2024 ވަނަ އަހަރުގެ އާމްދަނީ އިން ނަގާ ޓެކްސް ނުދައްކާ 25 ފަރާތެއްގެ ނަން މޯލްޑިވްސް އިންލެންޑް ރެވެނިއު އޮތޯރިޓީ، މީރާ އިން ހާމަކޮށްފިއެވެ.
މީރާއިން އާންމުކުރި ބަޔާނެއްގައި ބުނީ، މި ފަރާތްތަކަކީ އާމްދަނީއިން ނާގާ ޓެކުހުގެ އަދަދު އެއް ލައްކައަށްވުރެ ގިނަ ރުފިޔާ ދައްކަން ޖެހޭ ފަރާތްތައް ކަމަށެވެ.
މީރާއިން ބުނީ ޓެކުހުގެ ބަޔާން ހުށައަޅަފައި ނުވާ އަދި ފައިސާ ނުދައްކާ ފަރާތްތަކުގެ ނަން ހާމަކުރާ އުސޫލުގެ ދަށުން، އެ ފަރާތްތަކުގެ މައުލޫމާތު ހާމަކުރުމުގެ ކުރިން އެ ފަރާތްތަކަށް ފޯނުން ގުޅައި، ޓެކްސް ނުދައްކާ ފަރާތްތަކަށް ގާނޫނުގައި ކަނޑައަޅާފައިވާ އަދަބުތަކާއި، އެ ފަރާތްތަކާމެދު އަޅާނެ ފިޔަވަޅުތަކުގެ މައުލޫމާތު ކިޔައިދެވިފައިވާނެ ކަމަށާއި، އެސްއެމްއެސްގެ ޒަރިއްޔާއިންވެސް އެ ފަރާތްތަކަށް އެކަން އަންގާފައިވާނެ ކަމަށެވެ.
ދައުލަތަށް ދައްކަންޖެހި ނުދައްކާފައިވާ ޓެކުހާއި އެހެނިހެން ފައިސާ ހޯދުމުގެ ގޮތުން މީރާގެ އެންފޯސްމެންޓް ޕޮލިސީގެ ދަށުން އެޅުމަށް ކަނޑައަޅާފައިވާ އިތުރު ފިޔަވަޅުތައްވެސް އެއްވެސް ތަފާތުކުރުމެއް ނެތި އަޅަމުންދާނެ ކަމަށްވެސް މީރާއިން ބުނެއެވެ.
އެގޮތުން ޓެކުހުގެ ބަޔާން ހުށައަޅަފައި ނުވާ އަދި ފައިސާ ނުދައްކާ ފަރާތްތަކަށް ބަލާލާއިރު، އަހުމަދު ލަސްސާން މުހައްމަދު، އަލީ ޒާހިރު، އަމްލޮގް ޕްރައިވެޓް ލިމިޓެޑް، އެޓެއްލޯ ކޮންސްޓްރަކްޝަން ޕްރައިވެޓް ލިމިޓެޑް، އަޒްރޯވާ މޯލްޑިވްސް ޕްރައިވެޓް ލިމިޓެޑް، ސައިޕްރިއާ ޕްރައިވެޓް ލިމިޓެޑް،ޑަޕްލެކްސް ޕްރައިވެޓް ލިމިޓެޑް، އީއާރުއައި ހޯލްޑިންގްސް ޕްރައިވެޓް ލިމިޓެޑް، ފްލެކްސިންކް ޕްރައިވެޓް ލިމިޓެޑް، އައި އެންޑް ސީ ޓްރޭޑިން ޕްރައިވެޓް ލިމިޓެޑް، އިބްރާހިމް ހަބީބް، އައިއެމްޕީ ޕްރައިވެޓް ލިމިޓެޑް، ޖޭ ބްރަދާސް ޕްރައިވެޓް ލިމިޑް، ޖާހު ޕްރައިވެޓް ލިމިޓެޑް، ކެއިރެޓްސޫ ޕްރައިވެޓް ލިމިޓެޑް،ކޭއެސްޖޭ އޯވަސީސް އެމްއެލްޑީ ޕްރައިވެޓް ލިމިޓެޑް، މެޕްސް މޯލްޑިވްސް ޕްރައިވެޓް ލިމިޓެޑް، އެމްއެފް ޓްރޭޑިން ހައުސް ޕްރައިވެޓް ލިމިޓެޑް، މުހައްމަދު ސަދާން ޖައުފަރު، އޮޕްޓިމާ ހޯލްޑިންގްސް ޕްރައިވެޓް ލިމިޓެޑް، ޕްރިސްވޯޓަރ ޕްރައިވެޓް ލިމިޓެޑް، ޝޮޓް ބެވަރޭޖްސް މޯލްޑިވްސް ޕްރައިވެޓް ލިމިޓެޑް، ސިއެރާ ސްޓާ ޖޭވީ (ޕްރައިވެޓް) ލިމިޓެޑް ގެ އިތުރުން، ޓިމްބާ ސްޓޯސް ޕްރައިވެޓް ލިމިޓެޑް، އަދި ޔެއޯމަން އެޖެންސީސް (މޯލްޑިވްސް) ޕްރައިވެޓް ލިމިޓެޑް ހިމެނެއެވެ.
މީރާ އިން ވަނީ މިހާތަނަށް ޓެކުހުގެ ބަޔާން ހުށަހަޅާފައިނުވާ ފަރާތްތަކުން އެ ބަޔާންތައް ހުށަހެޅުމާއި، ޓެކްސް ނުދައްކާ ފަރާތްތަކުން ލަސް ނުކޮށް ޓެކްސް ދެއްކުމަށް ނުވަތަ މީރާއާއެެކު ޓެކްސް ދެެއްކުމުގެ އެއްބަސްވުމަކަށް އައުމަށް އިލްތިމާސްކޮށްފައެވެ.