އަހަރެއް ނިމިގެންދިޔައިރު، ބޯހިޔާވަހިކަން ހޯދައިދިނުމަށް ބަޔާންކުރި އެއްވެސްކަމެއް ފެށިފައިނުވާކަމަށް އެމްޑީޕީގެ ޕީޖީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
ނާޒިލް މި ފަދައިން ވިދާޅުވީ، މިއަހަރުގެ ރިޔާސީ ބަޔާން އިއްވާ ޖަލްސާ މާދަމާ ބޭއްވުމަށް ތާވަލް ކޮށްފައިވާތީ، މިކަމާ ގުޅޭގޮތުން އިދިކޮލު މައި ޕާޓީ، އެމްޑީޕީ ޕާލިމަންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. ނާޒިލް ވިދާޅުވީ، މިދިޔަ ރިޔާސީ ބަޔާނުގައި ސަރުކާރުގެ އެންމެބޮޑު ވައުދެއްގެ ގޮތުގައި ރައްޔިތުންނަށް ހުށަހެޅިގެންދިޔައީ ބޯހިޔާވަހިކަމުގެ ވައުދު ކަމަށެވެ.
އެގޮތުން ބޯހިޔާވަހިކަމުގެ އަހަރެއް ނިމިގެންދިޔައިރު، ކުރުމަށް ބަޔާންކުރި އެއްވެސްކަމެއް ފެށިފައިނުވާކަމަށާއި، ޕީއެސްއައިޕީގެ ދަށުން ރާއްޖޭގެ އުތުރާއި ދެކުނު އަދި މާލެ ސަރަހައްދުގައި ބޯހިޔާވަހިކަމުގެ މަޝްރޫއުތައް ހިންގާނޭކަމަށް ރައީސް ޑރ. މުއިއްޒު ވައުދުވީއިރު، އެއިން އެއްވެސް ސަރަހައްދެއްގައި އެއްވެސްކަމެއް ފެށިފައިނުވާކަމަށް ނާޒިލް ވިދާޅުވިއެވެ.
މީގެ އިތުރުން ނާޒިލް ވަނީ، އަތޮޅުތެރޭގައި ސަރުކާރުން ކުރަން އުޅުނު އެއްވެސްކަމެއް އަހަރު ނިމުނުއިރު ކުރިއަށް ގެންދެވިފައި ނުވާއިރު، ބަޖެޓްކުރި ފައިސާތަކަށް ވީގޮތް ވެސް ނޭނގޭކަމަށް ނާޒިލް ވިދާޅުވިއެވެ.
ނާޒިލް ވިދާޅުވީ، ހަގީގަތުގައި ރިޔާސީބަޔާނަކީ އެއަހަރު ރައްޔިތުންނަށްވާ ވައުދެއްގެ ގޮތުގައި ރައްޔިތުންގެ މަންދޫބުންގެ ކުރިމަތީގައި ރައްޔިތުންގެ މަޖިލީހުގައި ރައީސުލްޖުމްހޫރިއްޔާ އިއްވާ ބަޔާނެއް ކަމަށާއި، އެއީ ރައީސުލްޖުމްހޫރިއްޔާގެ ވައުދެއް ކަމަށެވެ.