ރާއްޖޭގެ އިގްތިސާދުން ދުކޮށްލާފައިވާ ފޯޅަވަހި އަނބުރާ ހޯދަން ކުރަން ޖެހޭ ހުރިހާ މަސަކަތެއް މިހާރު ކުރަންފެށިފައި ވާކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވީ، މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުންނެވެ.
ރާއްޖޭގެ ހައްގުތަކާ މިލްކިއްޔާތު ކަޝަވަރު ކުރުމަށް ބޭރުދުނިޔޭގައި ކުރެވުނު މުއާމަލާތްތަކާ ވަކާލާތުގެ ތެރެއިން ދިވެހި ދައުލަތުގެ ސިޔާދަތާއި ގުޅިފައިވާ ފޯޅަވެހީގެ މައްސަލަ ފާހަގަ ކުރައްވައި ރައީސް ވިދާޅުވީ، ފޯޅަވަހީގެ ތާރީހެއް ރާއްޖެއަށް އޮތް ކަމަށާއި، އެއީ އޭރުވެސް މިހާރު ވެސް ދިވެހީން މަހަށް ނުކުމެ ތިބޭ ސަރަހައްދެއް ކަމަށެވެ.
އެހެން ކަމުން ރާއްޖެއާ ދެކޮޅަށް މޮރިޝަސްއިން ހުށަހެޅި މައްސަލައިގައި، ނިމިދިޔަ ސަރުކާރުން އަމަލުކޮށްފައިވާ ގޮތުން ރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ސަރަޙައްދުން ބޮޑު ބައެއް ގެއްލޭ ގޮތަށް އިޓްލޮސްއިން ނިންމާފައިވާ ނިންމުން ބަދަލު ކުރައްވަން މިހާރު މަސައްކަތް ފެށިފައިވާ ކަމަށެވެ. އެކަމުގެ ތަފްސީލް ވެސް އެމަނިކުފާނު ވަނީ ދެއްވާފައެވެ.
އެގޮތުން ފޯޅަވަހި މޮރިޝަސްއަށް ދިނުމާ ދެކޮޅަށް، ރާއްޖޭން 8 ނޮވެމްބަރު 2024 ގަ އާއި އަދި ޖަނަވަރީ 2026ގައި އިނގިރޭސިވިލާތަށް އިއުތިރާޒު ކޮށް ލިޔުމުން ހުށަހަޅައިފައިވާނޭ ކަމަށާއި، 15 ޑިސެމްބަރު 2025 ގައި އެ މަނިކުފާނާއި އިނގިރޭސީ ވިލާތުގެ ޕްރައިމް މިނިސްޓަރ އޮނަރަބަލް ދޭވިޑް ލެމީއާ އެކުގައި އޮންލައިން ފޯނު ކޯލުއެއްގައި ފޯޅަވެހީގެ މައްސަލާގައި ދިވެހި ސަރުކާރުން ިނގިރޭސީ ވިލާތުގެ ސަރުކާރާ އެކު މަޝްވަރާ ކުރަން ބޭނުންވާ ކަމަށް ދަންވާފައި ވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ އެ ކަނޑުގެ ސަރަހައްދު ހޯދަން ގާނޫނީ ގޮތުން މަސައްކަތް ކުރަން ބަންޑާރަ ނައިބަށް އަންގަވައިފައިވާނެ ކަމަށާއި، އެ މައްސަލަ ދިރާސާ ކުރި ކޮމިޓީގެ ރިޕޯޓު މިދިޔަ މަހު 22ގައި އެ މަނިކުފާނަށް ހުށަހަޅައިފައިވާ ކަމަށެވެ. އަދި ކެބިނެޓުން މިހާރު ވަނީ އެ ރިޕޯޓާ ގުޅިގެން ފިޔަވަޅު އަޅަން ފަށައިފައި ކަމަށް ވެސް އެ މަނިކުފާނު ވިދާޅުވިއެވެ.
އެގޮތުން, ކުރީގެ ރައީސް އިބްރާހިމް މުހައްމަދު ސޯލިހް، މޮރިޝަސްއަށް ފޮނުއްވި ސިޓީ އަނބުރާ ގެންނަވަން ނިންމެވި ކަމަށް ރައީސް އިއުލާން ކުރެއްވެވިއެވެ.