މާލޭގެ ސެންޓާ ފޯ ހަޔާ ސެކަންޑްރީ އެޑިއުކޭޝަން (ސީއެޗްއެސީ) އަށް 7 ފަންގިފިލާގެ އައު އިމާރާތެއް އިތުރުކުރުމަށް ކޮންޓްރެކްޓަރާ ހަވާލުކޮށްފިއެވެ.
އެޑިއުކޭޝަން މިނިސްޓްރީން އެކްސްގައި އާންމުކޮށްފައިވާ ޕޮސްޓެއްގައި ބުނީ މަސައްކަތް ހަވާލުކޮށްފަވަނީ ޔެސް މޯލްޑިވްސް ޕްރައިވެޓް ލިމިޓެޑް އަށް ކަމަށެވެ.
ސީއެޗްއެސްސީގެ އައު އިމާރާތް އެޅުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އެޑިކޭޝަން މިނިސްޓަރު ޑރ. އިސްމާއިލް ޝަފީއު ކަމަށާއި ޔެސް މޯލްޑިވްސްގެ ފަރާތުން ސޮއިކުރެއްވީ އެކުންފުނީގެ ޑިރެކްޓަރު އަހުލާމް ރުޝްދީ ކަމަށް އެޑިއުކޭޝަން މިނިސްޓްރީން ބުނެއެވެ.
އެޑިއުކޭޝަން މިނިސްޓްރީން ބުނީ މި އެއްބަސްވުމުގެ ދަށުން ސީއެޗްއެސްސީގެ އެނެކްސް އިމާރާތް ކުރަނީ 7 ފަންގިފިލާއަށް، މާލޭގައި މިހާރު ސީއެޗްއެސީ ހިންގާ ބިމުގެ ބިށްދަށުގައި އޮތް ހުސް ޖާގައިގައި ކަމަށެވެ.
ސީއެޗްއެސްސީގެ އައު އިމާރާތުގެ މަސައްކަތް ޔެސް މޯލްޑިވްސްއާ ހަވާލުކޮށްފައިވަނީ 51.6 މިލިޔަން ރުފިޔާއަށް ކަމަށް އެޑިއުކޭޝަން މިނިސްޓްރީން މައުލުމާތުދެއެވެ.
މި މަޝްރޫއަކީ މަތީ ސާނަވީ ތައުލީމުގެ ފުރުސަތުތައް ފުޅާކުރުމަށް ސަރުކާރުން ކުރައްވަމުންދާ މަސައްކަތުގެ ތެރެއިން، މާލޭގައި ކިޔަވައިދިނުމުގެ ޖާގަ އިތުރުކުރުމަށްޓަކައި ކުރިއަށްގެންދެވޭ މުހިންމު މަޝްރޫއެއްކަމަށް އެޑިއުކޭޝަން މިނިސްޓްރީން ބުނެއެވެ.
ސީއެޗްއެސްސީ އެނެކްސް އިމާރާތުގައި ހިމެނޭ ބައިތަކަށް ބަލާލާއިރު 15 ކްލާސްރޫމް، 4 ސައިންސް ލެބް، ސްޓާފް ރޫމް، ލީޑިން ޓީޗާ ރޫމްގެ އިތުރުން އެޑްމިން އޮފީސް، 3 ލިފްޓް، އަދި ޕާކިން އޭރިއާ އެއް ހިމެނެއެވެ.
ސެންޓާ ފޯ ހަޔާ ސެކަންޑްރީ އެޑިއުކޭޝަން އަކީ "ސައިންސް އެޑިއުކޭޝަން ސެންޓާ"ގެ ނަމުގައި 3 ޖުލައި 1979 ގައި ހުޅުވުނު ސުކޫލެކެވެ. މި ސްކޫލަކީ، މަތީ ސާނަވީ ތައުލީމަށް ހާއްސަކޮށްގެން ރާއްޖޭގައި ހުޅުވި އެންމެ ދުވަސްވީ ސްކޫލެވެ.
ސްކޫލް މާލޭގައި ހިންގަމުން އައީ ލިލީމަހުގައި ހުންނަ އިމާރާތެވެ. ނަމަވެސް 2023 ވަނަ އަހަރު ސީއެޗްއެސްސީ، އައު އިމާރާތަކާއެކު ހުޅުމާލެއަށް ބަދަލުކުރިއެވެ. 8 ފަންގިލާގެ އިމާރާތަކީ 1200 ދަރިވަރުންގެ ޖާގައިގެ ސްކޫލެކެވެ. މިއާއެކު މާލޭގެ ސްކޫލް މުޅިން އުވާލިއެވެ.
ގިނަ ދަރިވަރުންނަށް މަތީ ސާނަވީއަށް ފުރުސަތު ދިނުމަށާއި، މާލޭގައި މަތީ ސާނަވީ ސްކޫލެއް ނެތުމުގެ ސަބަބުން ކުރިމަތިވަމުންދިޔަ ދަތިތަކަށް ހައްލު ގެނައުމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވީ މާލޭގެ ސްކޫލް ހިމެނޭހެން އަލުން ކިޔަވައިދިނުން ފެށުމަށެވެ.
މި ނިންމެވުމުގެ ދަށުން 800 އަށްވުރެ ގިނަ ދަރިވަރުންނާއެކު، 2024، ސެޕްޓެމްބަރު 1ވަނަ ދުވަހު، މާލޭ ސީއެޗްއެސްސީގެ ކިޔެވުން އަނެއްކާވެސް ވަނީ ފަށާފައެވެ. އަދި އަލަށް އިތުރުކުރާ އިމާރާތާއެކު، މަތީ ސާނަވީއަށް ކިޔެވުމުގެ ފުރުސަތު އިތުރު ގިނަ ދަރިވަރުންތަކަކަށް ލިބިގެންދާނެ ކަމަށް އެޑިއުކޭޝަން މިނިސްޓްރީން ބުނެއެވެ.