11 ނޮވެމްބަރު 2027 ވާ ދުވަހު މާލޭގެ ވިޔަފާރި ބަނދަރު ތިލަ ފުއްޓަށް ބަދަލުކޮށް ނިންމަން ހަމަޖައްސާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައްޔިތުންގެ މަޖިލިސް މި އަހަރަށް ހުޅުވުމުގެ ގޮތުން ރިޔާސީ ބަޔާން އިއްވަވަމުން ރައީސް ވިދާޅުވީ ހުރިހާ މަސައްކަތެއް ނިންމާ 11 ނޮވެމްބަރ 2027 ވާ ދުވަހު މާލޭގެ ވިޔަފާރި ބަނދަރު ތިލަ ފުއްޓަށް ބަދަލުކުރަން ނިންމާފައިވާކަމަށެވެ.
އެގޮތުން މި ބަދަލާއެކު ބަނދަރުގެ ހިދުމަތްތަށް ފެށުމުން މުދާ ހުސްކުރުން އަވަސްވެ ރައްޔިތުންނަށް ފައިދާތަކެއް ލިބިގެންދާނެކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ މިހާރު މާލޭގައި ގުދަން ކުރެވޭ މުދާ ތިލަ ފުށީގައި ގުދަން ކުރުމުގެ ފުރުސަތު ފަހިވެ، މާލޭގެ މާރުކޭޓު ސަރަހައްދުގައި މިހާރު ކުރަމުންދާ ހޯލްސޭލް ވިޔަފާރި އެއްކޮށް ތިލަފުއްޓަށް ބަދަލު ކުރަން ނިންމާފައިވާކަމަށެވެ.
މިކަމުގެ ސަބަބުން މުދާ އުފުލާ ދޯނި ފަހަރަށާއި، ރަށް ރަށަށް މުދާ ގެންދާ ފަރާތްތަކަށް ލުއި ލިބޭނޭ ކަމަށް ރައީސް ވިދާޅުވިއެވެ.
ރައީސް ވިދާޅުވީ އަމާޒަކީ ވިޔަފާރި ބަނދަރު ތަކުގެ ސަބަބުން ދިމާވެފައިވާ މައްސަލަތަށް ހައްލުކުރުން ކަމަށެވެ.