދާޅުވީ މި ގޮތަށް ތަރައްގީކުރާ ހުރިހާ ރިސޯޓެއްގެ ހިއްސާ ދިވެހި ހުރިހާ ރައްޔިތުންނަށް ލިބޭ ގޮތަށް ގާނޫނުގައި އެކަން ކަނޑައަޅުއްވާނެ ކަމަށެވެ.
ރައީސް ވިދާޅުވި ގޮތުގައި ސަރުކާރުގެ އަންދާޒާއަކީ މި މަޝްރޫއުގެ ދަށުން 2030 ވަނަ އަހަރުން ފެށިގެން ރައްޔިތުންގެ އެކައުންޓަށް މި ފައިސާ ޖަމާކުރަން ފެށުމަށް އުންމީދު ކުރައްވާ ކަމަށެވެ.
ހިސާބުތަކުން ދައްކާގޮތުގައި، އެވްރެޖްކޮށް ކޮންމެ ދިވެހި ރައްޔިތެއްގެ އެކައުންޓަށް އަހަރަކު މަދުވެގެން 400 ޑޮލަރު ޖަމާވެގެންދާނެ ކަމަށާއި، އެ އުންމީދު ހަގީގަތަކަށް ހެދުމަށް ވަރަށް ހަލުވިކަމާއެކު މަސައްކަތް ކުރައްވާނެ ކަމަށް ވެސް އެ މަނިކުފާނު ވިދާޅުވިއެވެ.