ރައީސުލްޖުމްހޫރިއްޔާ ރިޔާސީ ބަޔާން އިއްވަން ފެށިތާ އިރުކޮޅެއްފަހުން އިދިކޮޅު މެމްބަރުންތައް ނިޒާމު ގެއްލުވާލާ އަޑުގަަދަ ކުރުމުގެ ސަބަބުން ދެ މެންބަރެއްގެ ނަން އިއްވާ މަޖިލީހުގެ ތަޅުމުން ނެރެފި އެވެ.
މިއަދުގެ ރިޔާސީބަޔާން އިއްވަން ފެށިއިރު މަޖިލީހުގެ ތަޅުން އޮތީ ވަރަށް އަމާން އޮމާންކޮށް ކަން ފާހަގަކުރެވެއެވެ. ނަމަވެސް ރައީސުލްޖުމްހޫރިއްޔާ ރިޔާސީބަޔާން އިއްވަން ފެށިތާ އިރުކޮޅެއްފަހުން އިދިކޮޅު މެމްބަރުން ޖެއްސުންކުރަން ފެށިއެވެ. އެގޮތުން ބަޔާން އިއްވަން ފެށިތާ އިރުކޮޅެއްފަހުން އެމްޑީޕީއަށް ނިސްބަތްވާ އިދިކޮޅު ބައެއް މެމްބަރުން، ބަޔާން އިއްވުމަށް ހުރަސްއެޅުމުގެ ގޮތުން ކަށިގަނޑު ފުމެން ފެށިއެވެ.
ރައީސް، ޗާގޯސް މައްސަލައާ ގުޅޭގޮތުން ވާހަކަ ދައްކަވަން ފެއްޓެވެމުން އިދިކޮޅު މެމްބަރުން ވަނީ ގޮނޑިކޮޅުތަކުން ތެދުވެ އިހުތިޖާޖުކުރަން ފައްޓަވާފައެވެ.
އެއާއެކު މަޖިލީހުގެ ރައީސް އަބްދުއްރަހީމް އަބްދުﷲ ވަނީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އާއި ވައިކަރަދޫ ދާއިރާގެ މެންބަރު ހުސައިން ޒިޔާދަށް ނަސޭހަތް ދެއްވުމަށްފަހު ވެސް ތަކުރާރުކޮށް ކަށިގަނޑު ފުމުމުން އެ ދެ މެންބަރުން ވެސް މަޖިލީހުގެ ތަޅުމުން ބޭރުކޮށްފައެވެ. މީގެ އިތުރުން ވެސް އިދިކޮޅު މެންބަރުން ވަނީ ރައީސްގެ އިސްތިއުފާއަށް ގޮވާލައްވާ އެ މެންބަރުން ވަނީ ރައީސްގެ ޕޯޑިއަމް ކައިރިއަށް އެއްވެފައެވެ.
މި އަހަރުގެ ފުރަތަމަ ދައުރުގެ ފުރަތަމަ ޖަލްސާގައި، ރައީސް ޑރ. މުހައްމަދު މުއިއްޒު އިއްވަވަމުންދަނީ އެ މަނިކުފާނުގެ ތިން ވަނަ ރިޔާސީ ބަޔާނެވެ.
މިއަހަރުގެ ރިޔާސީ ބަޔާނުގައި ރައީސް ވަނީ ފާއިތުވި އަހަރު ގައުމުގެ އެތައް ކަމެއް އިސްލާހުކޮށް، ތަރައްގީކޮށް ކުރިއަރުވައިފައިވާ ކަމަށް ވިދާޅުވެފައެވެ. އަދ ިއިތުރު ކަންކަން މި އަހަރު ކުރިއަށްގެންދާނެ ގޮތް ހާމަކުރައްވާނެ ކަމަށް ވެސް އެ މަނިކުފާނު ވިދާޅުވި އެވެ.