ސްރީލަންކާއަކީ ހަމައެކަނި އަވަށްޓެރި ގައުމެއް ނޫން ކަމަށާއި، އެގައުމުގެ ރައްޔިތުންނަކީ ގާތް އެކުވެރިންތަކެއްގެ އިތުރުން އެއް އާއިލާއެއް ފަދަ ބައެއް ކަމަަށް ހާރިޖީ ވަޒީރު ޑރ. އަބްދުﷲ ހަލީލް ވިދާޅުވެއްޖެއެވެ.
ސްރީލަންކާގެ 78 ވަނަ މިނިވަން ދުވަސް ފާހަގަކުރުމަށް ބާސެލޯ ނަސަންދުރާގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހަލީލް ވިދާޅުވީ ދިވެހިންނަށް ސްރީލަންކާއަކީ ހަމައެކަނި އަވަށްޓެރި ގައުމެއް ނޫން ކަމަށާއި، އެއީ ވަރަށް ގާތް އެކުވެރިއެއްގެ އިތުރުން ކޮންމެ ގޮތަކުން ބެލިޔަސް ދިވެހިންގެ ދެވަނަ 'ގެ' ކަމަށެވެ.
ވަޒީރު ވިދާޅުވީ ދެ ގައުމުގެ ދެމެދުގައި އޮތް ގުޅުމަކީ ގަރުނުތަކެއްވީ ތާރީހާއި، ސަގާފީ އެއްގޮތްކަމާއި، އެއްބާރުލުން ދިނުމުގެ މައްޗަށް ބިނާވެފައިވާ ވަރުގަދަ ގުޅުމެއްކަމަށެވެ.
ވަޒީރުގެ ވާހަކަފުޅުގައި ތައުލީމީ ދާއިރާއާއި ސިއްހީ ދާއިރާއިން ލަންކާއިން ދިވެހިންނަށް ދެމުންދާ އެއްބާރުލުމާއި އެހީތެރިކަމަށް ޝުކުރުއަދާކުރެއްވިއެވެ. އަދި ރާއްޖޭގެ ތަރައްގީގައި ލަންކާގެ ފަންނީ މަސައްކަތްތެރިން އަދާކުރާ މުހިންމު ދައުރު ފާހަގަކުރައްވާ، ދެ ގައުމުގެ ދެމެދުގައި އޮތް ރައްޔިތުންގެ ގުޅުމަކީ މި ގުޅުމުގެ އެންމެ މުހިންމު އަސާސްކަމަށް ވަޒީރު ވިދާޅުވިއެވެ.
ވަޒީރުގެ ވާހަކަފުޅުގައި ދާދިފަހުން ލަންކާއަށް ކުރިމަތިވި 'ޑިޓްވާ' ތޫފާނުގެ ހާދިސާއަށްވެސް އަލިއަޅުއްވާލެއްވިއެވެ.
މީގެ އިތުރުން ސްރީލަންކާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު މުހައްމަދު ރިޒްވީ ހަސަން ވިދާޅުވީ، ދެ ގައުމުގެ ދެމެދުގައި އޮތީ ތާރީހީ އަދި އެކަކު އަނެކަކަށް އިހުތިރާމްކުރާ ހާއްސަ ގުޅުމެއް ކަމަށެވެ. ދެ ގައުމުގެ ދެމެދުގައި އޮތް އަހުވަންތަ ގުޅުމާއި، ހާއްސަކޮށް ރައްޔިތުންގެ މެދުގައި އޮތް ބަދަހި ގުޅުން 'ޑިޓްވާ' ތޫފާނާ ގުޅިގެން ދިވެހިން ދެއްކި އެހީތެރިކަމުން އަނެއްކާވެސް ހާމަވެގެން ގޮސްފައިވާ ކަމަށްވެސް ސަފީރު ވިދާޅުވިއެވެ.
ހަލީލް ވަނީ ސްރީލަންކާގެ 78 ވަނަ މިނިވަން ދުވަހުގެ ތަހުނިޔާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށާއި، ދިވެހި ސަރުކާރާއި ރައްޔިތުންގެ ނަމުގައި ލަންކާގެ ރައީސް އަނޫރަ ކުމާރާ ދިސާނަޔަކެ އަދި އެގައުމުގެ ރައްޔިތުންނަށް ތަހުނިޔާ ފޮނުއްވާފައެވެ.
ދިވެހިރާއްޖެއާއި ލަންކާއަކީ ސަރަހައްދީ ގޮތުންނާއި ސަގާފީ ގޮތުން ގާތް ގުޅުމެއް ބާއްވަމުން އަންނަ ދެ ގައުމެވެ. ހާއްސަކޮށް ތައުލީމީ އަދި ސިއްހީ ދާއިރާއިން ލަންކާއަކީ ދިވެހިންނަށް ގިނަ ހިދުމަތްތަކެއް ފޯރުކޮށްދޭ ގައުމެއްކަން ފާހަގަކޮށްލެވެއެވެ.
ދިވެހިރާއްޖެއިން ލަންކާއާއެކު ރަސްމީކޮށް ހާރިޖީގުޅުން ގާއިމުކޮށްފައިވަނީ 26 ޖުލައި 1965 ގައެވެ.